غريب طبعك ياإنسان دايما مش راضي بحالك
وتبص عاللي فأيد غيرك والشح كمان يحلالك
فاكر انك هتاخد اكتر من اللي ربك كاتبهولك
حسدك فجسدك ياجاهل د انت خليفة عاي مالك
الحلوة ماشية بتتمخطر سحرت عيون الخلق
وبقوا يدعكوا فعنيهم جامد كأنه خطفها البرق
وانت ياللي راعيها حسابك في الآخرة عسير
ولو يحكموني عليك فالدنيا أحكم عليك بالشنق
مصيبة وحطت علينا من أي دهية إنحدف
وظيفته رئيس مدينة والكل منه في قرف
لسان سليط شغال تخبيط قلب قاسي متحجر
غلبان جه يقبض أجره لقاه خصمه ولم صرف
قالها: تعالي نتفق يوم رايق ويوم للنكد
جدران حياتنا علي وشك يصيبها الهدد
اليوم الرايق جه ولقاها بترقص وبتغني
والفرحة باينة عليها وبتقول بكرة النكد
قلبي يفتح بابه لكل اللي فقلبه حنان
ويطرد من برة برة كل سليط لسان
ومين يقدر يعيش مع اللي قلبه قاسي
تنفر منه الخلايق ملايكة وانس وجان
كان نفسي أبقي زي القمر وكل الجميلات تهواني
أدوبهم في عشق وسهر وأرويهم من بحر حناني
سمعني حكيم قالي: الحلاوة حلاوة الروح ياروميو
وكلمة حلوة من القلب وخفة دم تحققلك كل الأماني
انفق عالغلابة يابخيل قبل ما يجيلك يوم
ثروتك يملكها غيرك وتعيش ذليل محروم
ويوم القيامة تترجي وتقول ربي ارجعون
لعلي اعمل صالحا.. مينفعش ساعتها اللوم
جمهورنا راح السودان يشجع المنتخب
اضربوا بالمطاوي وشافوا هناك العجب
فئة قليلة من الجزائريين مش شعب كامل
لا تعرف معني لعروبة ولا تعرف الأدب
كلب عبيط قال لقطة: ما تيجي نتجوز
بصتله من تحت لفوق وشكلها مبوز
قالها: هنخلف كلب مقطقط مفيش زيه
قالتله:أو قطة بنت كلب سيبني اتعوذ
راجعة لأبوها متأخرة سألها بتشرحله
وكان لسه بيوصف أدبها لحد من أهله
قالتله: ماشي جنبي شاب قعد يعاكسني
قالها:وأيه أخرك؟ردت: مشيته علي مهله
الآذان بيردد الله اكبر وصاحبنا عالقهوة
عينه عالرايحة والجاية بنظرة فيها شهوة
شاف واحدة حلوة من ضهرها مشي وراها
ياحلو ياجميل لفت وشها طلعت مراته مروة
قال لأبوه: انا نفسي وبتمني أدخل الشرطة يابا
قاله : أخوك نجح بامتياز ومبقاش وكيل نيابة
لا الأمانة ولا الشطارة.. في زمانا تنفع يابني
عايشين في دنيا وحوش مفيهاش مكان للغلابة
