هما دول المصريين صعيدي غبي وفلاح جاهل !!
بسم الله الرحمن الرحيم
.:: اللهم صل وسلم وبارك على نبينا محمد وعلى آله وصحبه وسلم تسليما كثيرا ::.
السلام عليكم ورحمة الله وبركاته
إذيكم يا أحلي اخوه فى الله
يا رب تكونوا كلكم بخير وصحة وسلامة
أولا:أنا بعتذر علي العنوان الجارح للبعض و ليا انا شخصيا بس هتعرفوا أنا
ليه قلت كده لما تقروا الموضوع .
ثانيا :موضوعي النهارده أكيد واضح من عنوانه .
يعني لما بنشوف واحد بيعمل حاجه مش كويسة أو مش مودرن .
بنقوله : يــــــــــــاي إنت فلاح وبلدي خالص.
ولما نشوف واحد بيتصرف تصرف غبي
بنقوله:إنت صعيدي ولا إيه .
أنا بقي عايز أعرف مالهم الفلاحين ومالهم الصعايدة لو دورنا كويس
هنلاقي أصولنا كلنا يا إما فلاحين أو صعايدة لأن دول أصل المصريين
وكل العظماء المصريين كانوا فلاحين او صعايدة ولا إحنا علشان إتولدنا و عشنا
بعيد عنهم في المدن نبقي مش منهم .
ليه كل النكت يا إما علي الصعايدة يا إما عن الفلاحين .
طب ما مصر كلها أصلها يا صعايدة يا فلاحين يمكن يكون الأصل بعيد
شوية بس موجود ليه بنتكسف لو إحنا منهم نفسي أعرف مالهم وعلي فكرة العالم العربي كله بقى نكته
مرة واحد صعيدي .......أو مرة واحد بلديتنا ده إن مكنتش إترجمت ووصلت أمريكا .
ومشفتش أي دولة عربية غير مصر هي إللي النكت شغالة عليها
وعلي أهلها ودي حاجة تعيب في حق مصر لما نتكلم علي شعبها علي إنه يا إما صعيدي غبي
يا إما بلديتنا جاهل هو آه في الأول وفي الآخر ضحك وهزار بس بيجرح
البعض يبقي بلاش منها يعني بدل ما نقول واحد صعيدي نقول واحد غبي وبدل ما نقول واحد بلديتنا نقول واحد جاهل وخلاص وتبقي وصلت
فكرة النكته من غير ما نغلط في حد مع العلم إني مقصدش إن الصعيدي
غبي والفلاح جاهل لأن لو هما كده يبقي المصريين كلهم كده أنا بس بوضح الفكرة
إللي متاخده عنهم وأنا علي الحياد
لا انا من دول ولا من دول بس أكيد أصولي منهم
أنا في الأول وفي الآخرمواطن مصرى بيغير علي ولاد بلدها
ومحبش أبقي بره مصر وأسمع نكت من كل الناس علي أهل بلدي
أنا مقبلهاش لو إنت تقبلها روح للنكت دي ولو متقبلهاش ممكن زي ما قلت
نغير الألفاظ المستخدمة وهتدي نفس المعني والناس هتضحك برده بس مش
علي حساب حد .
أتمني إن فكرة الموضوع تكون عجبتكم وإللي ليه رأي تاني
ياريت يوضحه وإختلاف الرأي لا يفسد للود قضية بس متنسوش إن ربنا سبحانه
وتعالي قال:(لايسخر قوم من قوم عسي أن يكونوا خيرا منهم)
ومتقلوليش دي مش سخرية لأنها سخرية واضحة حتي لو كانت بالضحك .
مع أطيب الأمنيات الصادقة لكم جميعا
انا اسف جدا على العنوان بس لازم اوصل الفكره ازاى
يصراحه اخى مصطفى العنوان استفزنى جدا
ولكنى عندما قرأت فهمت ولكن ساقول لك شئ احنا المصريين كده بنتريق على روحنا ولكن هذا دليل الطيبه والنقاء كلنا نعلم ان عظماء مصر
كلهم فلاحين وصعايده الكتاب والعلماء والشعراء والمثقفين حتى معظم من كان فى الجيش وقت تحرير اراضينا كانوا من الفلاحين والصعايده هؤلاء الابطال
بجد موضوع يحترم على الرغم من عنوانه اشكرك مصطفى وننتظر المزيد
تقبل مرورى
