ردا على قصيده مكر النساء لاكرام مجاور
يلى انت بتحذرنا من صنف الحريم
معاك انا ان كيدهن عظيم
لكن قولى بقى هم النسا خاينين؟
يعنى الرجاله كده أبرياء مساكين؟
طيب وايه رأيك فى المثل اللى قال
آل ايه يامئامنه يختى للرجال
مين قال كل واحده تحبك من الستات
تجرى وراك؟ ماياما جريتوا بالكيلوات
وقولتوا تعبنا والله وبقالنا زمان
مقضيينها معاكسه ومحايلات
ولما تعبتوا وجربتوا كل الحيل
زهقتوا وسألتوا ياناس ايه العمل؟
يلى انت جاى بتشتكى وتقول ظالمين
ارجع بتفكيرك كده سنين وسنين
وشوف حفيت لحد ماتنول الرضى
وكان عقلك فين؟؟
دلوقتى راجع تشتكى وتبص وراك
وتقول ياريت اللى حصل كله ماكان
وتقول ياريت يرجع بقى بيا الزمان
قولى بقى وسؤال مريح
والرد منك يبقى صريح
لو يرجع دلوقتى بيك الزمن
هتتجوز ولا تعيش حر
ياعم عشان تدوق الحلو
لازم وربى تدوق المُر
ما قولتليش........
هتغير رأيك ولا مُصِر؟
