أمي كلمات عصام الدين محمد" مهداة الي روحها الطاهرة
الله يرحمك ياأمي برحمته الواسعة
حملتيني جواكي من الشهور تسعة
راعتيني بالحنان كبرتيني في أمان
لحد ما ثبتت أقدامي وقدرت أسعي
جميلك علي راسي ولو عشت دهور ما أوفي
بعدك ياما عشت بقاسي ولمين غيرك هشكي
كنت أجيلك وهمي وحزني يعصرني جوايا
وإنتي تحسي بشكوتي من قبل حتي مـ أحكي
إتغربت عنك سنين ودلوقتي إنتي اللي غبتي
بياخدني ليكي الحنين بيقتلني الشوق ياحبيبتي
لو أضمن أكون معاكي في جنة ربنا ونعيمه
تهون الدنيا وكل العمر ويسكن أمانك حيرتي
راعتيني بقلبك وعنيكي وإديكي وكل جوارحك
لسة فاكر نظرتك لما جيت بالحب أصارحك
بوستي جبيني وبحنان جوة حضنك يامه خبتيني
وقلتي حبيب كبر وبيحب وفرحانة كتير لفرحك
يارب إرحم أمي وإرفع في النعيم درجاتها
سكنها قصور الجنة أد ما عطت في حياتها
وقدرني بدعايا ليها أنول برضاها رضاك
حاسس ببركة حبها حواليا حتي بعد مماتها
أهديها لروح أمي بمناسبة عيد الأم
