دي طبعا تكون بعد الصلاة الفرض على طول
يعني زي في اركان الاسلام الصلاة جت بعد الشهادتين على طول
ودا دليل على اهميتها وقدرها وقيمتها في الاسلام وعند ربنا سبحانه وتعالى ..
واكيد مافيش حد فينا مش عارف ثواب السنن الرواتب ..
لانه ثواب عظيم جدا ...
قال رسول الله صلى الله عليه وسلم "[ من صلى اثنتي عشرة ركعة ؛ بنى الله له بيتا في الجنة ] حديث صحيح
ياجماعة انتوا عارفين يعني ايه بيت في الجنة ...
تخيلوا ياجماعة لو حد غني وقالك لو عملتلي العمل الفلاني انا هديك بيت في ارقى منطقة
مش هنجري عشان نعمل الحاجة دي ... دا احنا ممكن ندفع نص عمرنا عشان البيت دا ...
ولله سبحانه المثل الاعلى ...
تخيل بقى ربنا الكريم العظيم سبحانه لما يوعدك ببيت في مكان ربنا سبحانه هو اللي مصممه
وكل يوم يتبنى لك بيت جديد ...
تخيل لما تدخل الجنة وتلاقي عندك مثلا تلاتين بيت ...
دول اجر صلاة النوافل اللي انت صليتهم في حياتك كلها ..
... وتبص على جارك تلاقي عنده 300 بيت مثلا ...
وكل بيت طبعا له شكل مختلف عن التاني
وكل بيت نعيم اجمل من التاني ...
شوف هتتحسر قد ايه ؟؟ هتندم قد ايه انك ماعملتش في الدنيا
عشان تمتلك البيوت دي ...
هتقول ياه لو كنت صليتهم في الدنيا كان زمان دلوقتي عندي
بيوت كتير قوي ... دول كانوا بس 12 ركعة
كانوا هيوفروا ليا نعيم هايل وعظيم ... بزمتك مش هتندم اشد الندم ...
مش احنا ياجماعة لما بنبقى عايزين نشتري حاجة بنفضل نجمع فلوس لها
وياه لما نجمع المبلغ ونشتري اللي احنا عايزينه ..
مش بتبقى فرحة كبيرة قوي قوي ...
طيب ليه مش بنجمع للجنة .. تخيل كل يوم لما تصلي السنن الرواتب
وبعد كل سنة تتخيل انت بنيت قد ايه من البيت ..
يعني صلاة الصبح صليت قبلها ركعتين ..
انت كدا بنيت الاساس ..
وبعدين صلاة الظهر الاربع اللي قبلها كدا بنيت العواميد ...
وبعد الظهر ركعتين كدا بنيت الجدران .. بس تخيل جدارن الجنة بقى
لبنة من فضة ولبنة من ذهب تخيل الاضاءة جوا البيت عاملة ازاي
وفي جدران على شكل الؤلؤة المجوفة .. وفي جدران شفافة بتعكس اللي برا ...
نقي بقى واختار وارسم شكل الجدران عايزها ازاي ....
وبعدين صلاة المغرب صليت الاتين اللي بعدها ...
كدا بنيت السقف ... ها عايزه متحرك ولاذهب ولا فضه ..
وبعدين صلاة العشاء صليت الاتنين اللي بعدها ...
اه ياسلام عيش بقى مع ديكور البيت الوان الجدران والزينة اللي عليها
وشوف بقى الانوار والنجف .. والشمعدانات ...
وهتعمل كام قودة .. وكل قودة هيبقى شكلها ايه ولونها ايه ..؟؟
تخيل قودة النوم والسفرة والصالة وتخيلي بقى المطبخ هيبقى ديكوره عامل ازاي
اكيد طبعا لا قبنوري ولا غيره دا هيبقى حاجة جنان مش هتطلعي منه اصلا ...
وتخيل بقى لما تدخل الجنة وتشوف تصميمك وتقول ايوة انا فاكر البيت دا
انا صمممته لما كنت عندي 20 سنة ودا صممته وانا عندي 35
وتخيل ربنا بقى بيضيف لهم الابداع والجمال ماهو اصلا الجنة دي حاجة فوق تصورنا
بس احنا بنتخيلها اجمل حاجة ممكن توصل ليها عقولنا ...
ها ياجماعة لسة حد هيفرط في اجمل حاجة ممكن يحصل عليها ....
حد ممكن يفرط في بيـــــــــــــــــــــــ ـــــــــــــــــــــــــ ــــــــــــــــــت في الجنة
دا السيدة اسيا امراة فرعون كانت عايشة في قصوووووور ونعيم وجمال العمارة وقتها
كان غير عادي ...
وقالت رب ابن لي عندك بيتا في الجنة ... كانت مستعدة تسيب القصور دي كلها
عشان بيت بس في الجنة ...
واحنا ربنا كل يوم بيدينا تذاكر لبيوت وقصور في الجنة ومعقولة نضيعها ومش نستغلها....
وعايزة اقولكم على حاجة مهمة كمان ...
مش معنى كلمة سنة يعني اننا مش نعملها او اننا نتهاون فيها ..
لا بالعكس دي كلمة سنة المفروض لما نسمعها دي تبقى في اولويتنا على طول
وبالذات لما تكون سنة مؤكدة والرسول بيعملها كل يوم ...
يبقى بما اننا بنقول اننا بنحب النبي عليه الصلاة والسلام وعايزين ننصره
وعايزين نشرب من يده الشريفه على الحوض وعايزينه يشفع لنا وعايزين نبقى جيرانه في الجنة
عايزين منه كل دا واحنا ماعملناش اقل حاجة هو كان بيعملها ...
ازاي عايزينه يعرفنا في الاخرة واحنا انكرناه وماعرفناش سنته ولا نفذناها في الدنيا ...
ياجماعة عايزين لما نسمع عن اي حاجة اسمها سنة
نعملها من غير مانفكر لان دي اللي هتقربنا من حبيبنا النبي عليه الصلاة والسلام ....
يلا ياشباب ويابنات عايزين وعد لنفسنا من النهاردة مش عايزين نسيب سنة ابدا ...
وكل يوم نفكر بيتنا في الجنة النهاردة شكله ايه ؟؟؟؟
وعايزين بقى نحسن ركوعها وسجودها علشان على قد حسن صلاتنا هتكون حسن بيوتنا ...
اشوفكم على خير ياشباب
ونتقابل في الجنة ان شاء الله
