بمناسبة السرقات الكبرى التي حدثت في مصر / اهدي اليكم هذه القصيدة التي كتبتها عن احوال مصر من فترة ليست بالقصيرة و ارجو التشرف بتعليقاتكم
كش فشكش فش
حش دش
اوعى ترمش أو تهش
ولا تلبس أي وش
إلا وش الأخ دونكي
لما يسمع حاه و هش
............................
كش فش
عيش و مش
أي أكله يالله ناكل
نقضي ليلنا ف الحكاوي
ع المشاكل و المهازل
ع المقاوله و المقاول
مين هايبني و مين يناول
مين هايقضي ومين يداول
بس أخر الليل نحاول
قبل ما نطرطش نكش
لما ييجي النوم نخش
..........................
كش فش
سات ودش
بالماتور الأمريكاني
ولا قطعه ساتها تاني
ع الأوروبي تبقى بصّه
وأنا قاعد ليّه جعصه
حجتي بسمع رياضه
والإشاره تبقى ميّه
ع البنات العريانين
ألقى كل الغيرانين
هايقولولي ده حرام
يزنقوني ف الكلام
يبقى قدامهم هاكش
بس أول لما اروح
هافتح المذكور وأدش
...........................
كش فش
ناري طش
لما بتذكر عيالي
اللي يمكن لما أجيبهم
يلعنوني غصب عنهم
إني مت وسبتهالهم
ضايقه جداً من قبالهم
وإن غيري بالكلاحه
والخيابه والتناحه
ولا بشوية بجاحه
لم كام مليون بتاع
م الخصوصي و القطاع
وف نظرهم هابقى كبش
ولا واحد كان طربش
........................
كش فش
مين يرش
أصلنا ساكنبن ف حارة
لا حلال ولا حرام
اللي يملك فينا مره
يهبر الهبره التمام
لو ها يكدب او يحايل
أو ها ينصب أو يغش
مش مهم مين ها يعرف
عيني عينك وش وش
كله متلفع وشايل
ولا حاطط جوه كرش
واللي فينا يبان ها يهرب
ولا يغطس أو يكش
واللي يملك فينا خزنة
لما دوره يجيه يفش
أصلنا ف النحو خدنه
عاش يعيش
كش فش
