طلعا القصه دي مش تبعي دي تبع حد اعرفه واديني فضحته قدامكم عشان انتو متعرفهوش بس
كنا رايحين أسبوع شباب جامعات المنيا زمان ضمن فوج جامعة المنصورة.. كانوا طالبين ثلاثة شعراء بس.. واحنا كنا خمسة أصحاب كلنا شعراء ولازم نطلع.. اقترحوا اقتراح ظريف جدا.. قالوا تلاتة منكم يروحوا شعر والاتنين التانيين يتوزعوا على أي مجال تاني.. المهم إننا نروح سوا مش فارق معانا مين هيعمل إيه..
طيب اقتراح جميل.. المهم أنا بقى هاعمل إيه؟؟ هاروح أمسك لهم التي شيرتات يعني ولاّ إيه؟؟
بعد مباحثات رهيبة اكتشفت _خير اللهم اجعله خير_ إني هامثِّل الجامعة _ ربنا يبارك في اختياراتها_ في مجال الخطابة!!
مالك بتبص باستغراب كده ليه؟؟ أيوه الخطابة حضرتك..
المهم جابوا لي قبل ما نروح بشهر ورقة فيها حوالي 40 عنوانا للموضوعات اللي المفروض إني هاتكلم في واحد منهم.. واحد عن "السادات".. (طويل العمر يطول عمره ويزهـ.. ) لأ مش ده.. وموضوع عن البطالة وواحد عن الإدمان.. كلها حاجات تجيب الضغط أساسا..
طبعا أنا استعديت جامد للموضوع ده عشان لازم أثبت نفسي بقى.. وكان أول استعدادي إني قطعت الورقة اللي فيها العناوين أول ما طلعت من أوضة رعاية الشباب!!.. ورق مين يابا؟ وعناوين إيه؟ دا احنا اللي ركبنا الحنطور واتحنطرنا كمان.. دا احنا نفوت في الحديد.. أي موضوع هنفوت منه بعون الله!!
وطبعا مش عايز أقول لكم ع اللي حصل لما رحنا المنيا. كل واحد قاعد يا عيني طالع روحه في النشاط اللي هو فيه.. وأنا طالع كل الرحلات الصبح وآجي بالليل ألعب كوتشينة للصبح.. أصل مسابقة الخطابة كانت يوم الأربعاء آخر مسابقة للجامعات.. وأنا ولا فارق معايا حاجة.. وبالطريقة دي شفت كل آثار المنيا في الرحلات.. وعلى فكرة بحمد الله مش فاكر أي حاجة من الآثار دي.. اللي فاكره كده كان تمثال لحاجة كده شبه القرد مش عارف كان اسمه باين الإله "محسن" أو حاجة زي كده.. ما هي كل حاجة هناك إله!!
المهم يوم التلات بالليل سهرنا أنا وأصحابي للساعة سبعة الصبح نلعب كوتشينة ولسه على المسابقة ساعة وأنا أساسا مش شايف قدامي.. قعدنا نتناقش هاعمل إيه يا رجالة؟
اتفقنا على إني أحط موضوع معين في دماغي ولو جه موضوع تاني برضه أتكلم عن الموضوع اللي ف دماغي!!
يعني هاتكلم عن "السادات".. ولو جالي موضوع البطالة هاقول إن السادات كان بيكره البطالة.. ولو جالي موضوع الزواج المبكر هاقول إن "السادات" عمره ما اتجوز مبكرا.. كده يعني!!
رحت المسابقة وعملنا قرعة مين هياخد موضوع إيه.. وطلع من حظي موضوع الأمية.. تصوروا بقى المفروض أتكلم عن الأمية وبالفصحى لمدة عشر دقايق ومن غير ورقة كمان.. صلاة النبي أحسن..
أحلى حاجة في الموضوع إنهم طلّعوا كل مشرفين الجامعات بره القاعة.. ودي كانت أحلى حاجة في المسابقة أساسا!!
طبعا مسكت الميكروفون.. وبعد ما بدأت بكل افتتاحية خطب الشيخ "محمد حسان".. ودخلت في (طبتم جميعا وطاب ممشاكم).. دخلت في الأمية.. والأمية وحشة يا جدعان.. والأمية مش حلوة يا رجالة.. والأمية مش لذيذة يا بهوات.. وبعدين -خير اللهم اجعله خير- لقيت كده التجلي والإلهام بيرفرف.. لقيت نفسي باقول:
- ومن أهم أسباب الأمية الزواج المبكر!!
طبعا من قواعد المسابقة إن ممنوع حد يقاطع المتسابق ورغم كده لقيت واحد من المحكمين قال لي: استنى يا بني أنت.. إيه اللي جاب الأمية للزواج المبكر؟
طبعا أنا أساسا مش عارف أنا باقول إيه.. لقيت نفسي باقول له:
- حضرتك ما هي الواحدة الست لما بتتجوز وهيّ صغيرة بتنسى اللي اتعلمته.. تبقى أمية ولا ّلأ؟!!
طبعا مش عايز أقول لكم ازاي الراجل بص لي من فوق لتحت وكأنه بيبص لكريم ابن اخته بالظبط.. وقال لي: كمِّل يا بني كمل.. وكأنه بيقول لهم سيبوه سيبوه . هو هيخلص لوحده!!
المهم بعد المسابقة قالوا النتيجة بعد خمس دقايق.. طبعا طلعت بره بقى لقيت مشرفين الجامعة كلهم مستنيين عودة البطل الهمام بكأس السوبر وفانلة واحد من الصفاقسي كمان..
طبعا طلعت قدامهم فرحان جدا.. خير يا "أشرف"؟ قلت لهم: مش هاقول لكم يا جماعة الناس كانوا مبسوطين مني قد إيه؟
وطلعت النتيجة.. طبعا أنا عارف إني أفشل واحد في المسابقة.. دا ممكن يكونوا حولوني على مسابقة تانية أساسا..
الراجل بدأ يعلن النتيجة
الفائز الأول: جامعة المنيا
لأااااااااااااااااااااااا اااه.. (طبعا ده صوتي).. ومش ممكن.. والنتيجة مزورة.. وأنا عايز حكم أجنبي.. وطبعا المشرفين قعدوا يهدوا فيّ.. خلاص يا "أشرف" تتعوض.. استحمل.. ودي الجامعة المضيفة لازم يجاملوها.
الفائز التاني: جامعة جنوب الوادي
لأااااااااااااااااااااااا اااه.. (طبعا ده صوتي برضه).. مش معقولة كده.. هما هيجاملوا كل الجامعات اللي في الصعيد ولاّ إيه؟ أنا هعمل شكوى.. وطبعا المشرفين: معلش يا "أشرف" أنت عارف اهتمام سيادة الرئيس بنفسه بالصعيد.. مش معقولة يكسروا كلام الريس.
الفائز الثالث:جامعة القاهرة
لأااااااااااااااااااااااا اه.. (أكيد اتعودتم على الصوت... صوتي طبعا).. بيجاملوها عشان هي الجامعة الأم والأم مدرسة.. وفضلت اتشحتف ومديرة النشاط تهدّي فيّ وأنا عامل فيها "حسن الهلالي" اللي عايز ينتقم من كل الجامعات..
طبعا كده احنا طلعنا من ترتيب الجامعات أساسا بس هم أصروا نتيجة لشحتفتي إنهم يستنوا عشان يشوفوا العبقري اللي هو أنا اتظلم وطلع المركز الكام..
الفائز الرابع: جامعة الاسكندرية
الخامس: المنوفية
السادس: عين شمس
السابع: الأزهر
الله.. الله.. الله.. (طبعا ملاحظين إن ده مش صوتي.. ده صوت المشرف بتاعي)
الثامن : الزقازيق
التاسع: حلوان
العاشر: أسيوط
يادي النيلة.. يادي النيلة.. (وده طبعا صوت مديرة النشاط)
الحادي عشر: قناة السويس
هي جامعة المنصورة فين يا جدعان؟.. (ده صوت مدير الرعاية)
الثاني عشر: طنطا
يلاّ نمشي يا رجالة.. (ده صوت كورال مجمع من كل المشرفين بتوع جامعتنا)
المركز الثالث عشر: المنصوووووووووورة
اكتشفت بعد كده -خير اللهم اجعله خير- إن ده كان المركز الأخير في المسابقة!!
والله التحكيم كان نزيه يا جماعة على الأقل بالنسبة لي.. الواحد اللي يخللي الزواج المبكر هو سبب البطالة من حقهم يطلعوه مبكرا من المسابقة أساسا!!
مش كده ولاّ إيه؟؟
