هى دى بنتى الوحيدة
اللى حببتنى فى البنات..
هى دى..
اللى هناك بتضحك
هى دى..
اللى هناك بتلعب
ولما روحى منى تتعب
تملا قلبى بالحاجات..
هى دى..
اللى هناك بتحلم
وفى عيونها غنوة حلوة
بس من خارج المقرر..
هى دى..
قبل ما الجهل اللى فى المنهج يقرر..
يقتل الروح البريئة
بالكتب والكراسات..
علموها فى المدرسة
ترطن لغات..
تحفظ النص الغبى
وتشرح معانى المفردات..
ترتعش إيديها فوق ورق الإجابة
لما تعرف إن ممكن حلمها
يضيع منها
على ربع درجة..
هى دى..
اللى بتغيب وتدبل
كل ما يهل علينا
موسم امتحانات..
هى دى..
اللى بتقرا فى كتاب التاريخ
عن معجزات..
وتبص ع الدنيا
تلخبطها الحقيقة
لما تلاقينا مطرودين م التاريخ
خارجين من كل البوابات..
