سايق عليك الهبل
لاحقك منين ماتروح
ياللي انت غاوي الهبل
باب الهبل مفتوح
سايق عليكوا الهبل
فوق راسكواكالغيمه
يهد يوم عشكوا
وتاكلكوا بريمه
تعبنا من شكلكوا
وبجد ملينا
واحد ساكنلي ف شرم
والتاني في الخيمه
طبعا تسوق ف الهبل وتغني يا ابو الريش
وعليك بالبنوك اهبش ومنها تعيش
قدم ف مستندات مضروبة الضمانات
وبعدها التحويل لسويسرا وتفيش
سايق عليكو الهبل
واتعلم التهبيش
وازاى انا اعرف الاغى
لو ناس طالعلها ريش
قرشين هنا ومن هنا
والباقى للبقشيش
داولادى من غير عشا
أما الفطار فمافيش
سايق عليك الهبل
زودتى احباطى
بيليق عليك الهبل
من غير ماتحتاطى
والله دمك عسل
لما تسوقى الهبل
ونجيب عاليها ف واطيها
ولأمتى هانطاطى
سايق عليه الهــبل وقرفتني ف عيشتي
خليت حياتي مرار ، ســودتها ف وشي
والليل قلبته نهار ، مستني إيه ؟ إمشي
وعامللي سبع الدار إيـــاك ما ترجعشي
ســايق علينـا الهــبل ، والدم طــال الركب
والشعب جاله الملل وشبع كمان م الخطب
إتهد يا ابن الخـُلل وبلاش تقيد في الحطب
وان كنت زي الجبل ، فالميــَّة ليها العجب
سايق علينا الهبل ، والكرسي موش هاتدوم
غرقان في بحـر الأمل ، ماتفوق ويكفاك نوم
دا مهما طال الأجـــل ، الظلم موش هايسـود
ومصيره يوم الجمـل ، هاينخ مش هايقـــوم
ســاقوا علينا الهبــل وخـــدونا في مشامة
لا رحموا طفل صغير ولا حتى شيخ أعمى
خلوا حياتنا جحيم ، قلبوا النهــار ضلمــة
ربك يا شــَـيْما رحيم راح يكشـف الغمـــة
سايق عليكو الهبل لو حد يفتيـــــــــــــــني
فتح وحماس مش دول الاتنين فلسطيني؟
وشيعة وسنة وكرد مش برضه من بغداد ؟
ازاي دماهم تسيح بينهم دكاكيني
سايق عليك الهبل
لاحقك منين ماتروح
ياللي انت غاوي الهبل
باب الهبل مفتوح
