وعروسة لقلبى بتنخطب
*******
جالى القلم وطلب منى الكتابة
واشترط معايا ابعد بيه عن الكآبة
ونتمشى بعيد عن دخان السحابة
ونتخلص من السفرة ومعاها التلاجة
واحدة ماليها لزمة والتانية مافيها حاجة
*******
قلت له سجل انى ضربت كف بكف
وحسيت انى خسيت بس عقلى ما خف
لما الخضارسجل انتصار ودخلى هف
وفى السوق الناس واقفة هناك تصطف
تحسب فلوسها وتدارى كسوفها مع كل صنف
وواحد كان معانا لكن ساب النظام والصف
وقال سلام وكتير م الكلام ورجع تانى للخلف
زى ما تقول الغلا غول شافه حواليه بيتلف
رجع لبيته وخلا مراته ترمى البوتوجاز ع الرف
والمسكينة اصلا كانت طالبه منه كرنبايه تتلف
********
وقال ليهم القوطه مع الخضار ف السوق اتجمعت
والتجار فى شجار بس المواطنين معاهم اتحيرت
اصل الحيتان فى امان وفى الاسعار كمان ولعت
والناس بتنداس من عديمى الاحساس فعيونهم دمعت
والاوانى فى بيته فى ثوانى خلاها اتغسلت واتلمعت
وطلع بيان يقول كمان بيبان المطابخ اتشمعت
وفكر الناس بزمان بسرعة على التسعيرة اترحمت
*******
لكن وانا راجع من هناك عند المطب
شفت حاجة لا تفرح ولا اصلا تنحب
اكوام زبالة وقش وشوية عيدان من حطب
قلت لو عايزين الغلا من الحياة ينشطب
نزرع نخيل ف شط النيل نلاقى بلح ورطب
عايزين عمل وخطة امل لا انتخابات ولا خطب
وبحبك يا بلدى دا انت عروسة لقلبى بتنخطب
********
وفى وسط السعادة وذكريات الانتصار
شفت الكورة وابطال افريقيا الكبار
النيجر يا ناس هزموهم وفرح الشطار
واحنا هنحلم وعلينا كمان الانتظار
وبس جحا بيسألكم وهو بيأكل الحمار
امتى هتتصالح اللحمة والقوطه مع بقيت الخضار؟
*******
كلمات م/ عماد الدين محمد
مع خالص تحياتى للجميع
