نبتدى من واحنا صغيرين وكنا قطط لسه مغمضين
من يوم ضحكتنا وبرائتنا وعرفنا الدنيا وعرفتنا
وكانو والدينا بينا مهتمين ويقولو يا حبايبنا الحلوين
ف بداية عمرنا وحياتنا وكانت موجوده طيبتنا
واهلنا كانو فينا واثقين واكيد بعد مرور السنين
الدنيا بهواها غيرتنا ولمشاكها معاها جرتنا
و مكناش ليها معارضين ورحنا معاها وقولنا امين
وبدات تختفى فطرتنا ومش زى الاول طبيعتنا
ومرينا بمراحل وسنين ووصلنا الجامعه وبقينا جامدين
وبدانا نحس بغربتنا مع اهالينا ووسط اخواتنا
وطبعا هما مكنوش حاسين وبقينا ناخد السنه بسنتين
وشبابنا اتعرف ببناتنا ومفيش فاصل ف قعدتنا
واتلخبطنا مبقناش عارفين الولد من البنت ولا هما 1ف2
والحب كان من شعاراتنا كل اتنين مع بعض ف صحبتنا
وبعد الحب مسك ايدين وربنا يعلم بللى هيحصل بعدين
والشاب يقول دى طريقتنا والبنت تقول بارادتنا
يقعدو مع بعض هما وخايفين ويبصو شمال ويبصو يمين
يقول الله لو اتارى جت لمتنا تقول مصيبه لو اختى شافتنا
مش احسن لو كنتو مخطوبين وتكونو ف قعدتكم مرتاحين
وتبدا من هنا حواراتنا وعمرها ما هتنتهى مناقشتنا
ياحبيبى ياعمرى يانور العين اتقدملى بسرعه خلال يومين
والدك مش هيرضى بعيلتنا ولا هيوافق نتجوز ف بيتنا
اشترى شقه حتى باوضتين وباذن الله هيكونو راضيين
ومن فين هنجيب شبكتنا وازاى كمان هنقضى حياتنا
فى حل يفيدنا احنا الاتنين نجوز عرفى ف ورقتين
ونحدد مع بعض مقابلاتنا ونجيب شاهدين من شلتنا
هى توافق بسهوله ولين وفاكره هيكون معاها امين
وتسال امتى هتتحل ازمتنا ونعلن للناس جوازتنا
يقولها الناس مش فاهمين الاهم اننا دلوقتى مبسوطين
واننا كمان حققنا رغبتنا خلينا بقى نعيش براحتنا
ويحصل اللى مش ليه حاسبين ضحية غلطه هو الجنين
ويجى ف غابه اسمها دنيتنا وهو ده محور مشكلتنا
راح فين العقل وراح فين الدين ليه دايما ع نفسنا قاسيين
بنضيع مستقبلنا وفرحتنا واجمل احساس بامومتنا
ولما نلاقى نفسنا ضايعين نقعد نبكى ونكون ندمانين
ونفضل نصلح ف غلطتنا ونرجع الغلط لتربيتنا
ونرمى الغلط ع الوالدين وننسى ان احنا متهمين
ولو فكرنا شويه ف اخواتنا وحفظنا كرامتهم وكرامتنا
وشرفنا انا وانت وناس تانيين اللى ضاع املهم ف غمضة عين
فوقو بقى وشوفو حالتنا دوروا راحت فين جدعنتنا
ف اخر كلامى هقول حاجتين كل واحد يراجع نفسه لدقيقتين
اصل الدنيا نستنا الخير والحب وامانتناااااااااااااا
ناس بتشوفنا اننا وحشين وناس خالص مش شايفين
واحنا كمان مشينا مع موضتنا وحسسناهم بتفاهتنااااااا
مع ان فى شباب كتير واعيين بس الناس دايما منا قلقانين
يارب تتحسن علاقتنا ويعرفو ايه هى حقيقتنا
(بقلمى) اتمنى ان ينال اعجابكم
