إوعديني ... أحمد سعيد موسى
إوعديني
..
.
إوعديني لمّا نبعد
متلوميش ع الذكريات
إوعديني تشطبيني
من سجِلّ الأمنيات
إللي بنّا صفحه عدِّت
ماضي باكي وحلم مات
الجراح كات منَّا فينا
كنا بنفكر ف بكره
واحنا يومنا كان ناسينا
كات بتخدعنا المرايه
كات بترسم لينا ضحكه
لما نغرق ف الدموع
إوعي تبكي ف يوم عليا
ولّا تتمني الرجوع
اضحكي الضحكه البريئه
الفراق والموت حبيبتي
صعب لكن دي الحقيقه
إنكتب نحلم ونبدأ
نركب الأمواج ونسبق
جوه بحر اليأس نرشق
والأماني تموت غريقه
كنّا بنعاند زمنّا
من بداية ما اتقابلنا
كنا بنحاول نجازف
والزمان كان اقوى منّا
إتهزمنا في المحاوله
بس يمكن لسه جوله
طول ما فينا الروح يا دنيا
مش هنعلن إنسحابنا
مهما كان العمر نازف
القلوب ممكن تجازف
تجمع الأحلام وتشرب
ف الطريق نخب انتصارنا
وان عجزنا
والقدر كان اقوي منّا
قولي حاول
وابقي سامحي
عيشي يومك جنب جرحي
وارسميني بشكل تاني
غيّري تقاطيع ملامحي
إرسميني نجمه حالفه
تنتهي وهيا ف مدارك
والا شمعه ف وسط تورته
تتحرق يوم عيد ميلادك
وان قابلتك مرَّه صدفه
قابلي قلبي بابتسامه
م انتي ساكنه جوه مني
من هنا ليوم القيامه
وان لاموكي ف مره قولي
أي حاجة
بس إوعي تنكريني
قولي كان مجنون عرفته
قولي شاعر كان هاويني
كان بيبكي لجل أضحك
وارسم البسمه ف جبيني
أي حاجه .. أي حاجه
بس إوعي تنكريني
واوعي تنسي الفاتحه يمكن
جوه قبري
ترحميني
توعديني ؟؟
...
.
شعر / أحمد سعيد موسى
