نهر الدموع للشاعرحماية عوض الشربينى
نهر الدموع واصل لبيتنا
من المنابع
الكل يبكي ودمعته
توصل مع النهر اللي نابع
والنهر يرمي حمله كله
جوه بيتنا
لا بنشتكي يا نهر من دمعك
ولا فقرك
ولا قلة رغيف قوتنا
بشكيك لنفسك والدموع
دا الزرع مات
وسط الربوع
وجيرانا هاجرت
والقلوع
ما فضلش غيرنا
وبقايا ماضي
ورغيف بقاله 3 شهور
عايش في جوع
والنهر فايض فيضه
في البيت بالدموع
كل السفن ترحل بخيرها
إشي فرح وأمنيات
والحب مليان
عن آخرها
بس إنت دايما
تيجي بسفينة الوداع
بس انت دايما
آخرتك حزن وضياع
بس انت دايما مركبك
من غير شراع
يا نيل وهحكيلك
مع إني بخاف منك
لكن عمري ما هشكيلك
قدر ومكتوب
علي جبينك
وأنا وياك
وياما راحوا كتير قبلك
بدرية سافرت ومعاها
ليلي وابتسام
وكمان سعاد
الكل سافر فيك
يا نهر البعاد
شلال بُكي وماليك دموع
الكل هاجر .. من غير تذاكر
من غير معاد
آن البعاد
مفضلش غير بيتنا في
وسط البيوت
مفضلش غير صوتي اللي عايش
في السكوت
المركبة امته بقه تشد الرحال
وحدي هنا
عا المينا مستني وطال بيّه المطال
هارحل بعيد بره البلاد
هلحق أمل
من دنيتي إسمه سعاد
قفلت شنطي وبؤجتي
مليانه لآخرها ذكريات
إشي كلمتين شعر ف جواب
إشي دمعتين وسط العتاب
وكمان معاهم
شهادة ميلاد
وشهادة وفاة
وإعلان وراثة
صوت مركبي واصل لفين
سامع خلاص
ياااه تقيلة الشنطتين
وركبت مركب الرجوع
مجهول غريب
مسافر
علي نهر الدموع .
