خليك فى حالك ياعم الغلس انت
خليك فى حالك يا غلس
نتكلم بقي فى الموضوع.
يا جماعة موضوع الاعتداء على حرية الاخرين والتدخل فى شئون ملناش علاقة بيها ، وعدم
احترام اراء الآخرين ، والنميمة على اى حد حتى لو ماشي فى الشارع ومنعرفش عنه حاجة
بقت حاجة منتشرة وسخيفة قوى وغير محترمة .وانا اقصد بكلمة التعدى على حرية وحقوق
الاخرين الحقوق الدينية والدنيوية .يعنى مثلا الراجل اللى بيشرب سجاير فى اى مكان يدخله ،
دة واحد بيتعدى على حقوق الاخرين فى الراحة فى المكان اللى هما فيه، هما مش داخلين
عشان يتخنقوا او يتضروا صحيا.دى حاجه .
وحاجه تانيه .
الناس بقي اللى بتسأل فى اللى ملهاش فيه خالص دى يعنى مثلا.
1 / هو انت متجوزتش ليه لحد دلوقتى؟
2 / هو انت ليه سايب شعرك كده ؟ ده كبير أوى !
3/ هو انتى ليه بتحطى ميكاج
4/هو انتى مش محجبه ليه؟
5/هو انت ليه لابس كدة؟
6/هو انتى ليه متلبسيش اسدال؟ (الإسدال نوع من انواع الحجاب )
7/هو انت ليه متحاولش تبص كدة فى القرأن وتقارن بين الدين الاسلامى والمسيحى (الاسئلة
فى الموضوع دة كتيرة اوى اوى واشكالها مختلفة)
8/الست دى ماشية كدة ليه؟
9/هو الراجل دة لابس كدة ليه؟
10/ايه دة ايه حد فى الدنيا يلبس احمر على ازرق؟ دة طبعا واحد بينم على واحد ميعرفوش
اصلا .
11/هو ليه مش بيشترى هدوم كتير ويغير فى لبسه؟
12/دى اكيد بنت قليلة الادب طالما ماشية مع اولاد؟ (وطبعا ممكن تكون ياعينى ماشية مع
اخوها ولا خطيبها ولا جوزها )
13/هو انتوا ليه اتطلقتوا؟
14/ ولما تيجى تتكلم فى الموبيل تلاقي واحد متعرفوش اصلا بيقللك كنت بتكلم مين؟
15/ هى ليه بتتكلم فى التليفون وهى ماشية فى الشارع ؟.. يا عم دى بتتمنظر علينا، آل
يعنى محدش غيرها معاه موبايل. (على اساس انه متأكد انها بتتكلم عشان تغيظه مثلا)
16/انت ليه بتحب النوع دة من المزيكا ؟ (سؤال غبي طبعا)
17/انت ليه مدايق اوى كدة ؟ (ولو قال مثلا مفيش حاجة مدايقانى او قال معلش دى حاجة
خاصة اللى قدامه يزعل ويتخنق ويقول دة بيتكبر عليا مع إن تبقي ممكن علاقتهم مكملتش اسبوع)
18/انتى ليه تخينة اوى كدة ؟ ( متخسي)
او انت ليه رفيع اوى كدة ؟ (انتى لازم تتخن شوية
مع ان اللى بيقول كدة دة ممكن يكون مفيش علاقة بتربطه باللى قدامه ابدا )
19/انتى ليه صابغة شعرك اللون الغبي دة؟ (طبعا هنا مفيش احترام للاذواق خالص)
20/هو انتى او انت مرتبط ؟؟ (بردو ممكن حد حشري يسألك السؤال دة وهو ملوش علاقة بيك
ولا حاجة خالص)
21/انت على فكر رأيك متخلف جدا؟
(هنا طبعا مفيش اى احترام للاراء ودى جملة بس مختصرة فى اشكال كتيره من الكلام اللى
مفهوش احترام للاراء)
22/انت ليه مبتقلش السلام عليكم؟ ليه بتقول مساء الخير؟
دى بعض الجمل لو قعدت اقول فى جمل زى كده مش هخلص.
الجمل دة ممكن نقبلها من حد قريب قوى مننا ،انما مش من اى واحد كدة يسأل فى اى
حاجة.
دى حاجة حاجة التانية مهمة قوى بقي،سواقين التاكسي الرغايين اوى دول اللى الشكوى زادد
منهم قوى ، نفسي يرحموا أ نفسهم من التدخل،يعنى مثلا وحدة ولا واحد يركب معاه ،يبتدى
، هو انت بتشتغل ايه هو انت مش عارف ايه؟؟
هتقللي ناس طيبين وغلابه ، حأقول لك ماشى . بس ميتكلموش فى حاجات شخصية.
