يا عم انته خد بس قولى ليه نخلها ميطرحش قرشنات
وليه بناخد على قفانا هو احنا لا مؤخذه كنا هفيات
هو احنا مش رجاله برده زى ما بيقولوا ولا احنا حريم طلعلها شنبات
بتضحك طب ضحكنى من يوم مالضحكه راحت ووشى ميعرفش طريقها
و يوم ما رمونى وسبت بيتى وأرضى والضحكه من على وشى سرقها
واللقمه الحلوه الى كنت باكلها مغموسه وغرقانه جوه عرقها
لا عت لقيها معاك ولا عت لاقى مرقها
عارفه اول ما اقوم و أفتح عينى وافوق من نومى
وانفض فرشتى الحصيره يعنى وأقلب من عليها همومى
وافتح الشباك من اوضه عالسطوح واشوف نفسى فيكى ابقى عايز اطلع من هدومى
ليه جيبتينى ليه خلفتينى ليه خلتينى واحد من ولادك
ليه بتضحكى علينا عشان ما بتهينينا وتقوليلى دا احنا نبض الحياه جوه فؤادك
فوقى بقى بقيتى زى القطط تخلفى وفى الاخر تبلعى عيالك
متكدبيش انتى ياما سقتينى المر على انه شهد ياما عهتينى وخلفتى يجى الف عهد
ما خت منك غير المرمطه والا ايه احنا غاويين فى حبك ذل وشحططه
ومين يرضى يتهان عشان شوية كلام فاضى وشخبطه
ولا يهمك يا بلد ولا يهمهم كأن لامنك يا بلد ولا منهم هما حاجه واحنا حاجه
هما فهموكى صح واحنا مشيين فيكى بسذاجه
تقومى تهنينى وتسجنينى وأول ما ما تلمحيه تنزلى تبوسى رجل الخواجه
وارضك رخيصه بيبعوها برخص التراب
واهلك الى هما اهلك عيشين جواكى اغراب
ومستقبل ولادك وعمرنا الجى شايفه سما مضلمه ونور خافت وسط الضباب
فالحلم فيكى ممنوع والامل فيكى مقطوع والحق فيكى راح ورا الشمس
ومش مكتبلوا الرجوع
طب قوليلى ايه منظرك وعيل من عيالك بيمد ايده ويقول حاجه لله
واقف فى اشارتك يمسح عربياتك وف ليلك دمعته على خده
وانتى واقفه واقفه ليه ايه مستنياه
مستنيه ايه يقول بحبك طب ازاى اذا كان انتى خلفتيه وانته كرهاه
طب ازاى تبقى ام الدنيا وانتى مش عارفه تبقى امى
كنت بحيى العلم بس مش فاهم معلمتنيش حبك من صغر سنى
كنتى بتخوفينى بالعصايه وعرفت ان مسيرها تنكسر
ومسير الحق يرجع لو كسروا الاقلام واقطعو اللسان وخطفوا البصر
احنا معندناش حاجه نخسرها احنا خسرنا ياما مش هيبقى اكتر مالى انخسر
طب قوليلى ايه رايك وانا مرمى فى مزبلاتك قصدى مستشفياتك
عيان مريض مستنى العلاج وطبعا علاجى على نفقاتك
منا عارف ان الفقير من اهم اهتماماتك
ما هو لو مكنش من المهمين مكنتيش طفحتيه سمك وبلعتيه نفاياتك
