غزوة الجامعه...يترى هتحارب معانا؟؟؟

غزوة الجامعة ..يترى هتحارب معانا؟؟
بسم الله الرحمن الرحيم ، وبه نستعين ، وصلى اللهم على سيدنا محمد وعلى أله وصحبه أجمعين ، رب أشرح لى صدرى ويسر لى أمرى وأحلل عقده من لسانى يفقهوا قولى ، سبحانك لا علم لنا إلا ما علمتنا إنك انت العليم الحكيم
أما بعد
...
وبدأ الموسم الجامعى والدراسه من جديد ، وبدأ مسلسل الذنوب والمعاصى من جديد ، سواء من حب وعلاقات محرمه أو مخدرات وصحبه فاسده أو تبرج وملابس مثيرة ، وكل واحد مننا بيفكر هيعصى ربنا أزاى فى السنه الجديده ، إلا من رحم ربى

...
وعلشان كده تعالوا مع بعض نغير تفكيرنا السنه دى
ونكون حقا...

شباب مسلم


شباب بيحب ربنا ، بيغير على دينه ، بينصر سنة حبيبه صلى الله عليه وسلم.
ولازم كلنا نعرف ان (وحش الفساد) بيكبر وبيقوى ، وكل يوم بينضم ليه أعوان.
ولو سبناه يكبر أكيد هيأثر علينا أو على أحب الناس إلينا .

وعلشان كده مش لازم نسكت ، ولازم نقف فى وش هذا الوحش ،
يا أحنا يا هو...
جاهزين يا شباب الاسلام ويا بنات الاسلام لنصرة الدين؟؟؟


وبلاش بقى كلام كتير ونبدأ بالشغل العملى وتجهيز قوتنا وتوحيدها
فلنبدأ بسم الله
الوصايا العمليه :
1.الدعاء أولا وأخيرا ، لأننا لا حول لنا ولا قوة إلا بالله
وياريت ندعى بالدعاء ده فى كل صلاه ، اللهم أستخدمنا ولا تستبدلنا اللهم وأجعل النصر والتمكين على أيدينا ، اللهم أهدنا وأهدى بنا وأجعلنا سببا لمن أهتدى ، اللهم اهدى شباب المسلمين وأرزق بنات المسلمين العفه والطهاره و الحياء والحجاب.
2. قبل ما تنزل من بيتك صلى ركعتين لله بنيه قضاء حاجه إن ربنا يشرح صدرك وييسر لك أمرك .
3.حافظ على الصلاة فى جماعه وبالأخص فى الكليه ، ومترحش لوحدك لازم تاخد معاك 5 أو 6 ، وكل يوم تزن على ودان اللى حاوليك ، وشوف عدد الناس بيزيد معاك كل يوم ولا إيه ؟ ولو لقيت إن مفيش تقدم ، فجدد النيه ، وأستعن بالله وتذكرقول الله
((فَذَكِّرْ إِنَّمَا أَنتَ مُذَكِّرٌ21 لَّسْتَ عَلَيْهِم بِمُصَيْطِرٍ22))الغاشيه
ولو لقيت فى زياده وتقدم ، فأحمد الله وأسأله الزياده ، واحذر الكبر
4.جهز اسطوانات دعويه وكتيبات دينيه ، أو أطبع مقالات مفيده ووزعها على أصحابك .
5.أعرف أن الاسلوب اللين أفضل من الحق البين
فكن لينا مع من حولك ، وأستقبل كل الامور بإبتسامه مشرقه
6.فكر نفسك دائما إن دين ربنا منصور منصور ، فكن من السابقين ، واعرف ان التجارة مع الله كسبانه 100% فلا تحرم نفسك أن تكون من الرابحين.
7.أوعى تفقد الامل فى حد ممن حولك وتبطل تنصحه ، فأصرارك معاه وأسلوبك اللين وخوفك عليه أشد من السحر ، وتفائل دايما إن هيجى اليوم ويكون فى صفك.
8.فى كل مكان تكون فيه أتكلم عن ربنا ، وخلى شعارك ((وَجَعَلَنِي مُبَارَكاً أَيْنَ مَا كُنتُ ))
وفكر الناس دايما بالصلاه على النبى
،وأعرف ان كل ما تتكلم عن ربنا هييزيد إيمانك ، وبلاش تتكلم فى اللى معندكش بيه علم ، وأحذر الفتوى بدون علم.
9. أحرص على مصاحبه الملتزمين ، وحب كل الناس علشان الناس كلها تحبك ، وإياك ان تتكلم مع حد بجانب من التعالى أو الكبر ، وخلى دايما اسلوبك التواضع والحب والخوف من عذاب الله ، وبلاش تتكلم عن نفسك وتقول ده انا كنت بعمل وبسوى بس ربنا هدانى ، علشان الناس مبتحبش كده وعلشان متخلطش اخلاصك لله بعجب النفس أو حب الماضى.
10.أحرص على سماع كل يوم شريط أو درس ، وقيام الليل لأنه هو الوقت الوحيد اللى هتحس إنك بتتكلم من قلبك مع ربنا ، وده هيبقى دليلك بينك وبين نفسك يترى انت منافق ولا مؤمن.
11.تخيل كده انك طالع فى معركه وكل اللى معاك هرب ، وبقيت انت لوحدك وجها لوجه مع العدو ، فأثبت لعل الله أن يجعل النصر على ايديك .
يعنى مش علشان لوحدك تضعف ، فأثبت لربنا صدقك ، وكن على يقين ان ربنا هيبعتلك اللى يعينك.
12.الفساد شعاره (يا معانا يا علينا ) مفيش فى النص ، فقول حسبى الله ونعم الوكيل.
13.اسمع خطب وأقرأ كتير عن المخدرات والصحوبيه والتدخين والاستمناء
لأنها اكتر مشاكل الشباب انتشارا ، وعلشان تحفظ نفسك وتنصح غيرك
14.أختى المسلمة ، أعرفى إنك بعفافك ولبسك المحترم وحرصك على دينك ، هيخلوكى دايما الأغلى ، ومظهرك الخارجى هيخليكى داعيه لدينك بدون اى مجهود ، وأعرفى ان كل الشباب اللى بيجروا ورا البنات (الاستايل) على حسب القول ، وقت الجواز هيتمنوا يلاقوا ضفرك.
15.ممكن تجيلك أو يجيلك لحظات ضعف وفتور كتيره ، فأعلم ان التوكيل بتاعك واللى هيصلحك ، هو قيام الليل والانكسار والافتقار الى الله ، واعرف ان لحظة الضعف هى مجرد دقائق معدودة ، فمتخليهاش تضيعلك عمرك ، فأصبر وأحتسب.
16.الشاب ينصح الشباب ، والبنت تنصح البنات ، والعكس غير صحيح.
17.سابق كل المنطلقين الى الله ، وكن عمر بن الخطاب لهذه الامة
الذى دعا له رسول الله صلى الله عليه وسلم أن يعز به الاسلام ، اللهم أعزنا بالاسلام وأعز الاسلام بنا.
18.قبل اى خطوة تخطوها إستخر الله ، وأى أمر تحتار فيه ، أعرضه على قلبك وشوف هل يرضى الله ورسوله أم لا..
19.أعلن أسلامك وأعتز بألتزامك ، ومتتكسفش من الحق ، فمن أستحى من الله أستحى الله منه.
وأعرف ان كل الناس هتقفلك على الغلطة ، فمتزعلش لأن بقى ليك كذا رقيب يفكرك وينبهك لو غفلت، وقول للناس كلمة ابى بكر الصديق
إن رأيتمونى محسنا فأعينونى ، وإن رأيتمون معوجا فقومونى.
20.لو رسول الله جه فى الوقت ده ، وقال انا عايز أكرم أفضل عشر شباب وبنات مسلمين ، يترى هتكون منهم؟؟ ولو كنت منهم هتكون رقم كام؟؟
21.مصحف فى الجيب أكيد مش عيب ، فخلى سلاحك دايما معاك ، احنا فى معركه صعبه ومينفعش تمشى من غير سلاحك ولو لحظة
22.أعرف ان اللى اتهد فى سنين مش بيتبنى فى ايام ، فأصبر

فأبدأ السباق وأعلن شعار لن يسبقنى الى الله أحد.
.........
يترى بعد الكلام الكتير ده ، مين فينا اللى هيبقى راجل
وهيكتب عند ربنا
رجال صدقوا ما عاهدوا الله عليه
...........
خلص الكلام وبقى علينا الافعال ، اللهم أجعلنا ممن يستمعون القول فيتبعون أحسنه .
اللهم إنى أعوذ بك أن أذكرهم بك وأنساك ، اللهم انى أعوذ بك ان أكون جسرا يعبرون على الى الجنه وألقى انا فى النار.
ان وفقت فما توفيقى إلا بالله عليه توكلت وإليه أنيب ، وإن كان هناك خطأ فأنه منى ومن الشيطان الرجيم ، والله ورسوله براء منه
وصلى اللهم على سيدنا محمد وعلى أله وصحبه وسلم
واخر دعوانا ان الحمد لله رب العالمين
منقول لانى لقيت ان من واجبنا كلنا اننا نشارك ونعمل الكلام دة بجد وجزاكم الله خيرا