زحمه يا دنيا زحمه .. زحمه ولاعادش رحمه ..
دى مش اغنية عدوية لا لا متفهمنيش غلط .. دى اغنية الشعب المصرى كله .. من كبيره لصغيره .. من فقيره لاغناه ..
كل شبر فالبلد بقى زحمه .. والله وكلمة زحمه دى قليله ..
مش هتكلم على افران العيش اللى هيقفلوها بسببى دى ... بس بجد اقف اتفرج كده على اى فرن عيش من بعيد وشوف المنظر .. الله روووعه تقولش سوق الخميس . .ياللا ما علينا هبعد عن الافران اهوه مليش دعوه " بس عايز اقول حاجه والله .. هما كانو قالو ان فصلو الانتاج عن التوزيع من كام يوم ومبقاش فى زحمه ولا طوابير .. بس عايزك وانت رايح كليتك ولا رايح شغلك ولا حتى نازل تستمشى .. ابقى القى نظره ثاقبه وبص المنظر الخلاب اللى جوه فرن العيش وابقى رد عليا "
المهم ملناش دعوه بحوار الافران ربنا يبعدنا عن التموين وما شابهها
خلينا فالاتنوبيسات .. يااااه على جمالها تبقى واقف اول الاتوبيس تبقى شايف اخره ..ده طبعا وانت واقف تحت على المحطه .. انما لما تركب الاتوبيس بقى ده عالم تانى .. لو شوفت قدامك ب 1 سم يبقى انت نظرك قوى جدا وفيه خاصية اختراق الاجسام .. والله يابنى تركب الاتوبيس من زحمته ممكن يخطر فبالك ان ده اخر اتوبيس هيعدى والهيئه هتقفل بعد كده .. وتيجى تبعت التذكره يقولك التذكره ب جنيه يا استاذ ..!! هو انت بتاخد كام جنيه عشان وانت رايح المحروق الشغل تدفع جنيه ..ياللا ما علينا ..
خلين بعيد يا عمونا عن الاتوبيسات لحسان لو هاجمتهم هييجى سواق الاتوبيس يشيلنى بالمحطه " بينقل الركاب بس للمستشفى
نبعد عن الافران وشغل العجينه والاتوبيسات وخلينا فاللحمه .. اكتر سلعه غذائيه موجوده فبلدك وسبحان الله رخيصه جدا .. ب 40 جنيه بس اقل نوووع ..بس الحكومه ربنا يخليهالنا وفرت لنا نوع لحمه جديد اسمه " اللحمه البرازيلى او المستورده " وطبعا اقنعو الشعب انها جامده جدا وفيها نفس القيم الغذائيه .. بس على مين ده انا حمو يا ولا .. ده حاميها حراميها .. وعلى عينك يا تاجر .. ما قدامك اللحمه متلجه بقالها اد خمناشر تمناشر سنه ..يعنى بالعقل بعيد عن اى نتايج علميه والشغل ده اكيد مش تمام يعنى .. ومن سعرها واضح .. لما يكون الكيلو مش اغلى من 20 جنيه !!!
ولو ربنا كرمك بمرتب الشهر واتهبلت تشترى كيلو من الطازه اللى بيبقى متعلق قدام عينك ليل نهار وانت باصص من بلكونة بيتكم ..تنزل للجزار والنبى يا حج ادينى كيلو من البتاعه دى .. هيبصلك بقرف اكيد .. اصله اول مره يشوف الخلقه دى عنده فالمحل .. اصلها اول مره تاكل لحمه طازه بعد ما اللحمه بقت اد مرتبك وشوية كمان المهم بصلك بقرف برده وقالك اؤمر .. قولت له كيلو من البتاعه اللى متعلقه دى .. قالك راجل طول بعرض تاخد كيلو بس وفسرك بتقول :" هو انا قادر اجيب كيلو لما هجيب اتنين استر عليا " لكن بشياكه بترد :اصل يا حج مفيش غيرى انا والمدام بس والمدام ملهاش فاللحمه وانا واخد الكيلو كله ليا " كداااااااااب اوى .. هى ملهاش فيها لانها نسيت شكلها على ايدك " المهم المهم بلاش نجيب فسيرت الناس وابعدنا عن اللحمه اللى 90% من الشعب نسى شكلها والباقى ميعرفش انت بتقول ايه اساسا .. ولو فكرت وربنا لهمك شوية عقل وقولت مالها لحمة الجمعيه اللى هى " النيل " عارفها اكيد .. يبقى هتقف ساعتين تلاته ده لو الجمعيه فاضيه بس هتقف عشان الجزار بتاع الجمعيه بيشرب كوباية الشاى مش عاجبك روح اشترى من حته تانيه . .ولو زحمه بقى ابقى قولهم فالبيت هتتاخر كام يوم بس ..
ههههههههههههههههه عجايب والله
ابعدنا بقى عن جو اللحمه والعيش والطفاسه دى وخلينا نروح شغلنا والنبى .. لو معاك عربيه المفترض فكل دول العالم وده الطبيعى انك توصل شغلك فزمن معقول يعنى لو بعيد ب 20 محطه حتى هتوصل فى 15 ساعه .. لا احنا بتوع الجديد واحنا اللى دهنا الهوا دوكووو .. لو شغلك جمب بيتك ب 4 محطات توصل فى 30 ساعه ولو ابعد من كده خليك بايت فالشغل ..هههههههه .. دى نظريه حديثه العالم كله معرفش يطبقها .. نحن ننفرد بالنظريات الحديثه .ههههه ..ياللا ما علينا .. " المهم .. تقريبا 50% بس من السيارات اللى فمصر هى اللى بتتحرك فالبلد " يعنى الزحمه دى كلها على 50% بس من العربيات " يعنى لو كل اصحاب العربيات طلبت معاهم ينزلو مره واحده سرعة السيارات هتوصل صفر !! .. ودى حاجه تانيه كانت جات فالجرايد من كام سنه ان سرعة السيارات فالقاهره فى عام 2010 هتوصل السرعه لـ صفر /كم فى الساعه !! كلام جرايد والله !! اكيد كدب .. مع انها حقيقه والله . .
ماعلينا ..شوفت احنا فى ايه ووصلنا لحد فين .. بس غمض عشان تعيش !! ده القانون المصرى ..
والله يا جماعه دى مش نكته ولا حاجه لقيتها فقصص ميكى وبطوط وعم بلبل .. لا والله دى حاجه لقيتها فبالى وفبالك وفبال كل واحد بيشوف المناظر دى كل يوم
بجد انا مصرى وبحبها .. لكن انا مش بحب ظلم الناس اللى فيها بلا تحديد ..ربنا يرحمنا بقى .. ويا يرحمنا وياخدنا .. يا يرحمنا برده وياخدهم
ياللا سلام
كملو فى الكوره بئه
