الزين البلدي..
يالزين البلدي..
ياوجه في كل صباح يضوي
ياعين وحاجب..
ياقناية جابتني بالسنبل
وطحت كنحرك لعجاج
ملي سرحت في جنان الذرة نحش بالمنجل.
ماهزيت الراس..
ولا ريقت باللسان اللي عواج.
طلقي ذراعي..وسرحي جلدو
ونفضي برموشك..مافقلبي وحل
وفكي التكماش..
وعبري بالطفر
مابين العنق والصدر..
في تجي ضربة المهراز
وفين تصدي راسك
وتاخدك حلاوة النعاس..
بالحق حتى تصيبي الفراش.
قالوا: زينك بلدي..
وحروفو نار كاتكدي
والشايف فيك يكحل بالعمى
والسامع بيك..ودنيه شي يدلى
وشي في السما.
آش بغيتك..؟
وكاع اللي فات حد لسانو
يبرق عينيه وتخرج ليه من جهة العنق حلاقمو
وولي كيف جمل نفخ ريتو..
أول وقف جنب البير ودلى شلاقمو.
رجعيني لحصيدة..
راني ماشي من ترابك
ومقامي ماحدى مقامك.
لكنتي صيادة..على الشبكة ولافة
راني خياط نعقد حزامها ونفكو..ويدي كرافة.
