اولا ياجماعه القصة دي قصة خيالية بس جميلة مش هتندم انك تقراها
والقصة دي على قد ما هيا غريبة على قد ماهي بتعكس هبل وتفاهة الشعب المصري
انا مين
مش مهم
المهم اني كنت في سبيلي اني اتجوز
وحصلت الكارثة
ودي تفاصيل ليلة الفرح بتاعتي
-----------
انا قاعد بوضب البدلة بتاعتي وبتفق مع الكوافير وهنشوف هنروح انا والعروسة امتى عند المصوراتي وبتاع
وماما بتعيط
- بتعيطي ليه بس ياماما
- قلبي واكلني عليك يابني..
- ياماما هوا انا رايح العراق دنا هتجوز
- يابني انتا مكنتش شايفني وانتا مسافر انجلترة..دانا كنت ببكي دم
- ياست الحبايب انا في العمارة اللي جمبك..خلاص بأه
فتمسح الدموع وتضع الخطة
- عايزين نعزم الواد بلية والواد شحاتة ووليد
- مين دول انشاء الله
- دول عيال جدعان أوي هييجو يولعو الفرح ويرقصو
- يرقصو؟ فيه ايه يا ماما
- ملكش دعوة انتا بس ركز في ليلتك..هتوحشني يابني
-----------
وفي الفرح
-------
لا بد هنا ان نذكر تفصيلة مهمة لم أكن أعرفها في انجلترة
أن طراز الأفراح في مصر لا يتغير
فيبدأ الفرح في خمول ونعاس وزهق غلى أن يفجر الدي جي قنبلته الأثيرة
((العنب العنب ))
فيتحول الفرح إلى هوجة ما بعدها هوجة..ويبدأ الطحن
فهذا الشاب يرقص..وتلك الشابة ترقص..وذلك العجوز يرقص..وتلك السمينة ترقص حتى تصطدم بأحدهم وتركل طحاله حتى يتمزق
طحن ملآخر
ثم يقول الدي جي جاي كلماته المعتوهة ((أيواااا..اصحاب العريس..صحبات العروسة..كلوووووووووو))
ثم يأتي البوفيه المفتوح
وينقض المعازيم بسلامتهم على الطعام كأنهم من مهاجري الصومال
وبعد انفجار البوفيه ومسح الأطباق والحلو وجيب العريس
ينادي الدي جيه بصوته المنكر ((كلو معانا هنا)))
وتبدأ ملحمة العنب
ويبدأ الطحن
وعندما تنتهي الأغنية ينادي الجمهور في تصميم ((ألعنب العنب العنب))
ويغنون ايضا فيضطر الدي جي اعادة الأغنية
ويستمر الطحن الذي يقحم العريس في الموضوع رغما عنه
كنت ساذجا فلم أعرف تلك التفاصيل
لكن انا قررت يبقى فرحي مختلف
وفي الفرح قمت روحت للدي جي قلتله في احترام مبالغ - وجمبي اخويا:
- لو سمحت ..عندك موسيقى لفاجنر؟
- أه؟
- فاجنر
- ماوعاش عليه
استغربت لجهله المطبق
- طيب موزارت
- معرفوش يا بيه
- طيب باخ
- بخّ ؟ مش ده بتاع اللمبي؟
- لمبي يعني ايه..باخ ده الموسيقار الايطالي لمعروف
- يا بيه عندي الاحسن منه
- لكن انا عايز دول
- وبعدين بآآآآآآآآآآآه.. انتا ختعلمني شغلي ولا ايه؟
- لأ ده فرحي انا..ثم مين اللي انتا بتتكلم عنهم دول
- امين عاكف بتاع المزز المزز
- نعم ((وانا انظر جمبي في احراج))
- أمال ايه..وهاني فلفل..من خمسة لخمسة ونص
- فلفل؟
ثم اردف في استمتاع:-
- والبمبة الجامدة أوي..العنب
- لأ..مش عايز العنب
بصلي بغباوة وقال لاخويا:
- ماتعقل العريس يا أستاذ..دا عايز المعازيم يا كلوني
قاللي أخويا في دهشة:-
- انتا تجننت يا عماد؟ حد ميغنيش العنب في فرحه؟ دا حتى الفرح ما يكملش
- هوا يعني انا هجيب الأخ بعـ..بعـ.. ده معايا يكملي الجوازة
قال كأني غلط في البخاري
- تؤ تؤ تؤ ..دا حتى اسمه على اسمك
مشيت في تصميم قبل ان يكتمل المعازيم وينتهي الدي جي من عزف الموسيقى الهادئة
وسمعته يبرطم:- زباين ايه المجانين دول..آل مش عايز العنب آل
وجلست على الكوشة في اتظار خطيبتي / عروستي
ورأيت أمي تهرول نوي في فزع
- ايه الكلام اللي سمعته ده يا عماد
- كلام ايه ياماما (( كنت قلقان جدا))
- صحيح يابني مش عايز تشغل العنب في فرحك؟
- ودي فيها ايه ياماما..
- دا فال وحش يابني..خلى الناس تفرح
- ياماما..بقى بعد ماقضيت حفلات اسمع بيتهوفن ودان مارتان وموسيقى باخ..أسمع بعرور وفلفل؟
شهقت أمي شهقة غظيمة:-
- ايه ده..ازاي تقول كده
وقالت في مرارة:-
- الغربة غيرتك أوي يا عماد
وانصرفت لتلقى صدمة المعازيم
وفوجئ الجميع بقدوم العروسة غاضبة متجهمة..وجلست بجواري والدخان يخرج من أذنيها
- انتا عايز تبوظ الفرح؟ ازاي متشغلش العني لحد دلوقتي
- انتي كمان يا نهلة؟ دانا كنت فاكرك عاقلة
- عاقلة مجنونة..لأازم تشغل العنب..المعازيم ابتدت تقلق
- هوا يعني لازم العنب عشان الفرح يكمل؟
وهنا دوى صوت بلية ((أللي عزمته ماما))
- هوا احنا هخنرقص على ايه يا مُدام..فين العنب
ودوى صوت الجماهير الغاضبة:-
-العنب...العنب...العنب
وهنا قمت في سخط:-
- مش هنشغل العنب..دي أغنية بيئة جدا ومحبهاش في فرحي
دوت الصرخات في هلع..وتساقطت بعض الفتيات من الرعب فاقدات الوعي..واستغرب الجميع من الهرطقة التي تلفظت بها وانتزع بعض رجال الأمن مسدساتهم
قالت ماما:-
- اهدى بالله يا عماد..دي وقفة شيطان
وقال الدي جي:-
ماتعق يا أستاذ وبطل جنان
وقال المعازيم:-
العنب..ألعنب..العنب
وبدؤوا في الغناء بأصوات منكرة
- أحمر ودمه خفيف..اخضر ولونه ظريف
صرخت بأعلى صوتي
-لاااااااااااااااااااااااا ا..محدش يغني..محدش يغني
الناس تباينت ردود أفعالها بصراحة
منهم اللي كمل غنا ولا كأن
ومنهم اللي بطل وبصلي باحتقار
ومنهم اللي أخذته العزة بالاثم وتف عليا ومشي
ومنهم اللي مشي وهوا بيدندن
ومنهم اللي شغل الموبايل بتاعه عالعنب وعلى الصوت
المهم ان الفرح صفصف على اتنين تلاتة
نهلة:- منك لله بوظت الفرح
ونظرتلي في كراهية:-
- دبلتك اهي يا أستاذ..احمد ربنا اني مكتبتش كتابي لسة على واحد مجنون زيك
وأصيبت أمي بالسكتة القلبية وتبرى مني أخويا
وجلست وحدي في ذهول
ولا داع لذكر المشاعر التي انتابتنب
حسبي الله ونعم الوكيل فيك يا بعرور
