قصيدة (واحد معرفوش اسمه أشرف محمد
)
قصيدة (واحد معرفوش اسمه أشرف محمد )
....مش صدفه انك جاي برجليك للشارع
علشان تحرق السنتي الفاضل من دمك
وتخزق عينك الورقه السلوفان
من جوه قزاز البتارين
بتتحدي با لرقم المكتوب ...كل جيوبك ورجولتك
بتطل صوابع رجلك
من بوز الجزمه تقولك : بقي يعني مش مكسوف
للمره ال. مش عارف كام بتركب نص النعل
بيحز ف نفس الأسفلت انك مش واخد بالك
شكلك بايخ جدا وانت بتتغابي
وتوارب وشك ...من نعل الجزمه الدهبان
******
******
الساعه لسه مجتش اتناشر
والأوضه أسقع بكتير م الشارع
مع انك داقق ف الشباك ...علبة مسامير ف مشمع
غريبه ان الصراصير ما بتسقعش
وبتخطف من بعض ... آخر تفه ببلغم لزقت منك ف الحيط
بيفرفر قلبك جواك م الكحه
وبتلعن يوم ما عرفت الجوزه
وبتترحم علي أيام البلمونت الفرط
وتعض اسنانك الصفرا ...علي خد مخده أم الوش الجربان
برضه مش جايلك نوم
عماله تز غزغ فيك البراغيت ... وتبص لبعضيها وتصّعب !!!
عماّله تقرص فيك ولا فيش....... ولا حتي نقطة دم
عوّ لت البراغيت الهم !!!!!!!!!!!!!!!!!!!!!!!
واهى زيك مش عارفه تنام ...مع انك قلت لها كل الحواديت !!!!!!!!!!!!!!!!
...... من تاني تفرك بايدك ف عنيك
ولعاشر مرّه ....بتفليّ ورق الجورنان المد قوق ع الحيط
نفس المطرب أبو دم تقيل ...بيّطلع للخلق لسانه ...وبيعلن عن ألبومه الهلس
نفس البنت الهايفه اياها ...بنفس الضحكه الصفرا ايا ها
بتعلن وبكل وقاحه عن الفوط ايا ها
من غيظك بتشق الورقه برجلك
تلمح (بقايه) بتعمل زي الناس في الفاضل من فوطة وشك
نص الكبايه الفاضل فاضي !!!!!!!!!!!!!!
مش قادره المساحيق الكدب تداري العمر اللي اتكرمش
تداوي الجرح اللي ما لمّش
بيحز ف نفسك ...كل الكتب المرصوصه ف كراتين جوّه دماغك .....
وتحت الكنبه (السنط)اللي واكلها السوس ...وبقت بتلات رجلين
بيحز ف نفسك ...حتي صوابع ستك ف الحلم ف شعرك .........
معد تش تعسسّ وتنقي القلق الساكن جوّاك
العجز مليك
عطشانه الروح بتعافر علي بلة ريق
مش كل جواب ينفع تقراه من عنوانه
مكبوسه السكه بعتمة عفاريت !!!!!!!!!!!!!!!!
ولا تملك غير انك تسكت وتصبّر نفسك
وآخرتها يا آخر برج ف راسي ...حتي انت كمان ها تطير ؟؟؟!!!
بتكلم نفسك ...محدش واخد باله منك غيرك
وكأنك عيل تاه ف الزحمه من امه
****
برضه الساعه لسه مجتش اتناشر
شايلاك رجليك ...واخداك من تاني علي نفس الشارع
نفس الراجل ....بشنبه ودقنه البيضا...بيطلع لك ف لسانه ..من برّه وجوّه قزاز البتارين
ويفتح لك عين ويغمض عين
طب حاول ترسم زي زمان ...با لطياشير المسروق م الفصل ......
تحت اليافطه النايلو قلب وسهم وحرفين ؟؟؟
السيراميك المايع بيزحلق ايدك منك
ياخي عيب علي حد ف سنك
ويجيك الصوت ...من جوّه قزاز البتارين :غريبه انك لسه حمار ..........
لأنك معرفتش لسه ...مفهمتش لسه ...ان الساعه خلاص مبقتش اتناشر ....!!!!
وانك برّه العام والعالم ...وانك برّه العام والعالم ....وانك برّه العام والعالم !!!!!!!!!!!
********************************************
