إنت يابنـــــــــــــى !!!!!
السلام عليكم ورحمة الله وبركاته
..............
حاسس إنى مفتقد والدى جدا عشان كدا هكتب اللى جوايا وأعبر
دايما فى الأفلام والمسلسلات اللى إحنا بنشوفها ربنا يهدينا بنلاقى راجل كبير فوق الخمسين سنه شعره بدأ يبيض قاعد فى مكان هادى كدا هو وإبنه وبيتكلم بكل حكمه : يا إبنــــــــــــــــى ....
بصراحه وقفت مع نفسى شويه كدا وإفتكرت إصحابى وهم بيحكوا كل واحد عن أبوه وإزاى بقى خنيق وبيدخل فى كل حاجه ومش سايبه براحته وإزاى ؟ وإزاى ؟
مش دى القضيه ؟؟
القضيه إنى رجعت بالذاكره شويه كدا وقولت هو أنا كام مرة قعدت فيها مع أبويا " بلاش بابا عشان متقولوش مدلع "
صحيح قعدت كتير جدا وهزرنا كتير سوا بس !!!
كــــــام مره إترميت فى حضنه وعيطت؟؟
كــــــام مرة قولتله إدعيلى محتاج دعاك؟؟
كــــــام مرة قولتله إنصحنى أعمل أيـــه؟
بيتهيألى لو جينا نعدهم هنعدهم بسهوله جدا ... صح ؟
طيب هو أنا ليه مبقاش أنا صاحب أبويا ؟؟
هما إصحابو أجدع منى فى حاجه ؟
ليــــه أخليه لما يكون مضايق من حاجة ييجى يحكيلى أنا الأول مش أى حد؟
ليـــــه ؟ منخرجش أنا وهو بس لوحدنا ونروح أى مكان وإمسك فى إيده زى زمان ما كنت بببقى بعيط عشان يمسك إيدى ؟؟
أقؤلكم على حاجه ..
والدى بيحب يلعب شطرنج وكان بيخرج يسهر بره وييجى ساعات متأخر
صحيح بنبقى عارفين هو فين .. بس ببقى نفسى ييجى يقعد فى البيت معانا
إتعلمت شطرنج وبقيت حريف جدا فيه
وجات فى مره قولته إنت على قدك فى الشطرنج دا ياعم إنت ؟
ضحك بسخريه كدا مغرور بقى فى اللعبه وقالى ماشى هاتى الشطرنج وانا الاعبك
وإشتريت واحد وجبته البيت وبقينا نلعب أنا وهو وبدأ يسهر معانا ونضحك ونقضى أجمل أيام
يـــــــــــاه فين أيام الشتا وأنا وهو وأمى على السرير تحت الباطنيه كدا ونشرب الشاى ونتفرج على التلفزيون
ووقعه هو وأمى فى بعض واقعد أضحك
يـــــــــــاه أنا لو فضلت أتكلم مش هقدر أخلص الكلام اللى فى قلبى لأبويا
بس أخر الكلام عشان مطولش عليكم
ياريت نقرب من أبائنا شويه
نصاحبهم
نحكيلهم على كل حاجه
ناخد نصيحتهم
لأن هييجى يوم وهنحتجهم ومش هنلاقيهم جنبنا
تَحَمَّـلْ عَـنْ أَبِيْـكَ الثِّقْـلَ يَوْمـاً فَـإِنَّ الشَّيْـخَ قَـدْ ضَعُفَـتْ قِـوَاهُ
أَتَـى بِـكَ عَـنْ قَضَـاءٍ لَمْ تُـرِدْهُ وَآثَـرَ أَنْ تَـفُـوزَ بِـمَـا حَـوَاهُ
يالله بقى كفايه كدا
مش عايز أطول عليكم
السلام عليكم
