السلام عليكم ورحمه الله وبركاته
من اجمل الكلمات اللى لو اتمسكنا بمعانيها حنعيش احلى حياه
حلو اوى لما حد يضايقك وتستغفر ربنا وبعد كده تقابله بابتسامه جميله منها انك مكتسبتش عداوه انما انت كسبت حب ربنا ومره على مره حتكسب اللى ضايقك فى يوم
ويا سلام لو اغتابك مثلا وعرفت وكان رد فعلك انك مش عاتبته لا دانت اديته هديه جميله على فكره الهديه دى حتكون مش حاجه غريبه لا دى ليها مغزى جميل جدا لما هو مثلا اتكلم عليك انت خدت حسنات من كلامه ده وطبعا ده دليل ان ربنا بيحبك فتشكر ربنا ازاى على الحسنات اللى جاتلك من غير مجهود تديله هديه وتقابل الاساءه بالاحسان
"وده حصل مع الحسن البصرى "
اللى جربه هيفهم معنى مقابله الاساءه بالحسان بس اللى عايزه اقوله ان الواحد فينا لازم يكون متسامح
تسامح حد زعلك ....حد ضايقك.....حد سببلك جرح
لانك لو سامحت ربنا هيحبك وهتقدر تعيش لانك مش حتبقى زعلان يعنى لما نسامح احنا اللى هنرتاح
جرب كده لو حد جرحك تتصل بيه او تروحله بيته وتدخل عليه باجمل ابتسامه وده مش ضعف شخصيه ولا موقفك ضعيف او انت قليل لا دانت اكبر بكتير وعندك تمسك باخلاق حبيبنا المصطفى "صلى الله عليه وسلم"
هو هيستغرب شويه بس بعد كده ممكن تبقى انت سبب بانه ميجرحش حد تانى بعدك ويا سلام بقى لما تشوف نتيجه ابتسامه ومبادره جميله منك
ممكن تبقى فى الدنيا بان حال الشخص ده يتغير
وممكن فى الاخره تبقو سبب دخول بعض الجنه
والله التسامح ده جميل جدا
وبيخلى فى قلوبنا رحمه وخير
وكانك ورده عبيرها يحسه كل اللى حواليك قريب كان او بعيد
وممكن تبقى سبب سعاده اللى حواليك
والحب هيملى قلوب الناس والخير يملى الكون
ياريت تبقى قلوبنا كبيره ونرحم نفسنا بالتسامح
دلوقتى لو كنت زعلت من حد انا مسامحاه من قلبى
ولو كنت ضايقت او زعلت منى حد ياريت يسامحنى ولو كان اسلوبى او طريقتى فى الكلام زعلت حد منى يسامحنى ولو حد شايف فيا عيب يقولهولى وانا هحاول اصلحه باذن الله
انا اسفه ان الكلام مش لغه عربيه ولا فى ايات قرانيه ولا فى احاديث
حبيت بس اوصل كلام نفسى اقوله
