حرف واحد هيغير حال مصر ( معا لتغيير المادة 77 من الدستور ) مدد ----> مدة
عاوزين نشوف رؤساء مصر بيتغيروا قدامنا
أي رئيس لأي دولة بيبدأ فترة حكمه بحماس وبيكون سخن كده وعاوز يغير حال البلد للأحسن وينهض بالأمه ويقضي علي الفساد وأعوانه وعلي الحراميه
لكن بعد فتره من الحكم حماسه بيقل واحده واحده وبيبدأ في التقهقر للوراء
وبيكون أصحاب المصالح لفوا حواليه وعملوا معاه علاقات لخدمة مصالحهم
ومستشاريه والناس إللي حواليه بيفهموا دماغه وبيعرفوا يدخلوا له منين وممكن أوي يضحكوا عليه ويخدعوه
وواحده واحده الرئيس بيحس إن الناس بتوعه إللي حواليه والحاشية بتاعته هما السبب في إستمراره في السلطه ؛ مش الشعب ؛ عشان كده بيشوف مصالحهم ؛ بغض النظر عن مصالح الشعب
وكمان مافيش حد ممكن يكون عنده طاقه تستمر لمده اكتر من عشر سنين او 12 سنه بالكتير لحكم الدوله
ننتخب الرئيس لفترة رئاسية واحده ولو كان عاجبنا نديلة فتره كمان وشكرا علي كده ونشوف غيره
مصر فيها كتير ناس كويسين وممكن يحكموا البلد كويس
مدة الرئاسة ست سنوات ميلادية تبدأ من تاريخ إعلان نتيجة الإنتخابات ويجوز إعادة انتخاب رئيس الجمهورية لمدد أخري
ـــــ ــــــ ــــــ ــــــ ــــــ ــــــ ــــــ ــــــ
مدة الرئاسة ست سنوات ميلادية تبدأ من تاريخ إعلان نتيجة الإنتخابات ويجوز إعادة انتخاب رئيس الجمهورية لمدة أخري
هي دي الماده 77 اللي بنتكلم عنها
واخدين بالكم من الجملتين إللي فاتوا ؟
إيه الفرق بينهم؟
حرف واحد بس هو الفرق بينهم
هو ده التغيير إللي بنقول عليه .... حرف واحد بس
مدد -----> مدة
لازم بجد يكون ده هدف المصريين كلهم اليومين دول
كلنا لازم نتوحد نحو هذا الهدف
تعديل الماده 77 من الدستور
لازم نضغط علي النظام الحاكم
في كل حته نتكلم عن الموضوع ده ويبقي هو هدف الشعب وبعد كده إتفرجوا علي البلد بعد عشرين تلاتين سنه
هتكون دولة متقدمة إن شاء الله
عاوزين نشوف فلان .... الرئيس المصري السابق وفلان .... الرئيس المصري الأسبق
وكل رئيس جديد هيدي للبلد زقه
والرئيس ... أي رئيس هيخاف بعد كده يعمل حاجه غلط عشان هو عارف إنه في يوم من الأيام هيسيب السلطه وممكن يتحاسب بعد ما يكون الرئيس السابق (يعني مواطن عادي) ؛ لكن طول ماهو عارف إنه كده كده هيفضل رئيس لحد مايموت (وماحدش طبعا هيحاسب الرئيس) هيعمل إللي هو عاوزه
الماده 77 دي كانت في دستور 1971 اللي مستمرين بالعمل به لحد دلوقتي ؛ كانت بتقول مده واحده مش مدد لكن تم تغييرها سنة 1980 لتكون مدد بدلا من مده ؛ عاوزين نرجعها تاني لأصلها
تعديل المادة 77 يكون بشرط
ان تصاغ بحيث لايمكن تغييرها بتاتا بعد كده
لا يمكن تغييرها مره اخري مطلقا
ولازم الدستور ينص علي كده .... ينص علي عدم تغيير الماده 77 (بعد تعديلها) مهما كانت الظروف وبأي طريقة
عشان مايجيش رئيس يغيرهالنا وفي نهاية فترة ولايتة التانية يجي يغيرها تاني ويرجعها زي ما كانت ويقول الشعب عايز كده
