آية ... هتشاركوا معايا ولا ؟؟؟؟؟
السلام عليكم ورحمة الله وبركاته
...........
كل سنة وحضراتكم طيبين وأسأل الله تعالى أن يتقبل منا الصيام وان يبلغنا ليلة القدر..
فى الحقيقة هو الموضوع كان المفروض يتعمل من أول رمضان بس خير إن شاء الله
المهم ندخل بقى فى الموضوع علطول
طبعا كلنا بنقرأ قرآن فرمضان هو شهر القرآن
فينا اللى بيختم مرة كل 3 أيام وفينا اللى كل أسبوع وفينا اللى فى الشهر مرة
بس لازم طبعا نقرأ الجزء الخاص باليوم
والحمد لله معظمنا بيصلى التراويح
ومعظم المساجد بتصلى بالجزء الخاص باليوم سواء كله أو صفحات منه
إمبارح كان 12 رمضان وانا بصلى التراويح كان الشيخ بيقرأ فى الجزء 12 سورة يوسف عليه السلام
ففى آية شدتنى جدا
فلما روحت كتبت فى المذكرات بتاعتى اللى خطر فى بالى
وبعدين قولت هو ليه معملش موضوع زى كدا
وكل واحد فينا كل يوم يقول الآية اللى أثرت فيه فى اليوم دا والجزء دا
ويتكلم عنها ويشرحها لينا
عموما أنا هبدأ
بصراحة هو االشيخ اللى بصلى وراه صوت جميل جدا
وهو بيقرأ فى سورة يوسف وصل للآيه :
" قال ربى السجن أحب إلي مما يدعوننى إليه "
لقتنى بقول لنفسى يـــاه دا أحنا اليومين دول بنجرى ورا المعاصى
الشباب نفسها تكلم بنات والبنات نفسها تصاحب ولاد
وبنجرى ورا الشهوات لكن سيدنا يوسف إمتنع
هو أنا ليه مبقاش زى سيدنا يوسف وأعيش حياتى كدا
" ربى السجن أحب إلى "
بنت عايزة تكلمنى لأ السجن أحب إلى
واحد عايز يدبنى رشوة فى الشغل لأ السجن أحب إلي
الدنيا سجن المؤمن وجنة الكافر
لأ مش كدا وبس دا اللى أثر فيا جامد جدا وخلانى مش قادر أمسك نفسى
لما وصل لقولى تعالى " يَا صَاحِبَيِ السِّجْنِ أَأَرْبَابٌ مُّتَفَرِّقُونَ خَيْرٌ أَمِ اللّهُ الواحد القهار "
يعنى مش كمان إتسجن وسكت عليه السلام لأ دا كمان بيدعى لربنا فى السجن
دا الواحد فينا مثلا لما بيحصله موقف معين فى الشغل ويحاول يرضى ربنا فيطرد من الشغل "
بيبقى شايل هم الدنيا وساعات ممكن ميصليش
دى كانت الآية بتاعة الجزء بتاعة إمبارح
ياريت تدخلوا وكل واحد يقول ويشرحلنا ويقول اللى حاسس بيه
ربنا يوفقكوا إلى ما يحب ويرضى ..
السلام عليكم ورحمة الله وبركاته
