إهداء لأرواح الشهداء من :بوعزيزى إلى سالى زهران (سعيد شكرى)

مات الجدع م القهر.مات وإرتاح
لكن ترك فى القلب حسرة قوية
ونار بتشعل ثورة كل صباح
لساكى ليه يامصر مستنية؟
شجر الزتون ع الارض مل نواح
ينعى الرجولة فيكى وفيا
و ف تونس الخضرا طرح تفاح
رفرف حمام الدوح على البنية
صنعاء على التحرير بترمى صباح
ردوا الشباب وقالوا دى سلمية
الصدر عارى والعزيمة سلاح
باب الشهادة إنفتح هنخُش بالـ100
قذافى ليه الدم ياسفاح ؟
يا ليبيا قومى ماتقبليش الدية
اهل المنامة صحوا م النوم على الإصلاح
حتى الجزائر صاحية م الصبحية
عمان كمان قالت كفاية جراح
بغداد بتصرخ ليه يابشمركية؟
صبرا أكيد راح يفتح الفتاح
والقدس تصحى الصبح متوضية
الله أكبر الله.حى عليك يافلاح
صرخة فى تونس بدت صابت هدف فيا
طرحت جناين مصر بالأفرح
الله عليكى يا أم يامربية
يابو عزيزى البطل ياحُر نام وارتاح
هلت خلاص نسايم الحرية.

دائما ننتظر ابداعك بلهفه فياتينا بشوق
اخى سعيد شكرى قصيده متميزه كالعاده وخصوصا انها كانت لارواح ابطال مصر الشهداء
سلمت اناملك وسلم ابداعك دائما وزادك الله موهبة
كانت حروفك جريئه كالعاده و ازدادت سطورك بريقا ولمعانا
فى كل مره اكتشف انك شاعر محترف وليس اى شاعر فانت سعيد شكرى
لك وافر فتحياتى وتقديرى
تقبل مرورى
اختك لبنى