وسقط الحب في مزبله التاريخ .... !!

=(( عفوا أيها الحب =((
المشهد نهار خارجى مكان يشبه القهوة البلدى مكتوب عليه ( قهوة و كوفى شوب المعلم حنفي ابو دقه)
على ترابيزة متطرفة يجلس اتنين اللي هما ابطال قصتنا ( بيومى و شاهيناز) يستمتعان بالاصوات الرومانسية المغردة لبياع الترمس و اصوات الحمير التى تجر عربيات الكارو فى الشارع و اصوات فرقعة الدومينو و الطاولة التى لا تختلف كثيرا عن اصوات القنابل ناهيك عن الايقاع المتناغم الصادر من السمكرى المجاور للكوفى شوب
من الاخر المنظر عاطفى عاطفى عاطفى لابعد حد
http://alfaris.net/up/1/1197775810_ba7ebak_01.jpg

بيومى : وحشتينى

شاهيناز: انت اكتر

بيومى : (يلاحظ ان ايديها مربوطة)انتى اكتر ايه ده مال ايدك ؟؟(متسلبطا عشان يمسك ايديها)

شاهيناز: (سايبة ايديها و عاملة عبده العبيط) اصلى كنت بعمل صنية بطاطس امبارح و اتحرقت

بيومى : ايدك؟

شاهيناز : الاتنين ايدى و البطاطس بس الحمد لله انا ايدى كويسة انما صينية البطاطس ماتت محروقه و ماما زعقتلى و قالنلى انتى مش حتعمرى بيت و مينفعش كدة

بيومى : ولا يهمك لما نجوز مش حخليكى تعملى حاجة

شاهيناز : بجد يا بيومى

بيومى : طبعا و انا مستغنى عنك حد يقول القمر اطبخ بطاطس القمر وظيفته ينور بس

شاهيناز : القمر مستعد يغسل و يطبخ و يكنس لو ده حيخليك مبسوط

=D>=D>=D>=D>

بعد عامين و بعد ما كوفى شوب المعلم حنفي اتشمعت بالشمع الاحمر و الاخضر و الموف كمان اضطر بيومى و شاهيناز يدخلوا عش الزوجية السعيد بعد ما تسدت كل الغرز قصدى كل السكك فى وشهم و ملقوش مكان يتلموا فيه
ليل داخلى
المشهد بيومى و شاهيناز فى ليلة فرحهم

بيومى : انا مش مصدق نفسى انتى خلاص بقيتى مراتى

شاهيناز : اه يا حبيبى انا كمان مش مصدقه معقولة احنا اتفقل علينا باب واحد
بيومى : و محدش حيفتحه يا روحى بحبك

شاهيناز : بموت فيك

:D:D:D

بعد شهر و نص من الجواز
المشهد نهار داخلى /عشة الزوجية

بيومى : بقولك ايه يا شاهى

شاهيناز : خير ؟؟؟

بيومى : انت مش ملاحظة اننا من يوم ماتجوزنا مكلناش سمك مشوى

شاهيناز : اه صحيح خلاص يا حبيبى النهاردة ان شاء الله حترجع من شغلك تلاقى سمك مشوى على الغدا

نفس النهار الداخلى و نفس المشهد بس بعدها بـ 8 ساعات على الغدا

بيومى : (ينظر الى الاكل فى ذهول كأنه لقى فيل فى البكونة) .. ايه ده ؟؟
شاهيناز : هو ايه اللى ايه ده ؟ مش فاهمة

بيومى : الرز
شاهيناز : ماله ؟؟ نى ؟؟
بيومى : لا

شاهيناز : ناقص ملح؟؟
بيومى : لا
شاهيناز : حادق؟؟

بيومى : لا

شاهيناز : امال ايه .. ماله ؟؟؟
بيومى : ابيض ؟؟؟

شاهيناز : نعم ؟؟؟؟؟ ( فى سرها : نعم يا روح ....)

امال انت عاوزه ايه ؟؟ .. كاروهات ؟؟؟
بيومى : انتى بتهرجى ؟؟ هو السمك بتاكل برز ابيض ؟؟
شاهيناز : امال برز ايه ؟؟
بيومى : مسمعتيش عن رز الصيادية ؟؟؟
شاهيناز : لا سمعت بس ده مع السمك المقلى
بيومى : والله ده من امتى
شاهيناز : والله انا متربية على كدة طول عمرنا بناكل السمك المشوى برز ابيض و المقلى بصيادية

:((:((
و تبدا الصدمة الثقافية الحضارية المتحجرة داخل قوقعة اللاوجود المحورى لطرق طبخ الطعام المختلفة للاتنين تظهر

http://alfaris.net/up/1/1197776104_bahbek_03.jpg


بعد 3 سنين
المشهد ليل داخلى /حجرة المعيشة امام التليفزيون

بيومى :هاتي لنا القناه التانيه عشان الماتش
شاهيناز:انا عاوزة اتفرج على المسلسل
بيومى :مانتى طول النهار قاعدة متتفرجى فى الاعادة
شاهيناز:اسم الله؟؟؟و انا قاعدة فاضية؟؟؟ مش ورايا هم البيت دنا لسة مخلصة غسيل المواعين من 10 دقايق و بعدين مانت بتتغلب كل مرة و تنكد على امى

بيومى :انت اللى وشك وحش
شاهيناز:خلاص انزل اتفرج عالماتش عالقهوة عشان تبعد عن وشى الوحش

بعد 10 سنين
ماشاء الله عندهم مرسى و نانسى
التغيرات الناتجة بسبب عوامل التعرية و التغطية و البلا الازرق
بيومى ظاهرة التصحر بدات تجتاح شعره مع تغير ملحوظ فى بنيه الجسم التى اصبحت اشبه بالتلاجة مع ظهور انبعاج عند منطقة البطن فبقى شبه تلاجه قرعة و حامل كمان
بالنسبة لشاهيناز الحمد لله شعرها موقعش لانه مش عارف يقع اصلا لانه بقى كتله واحدة ضد الوقوع و الكسر و المية و التسريح حتى لما بتستحمى بيفضل ناشف و هذه معجزة فى حد ذاتها اما بالنسبة للجسم فحدث ولا حرج انبوبة بوتجاز ماشية تتمختر بشعرها الغجرى المجنون ابن المجنونه
:D:D
المشهد ساعة عصرية ولا مغربية كله شبه بعضهمبقتش تفرقو هى قاعدة تذاكر للعيال و حاطة مجموعة من الاسلحة المتنوعة لزوم المذاكرة ( فردة شبشب -مسطرة-عصايا-خرطوم)
طبعا نوع السلاح المستخدم تحدده طبيعة الغلط
:((:((:((:((:((:((:((

شاهيناز : بت .. عارفة لو كلمة نزلت من على السطر و دينى شوفى و دينى لاعيدك الواجب كله و حتضربى
انت يا زفت يا مرسى(بالمناسبة مرسى مستخبى فى الحمام لان الشهادة فيها كحكة)ماشى و انت حتقعد طول عمرك فى الحمام اول ماتطلع حتضرب انا قاعدالك النهاردة و اما اشوف بقى

بعد ساعة و كله خلص الواجب و الواد مرسى اضرب العلقة بتاعه الشهادة بيومى افندى راجع من الاوفر تايم بالجرنال و البطيخة
:-$:-$:-$

بيومى : يا مدااام الاكل جاهز؟؟

شاهيناز:ربع ساعه حسخن الاكل

بيومى:يعنى انتى مش عارفه معاد رجوعى و انا كنت متجوز عشان افضل جعان برضه؟امال انا اتجوزتك ليه؟

شاهيناز:ليه و انت اتجوزتنى عشان اخدمك و لا ايه؟

بيومى:طبعا احمدى ربنا اصلا انى اتجوزتك
انت مبتبصيش لنفسك فى المرايه ولا ايه مش بتشوفى الستات شكلها ايه

شاهيناز:ده على اساس انك كريم عبد العزيز و بعدين و انا فاضية؟؟منا ورايا 60 حاجة ....اه ابنك جاب كحكة

بيومى:ماهو ربايتك حتى العيال حتخيبى املهم ده كان يوم اسود يوم ماتجوزتك
شاهيناز:ليه الله يرحم ايام الحب دنتا كنت بتيجى فى نص الليل و انت هلكان و تفعد عالقهوة اللى قصاد بيتنا عشان بس تشوفنى من البلكونه 5 دقايق

بيومى:كنت اعمى و حمار مكنتش فاكر كده كانت السكينه سارقانى

شاهيناز:انت برضه بعد ما اللى بعمله لاحمد ولا شكرانيه ده انت عيشتك تقرف و صابرة و ساكته فالح تبص عالستات التانية عاملة ايه طب ياخويا هاتلى زى ماجواز الستات التانية دول بيجبوا لهم ..انا القى احلى منهم و ادى العيال دروس بدل منا قاعدة ليل و نهار اذاكرلهم عشان اوفر عليك مصاريف الدروس و يا ريته عاجب

(باقة متنوعة من الشتايم المركبه من نوعية ( يا ولود كذا ويا ولود كذا )و كلمة منه على كلمة منها قلم منه على قلمين منها طبعا الباقى معروف....)
و دى نهاية قصة حب بيومى و شاهيناز
السؤال ليه الحب اترمى فى مزبلة التاريخ

العيال؟؟

الفقر؟؟

الملل؟؟

منتظر رأيكم ...

:-&Hooba:-&

مش ديما الحب بينتهى بلنهايه ديه بس لازم يحاول الطرفين بكل الطرق للحفاظ على الحب ده
وفى معظم الاوقات الغلط بيبقى على الست لانها هى الى بتكون العون والسند ليه جوة البيت وكل المشاكل الى بتقابله فطبعا لما يلقى مشاكل برة ومشاكل جوة وكمان هى قاعده بهدوم المطبخ طبيعى مش هيبقى فيه حب وهيبقى من حقة انه يبص برة

اقتباس:

---

المشاركة الأصلية كتبت بواسطة SARA AHMAD MM

مش ديما الحب بينتهى بلنهايه ديه بس لازم يحاول الطرفين بكل الطرق للحفاظ على الحب ده
وفى معظم الاوقات الغلط بيبقى على الست لانها هى الى بتكون العون والسند ليه جوة البيت وكل المشاكل الى بتقابله فطبعا لما يلقى مشاكل برة ومشاكل جوة وكمان هى قاعده بهدوم المطبخ طبيعى مش هيبقى فيه حب وهيبقى من حقة انه يبص برة

---

تسلم هوبا وانا برضه من رأي سارة
ومش رح اقدر اضيف اكتر لانه تمام
مشكور جدااااااااااا

منورين يا أمامير .... تسلم لي إديكم ......
لسه اما نشوف راي بقيه البشر ايه ...........

اقوللكم حاجة ان كانت القصة دى الى حد كبير جدا واقعية (والله بتحصل ) بس انا رايى الشخصى انها انتهت لان باى عقل واحد اسمه بيومى يتجوز واحدة اسمها شاهى ده اسمه تفاوت فى الحضارات مع اختلاف فى العقليات المتطورة فى زمن اصبحت الكوارع من ضمن حقوق الانسان ونصيحة منى لاخونا بيومى ( دور على حد دفعة الكسار يناسبك ) اخوكم بســـــــــام الصــــــــــــــــــــــ ــــــــواف

ماشي يا عم .... كفايه دخلتك التوبيك علينا وانت جايب كيس الفاكهه ده في ايدك

شوف انا هكتب ايه

سيبك من الكلام ده كله

هو ايه ده اللي حب

هو اللي حصل ده كان حب وانا اللي كنت فاكرها خناقه وهندخل نسلك بينهم ايه يا هوبا ده بقى كده ماشي يا عم

بس على العموم قصة جميله والله =D>