العين ماعاد تغريها الاماني
الصمت يكفي ويشفي صدر راعيه
لا صار كل الحكي ماله معاني
والقلب ما عاد تعنيه المشاريه
والعين ماعاد تغريها الاماني
والخاطر العمس من يقدر يسليه
الناس والا الشعر والا الاغاني ..؟
يا كاتب الحزن في قلبي وقاريه
في نظرتي في انفعالي في حناني
ياليت حزني مجرد دمع وابكيه
ماهوب عايش معي بين المحاني
ماهوب يظهر علي واحاول اخفيه
و تصير نظرات حزني هي لساني
لو للسحايب سجن يا عبرة التيه
والله ما احبسك بخفاقي ثواني
مدري ذكرني زمان كنت ناسيه
مدري ذكرت الزمان اللي نساني
كنت اكره البحر واخاف الغرق فيه
و اليوم احبه واخاف من المواني
كنت اعشق الجاي باحلامه وامانيه
يا ما بنيت بخيالي له مباني
ياما رجيت العطا من مدة يديه
حتى خذا كل شي وما عطاني
