طعمه وقيمته ومعناه
*****
النصر فرح وغنوة وكمان موال
واحلى كلام نسمعه وفيه ينقال
رمال وجبال واهل تحت الاحتلال
الجد بان من لحظة الاعداد للقتال
الطيارات بأزيزها صنعت و زرعت آمال
الدبابات بجنازيرها ودانتها حققت المحال
المهندسين بنت كبارى احلى من الخيال
والمدافع والمشاة وعزيمة الابطال الرجال
بسم الله والله اكبرقالها الجنود عبروا القنال
وعلمنا اترفع ورفرف وسط الدعاء والابتهال
*********
رجالة اتجندت سنين بتسهر وبتتدرب
فى الخدمة بتتفانى وابدا ما بتتهرب
ليل ونهار بتبنى وبتحاول وبتجرب
صابرة ونفوسها صافية للمولى بتتقرب
عقول واعية وبالعلم بتتسلح وبتتشرب
********
وسينا بشط شرقى على جانب القناة
ومحتل غاصب من الطغاه العراه الغزاه
النابالم خزنوه وقالوا لحرق القادم والمياه
بس الشهيد قال الجنة احلى من الحياه
وقدم دمه وروحه للوطن وبسرعةلبى نداه
ومين يقدر يجازى الشهيد يا ناس غير مولاه
والنصر عرفنا طعمه وقيمته وكمان معناه
يارب بارك فى اللى خلا الحلم حقيقة وشفناه
والله اكبر طلعت من القلب تدوى قبل الشفاه
*******
اسألوا العزل والأسرى واطفال بحر البقر
هتعرفوا ان عدونا من الطغاة واحفاد التتر
بس العربى لما اتوحد عليهم فاز وانتصر
والاسطورة ماتت من غير حتى ما تحتضر
ولو عايزين نفوز تانى وعليهم دايما ننتصر
ونبعد عن الهم والغم وزراع وصناع الخطر
لازم تتوحد الايادى وما نختلف ما ننشطر
*********
رجالة وقالوا الاسطورة كذب وتخاريف
العدو مسعور وان مثل حتى دور الأليف
وان اخد معاه امريكا دايما سند وحليف
هيفضل المغتصب بجبروته خواف وضعيف
وهيفضل صاحب الحق دايما شجاع وشريف
اسألوا اللى حطموا الاسطورة و خط بارليف
******
جولدا وديان وشارون وحتى مناحم
شافوا العرب فى وحدة ووئام وتلاحم
وطابور ابطال عاى الشهادة بتتزاحم
ليه نختلف.. ليه نفترق.. و ليه نتراخم؟
*******
دخان ونار وريحه من انفجار البارود
وحائط صواريخ ولنشات وايام الصمود
ورجاله حبت تموت عشان سينا تعود
قتلة الانبياء لا ليهم امان ولا يصونو عهود
********
طبعا سينا الغالية ضاعت منا سنيين
وكلنا فاكرين ازاى هنكون فى يوم ناسيين
وابطال اكتوبر بينا لسه يا ناس عايشين
بنعشقهم عايزين نسمعهم بلاش تانيين
*****
كلمات م/ عماد الدين محمد
تحية لارواح الابطال الشهداء
تحية لكل من طهر رمال وتراب الارض بدمائه
تحية
لصناع نصر اكتوبر
تحية
لمن حطموا اسطورة الجيش الذى لا يقهر
تحية
لابطال العاشر من رمضان
تحية لأبطال
عندما نسمعهم تمتلأ العيون بالدموع فرحا وفخرا بما قدموا
وما سطروا من أروع البطولات والتضحيات
كم نتمنى ان نشاهدهم دوما وعلى مدار العام فى الفضائيات
فلدى كل واحد منهم روائع من حق الاجيال الجديدة
ان تسمعها لتتعلم الانتماء والولاء
[/SIZE][/SIZE][/QUOTE]
[/SIZE][/CENTER]
