صعيدى انا ..... وافتخر
بسم الله الرحمن الرحيم
هذا ايضاح لكل الناس من هو الصعيدى فلا احد يعرفه على حقيقته فالصعيدى غير ما عرفتموه فى المسلسلات كما انه ليس هو الذى نضحك عليه ونسخر منه فى النكت الصعيد من الجيزه حتى اسوان اذا الصعيد هو جمال عبد الناصر ، انور السادات ، مجدى يعقوب ، نجيب محفوظ ، عبد الرحمن الابنودى ، محمد منير ، احمد حسن ، هشام الجخ ، محمد ابو تريكه ، شيكابالا واعذرونى اذا لم اذكر الباقيين فهم كثر
ارجو ممن يقراوا هذا الشعر ان يحاولوا بقدر الامكان القراءة باللهجه الصعيديه ليفهموا المقصود فانا كتبته باللهجه الصعيديه
انا الصعيدى .... وافتخر
قالوا عليا غبى ومبفهمش ، قالوا عليا غشيم غشامه
وقالوا كمان على لهجتى لهجه قاسيه ، ومفهاش رقى
وخاليه من اى ابتسامه
وانا بقولهم:
انا الصعيدى وافتخر كلى هيبه وشبعااااااان كرامة
كلمتى واحده ولو على رقبتى من وانا صغير طبعى الصرامه
مغدرش ابدا او اخون حد فى يوم مدلى ايده ، علمونى فى بلدى الشهامه
مليش فى اللوع راجل دغرى تبقى ايه حجتكم؟؟ معنديش وسامه؟؟!!
لو الوسامه بالهدوم تبقى وسامتى فى جلابيتى وعمتى
والهيبه بتظهر من الكلام وانا صعيدى تبقى هيبتى فى لهجتى
ولو الرجولة عندك معامله انا رجولتى هتبقى زايده
اصل رجولتى فى معاملتى وفى مشيتى
احميك فى دارى واكرمك ، وتتلسع بنارى
لو فكرت تكشف حرمتى
قولى انت يللى بتتكلم عليا وبتسخر من ضحكتى
انا ضحكتى ضحكة رجال ، ضحكة بجمال
والضحكة تبين مصريتى
اصل المصرى هو ابتسامة وكلمة حلوه واحساس رهيف
وانا احساسى مدارى ورا بسمتى ، مين اللى قلك انى قلبى كفيف
ودمعتى دايما حبساها قوتى ، صعب تنزل ومتنطش غير على خفيف
وثروتى هى كرامتى وعزتى ، وعهدى هو افضل طول عمرى راجل شريف
شعارى دايما فى الحياة انا الصعيدى وافتخر
مخى عمره ما كان مقفل انا اول حد ابتكر
قولى ليه ما الفراعنه هما الصعايده ركز كده وافتكر
قوى ومتين اقف فى وش الريح ماخافش ولو جه الطوفان
عمرى ما افر
كبير طول عمرى لكن بسمع الكلام من الكبير والصغير
ولما كانوا يقولولى فى الجيش انتشر
انا مصرى
انا صعيدى
انا جندى
يبقى لازم افتخر
وعمرى ابدا ما انكسر
ارجو ان تكونوا تعرفتوا على الصعيدى وان اكون وفيته حقه
ملاحظة (انا اصلا صعيديه فخدتنى الغيرة على اصلى)
(بقلمى)
