صباحك يا مصر زى وشك ...!!!
صباحك يا مصر زى وشك ...!!!
صباحك يامصر زى وشك جميل وحزين
ياللى وجعت القلب على حسك سنين وسنين
عاشقة يامصر ترابك الحنة
نفسى يامصر تعودى زى زمان كما الجنة
فاكرة يامصر "صباحك الوردى اجمل صباح عندى"
اسمعها قبل ماروح الصبح مدرستى
قلبى يغنى يامصر يابنتى وحبيبتى
فاكرة يامصر "المريلة الكحلى"
وشاب اسمر عيونه من بعيد لبعيد تلمح لى
تشغل الاغنية حلوة تصرح لى
الرقة دايبة فى الخجل والذوق
امشى بثبات مطمنة ورافعة راسى لفوق
فاكرة يامصر رغيفك البلدى
كما وجه بنت صبوح بقلب رقيق ومتندى
امشى فشوارعك متذوقة نضيفة
الناس ببساطتها عمال فتراحيلها
فلاح ومحنى لها وصنايعية حريفة
دكتور مهندس صيت عابر بلاد وبلاد
وبنات بخيرهم فأى بلاد تصون اعراض
اسمع " يا احلى البلاد يابلادى" اغنى واغنى
ارقص وانط وقلبى سعيد لبكرة الحلو مستنى
احضن دروسى وعيلتى وجيرانى
ميهمنيش ان كان ده مسلم ولا نصرانى
انا اصلى من المنصورة والعزة واخدانى
آآهين يامصر عاللى باحسه دلوقت
دانا بابكى لوغنوا نفس الغنوة من ضيقتى
باشوف عيونى مش عيونى ولا هى دى مرايتى
ولاهى دى مصرنا ولاهى دى نهايتى
ابكى تهزنى ايد الصغير امسح على شعره
اشوفه عودة لحكايتى
مسكين ماهوش دارى باللى مستنيه
ياماكان فى نفسى ارشقه فالارض زرع ارويه
الارض بارت والولاد زى العيدان الخضر
عاشقة يامصر ترابك بس شايفة الغدر
خايفة على عيون الصغار من العسس ومن الضلام والقُدْر
خايفة ولسه بحلم ييجى على ولادى
هوا بلادى ويملا الصدر
وتطبطب عليهم ارضنا وسمانا والقمرة
ويغنيلهم "منير" فى عشق البنات "والمريلة الكحلى" و"الليلة ياسمرة"
1-العنوان مقتبس من مقال بلال فضل( صباحك يا مصر زى وشك )
2-يابنت يامو المريله كحلى يا شمس هاله و طاله م الكوله لو قلت عنك ف الغزل قوله ممنوع عليا ولا مسموح لى (أغنية صلاح جاهين يغنيها منير )
منقول مما راق لى
