محاكاة لرباعيات صلاح جاهين " من كلمات عصام الدين محمد "
من كلمات عصام الدين محمد "عصام قمر"
جريت وراها سنين وهي رفضاني
شكيت لحصا الأرض والقلب بيعاني
ولما العصفور خلاص بقي فـ اليد
لا بقيت طايقها أنا ولا هي طيقاني
حبيبتي زي الدنيا ما تديش اللي طالبها
طول ما هجنن عليها بردو ولا عاجبها
ولما غلبني اليأس وزهدت انا فالهوي
دلوقتي قال بتغازلني وتلعب حواجبها
فيروسات الأنفلونزا بأنواعها علينا بتنشن
عميتوا يافيروسات طب م اليهود احسن
صحيح عندنا ذنوب كتير أوي ونستاهل
طب واليهود أخلاقهم بالذمة مش أعفن؟
قاعده متنكة والدنيا بتحلالك
من يوم مجوزتي اللي علبالك
طب ياهل تري انتي علي باله
وموفي لهواه زي ماهو حالك؟!
ضفدعة طول الليل صوتها مصدعنا
سألني ابني البرئ:صوتها له معني؟
قولتله الست والدتك أدري إسألها
قالتله بتنادي وليفها وابوك مضيعنا
النجم في السما بيلمع وله وقت يكون آفل
دور علي النور يامجدع ليه دايما كده غافل
لو حتي نقطة ضوء واحدة اغرسها ونميها
وافتح للنور طاقه وبلاش علطول كده قافل
ياحلوة ياللي الحلق هياكل من الخدود حتة
قلبي في هواكي انفلق وانقطع ميتين حتة
فرجتي عليا شباب وبنات وكبار أهل الحارة
وكل العذاب ده ولا طلتش انا منك ولا حتة
