زوجة الطبيب"من خواطر: عصام الدين محمد الزجلية"
زوجة الطبيب
دكتورنا حتة سكرة
علم وثقافة ومفخرة
كل اللي زاره فـ عيادته
يطلع بالخير يجيب سيرته
ويرفع ايده ويدعيله
ويقول يارب زيده وأديله
من سنة صاحبنا أتأهل
عروسة حلوة جمالها يهبل
وهنروح لبعيد بقي علي أيه
ما هي ناني بنت محروس بيه
رجل اعمال اسمه مسمع
غني فاحش نجمه بيلمع
البنت طبعا حيلة ودلوعة
مفيش حاجة عندها ممنوعة
كتير اشتكت لبابي ومامي
من غياب جوزها الدكتور رامي
هيضيع ليه زهرة عمري
ده شبابنا ايامه بتجري
الصبح قال في المستشفي
وفـ عيادته بيسهر وبيشقي
رامي الطب عنده رسالة
ميقدرش يطنش ولا حالة
بيعالج المريض ويواسي أهله
قاصد الثواب يوم يرجعله
فـ يوم ناني راحت زارته
دفعت كشف ودخلتله
وطبعا دفعت مستعجل
دفع الفلوس عندها اسهل
شافها رامي واتجنن
مش اولي مريض يدخل احسن
دي دقيقة ممكن تنقذ حياة
سيبك من شغل اللامبالاة
زعل عليها قامت طالعة
وحلفت للبيت ما هي راجعة
وقعد الشيطان يلعب بيها
ملاها أحزان بكي عنيها
وقلبها من جوة مولع
ويوسوس بحاجات بردو تضيع
يقولها ما تسيبك منه
ده حتي انتي مش من سنه
كبر وخلاص وعواطفه بردت
وشباب حلوة عليكي ياما جريت
أخرهم كان توتو أسامة
رفضك له عذبه ياما
وفضلتي سي رامي عليه
وأديكي بقيتي لعبة فـ أديه
اتصلي عليه وليه حيرتك
ده هو اللي هيعرف قيمتك
آلو توتو أنا ناني
الفرحة ياناس مش سايعاني
تعالي انا عايزاك دلوقتي
روحي ملكك وكمان وقتي
قضت نهارها تتفسح
ويا سي توتو اللي اتبحبح
وطمع فـ ميعاد يقابلها
طبعا في فيلة سعادتها
وقالها لو معندكيش مانع
ما تيجي دلوقتي وانا راجع
رفضت ناني اصل ضميرها
واقف قصادها يحاسبها
وقامت ماشية وراجعة بيتها
لقيت جوزها واقف قدامها
باس علي راسها وصالحها
ومعاه هدية وبيطلب سماحها
ناني قالتله كان ممكن اسامح
لو شئ عارض وبعدين رايح
لكن دي مشكلة أبدية
بتتكرر يوماتي ياعنية
اختار بيني وبين الطب
عايزة ارتاح من تعب القلب
رامي احتار والفكر شاغله
الطب كان دايما حلمه
ولما ييجي يوم يتحقق
يسيبه من غير ما يدقق
ويروح يشتغل عند باباها
ووقته يتوفر لهواها
طيب والناس المرضي
تفتكروا عن كدة راح ترضي
قولولي انتوا يعمل ايه
بس ياريت حلكوا يرضية
ويحقق عنده الموازنة
ويخرج من هم الأزمة
************
من خواطر: عصام الدين محمد الزجلية
