ياحبيبى انا كنت جارك وبجوارك
قايده نار الخوف فى قلبى وطافيه نارك
بعد ماامشى والقرار هيكون قرارك
مش هيسمع الا حد يكون جوارك
ياحبيبى اوعدنى دايما تبقى أحسن
انسى قسوة قلبى خالص واوعى تحزن
وافتكر أنا فرحى يكمل بانتصارك
واتعاهدنا وقلت ان دا كان قرارك
مهما يِِِقْدَم وقتنا والذكريات
إفتكر أنا كنت إيه منك وليك
إنت يابنى انا كنت أم تخاف عليك
كنت أختك كنت صاحبة لما تفرح وتلاقينى فى المرار
كنت لما تحب تحكى عارف انى سر جدا مش هزار
كنت لما أشوف سعاده جوا قلبك وف عيونك أيوه بفرح
واما احس انك هتغلط كنت بنصح
بس يوم قسيت عليك ودا غصب عنى
كنت عاوزه لما أبعد تبقى جنه الدنيا بعدى مش تحس فى لحظه نار
أيوه همشى بس سايبه ويا منك ذكرياتى
كل لحظة حب حلوه عشتها ولحظات آهاتى
كل شعر كتبته أو كلمة غرام
لما تسأل حالِك ايه ياحبيبتى فى عز جرحى وأقول تمام
كنت ليك نجم السما وشمس النهار
ياحبيبى لما أمشى مش هقولك الوداع
بس حبك لسه عايش اوعى تفتكر انه ضاع
لما مرة نطقت اسمى كنت سامعه
وانت لما ظلمت قلبك كنت شايفه ف عينه دمعه
بس اعذرنى ماكنتش عاوزه جَرْحَك
كنت نفسى أكمل المشوار بفرحك
أيوه اعذرنى لانك انت فاهم كل حاجه
انت طيب بس اوعى تخلى حد يقول سذاجه
يلى فى الزمن الجميل كنت الحياه كنت السفر كنت الجوار
عند وعدك ليا لسه ولا همشى وأكون سراب
لما قولت أنا هبقى أحسن عمرى ما احزن أو أعيش لحظة عذاب
فاكر انت الوعد ولا الوعد حتى دا كان ضباب
خلى بالك دى الأمانه وانت شِلْتْ وقولت قادر
لو خَلَفْتْ تكون خيانه بس إنت بجد نادر
إنت حد بيوفى دايما لما يوعد...مهما يبعد...أو يغيب وعد الكبار
لما أمشى قول دى كانت أخت ليا
بس انا اللى فهمت حاجه انتهت بيها الحكايه وعقلى طار
ياحبيبى خد مع الأيام قرار
ان يأس الكون فى دارك أو تملّك لحظه منك
انت أقوى من الزمن خلى الأمل للقلب دار
يلا همشى ياحبيبى مع السلامه
عاوزه اشوف على خد قلبك قبل ماامشى الابتسامه
أيوه هيا ياحبيبى ألف شكر سلام دا كان آخر قرار
