زمان .... انا كنت بنوته
بسم الله الرحمن الرحيم
ارجوكم قراءة الموضوع باكمله انا عارفه انه طويل بس انا تعبت فى كتابته وتاليفه اتعبوا انتو شويه واقروه بقى ومستنيه الرد وجزاكم الله كل خير
زمان .... انا كنت بنوته
زمان انا كنت بنوته ، حلوه جميله قطقوطه
ضفايرى مفرودة على كتافى ، ووشى زمان ده كان صافى
وفى قلبى غنوه وزغروته
.....................
شايله كراستى فى ايديا ، وكاتبه من براها اسمى
رحمة جهاد رسمى ، وجواها تشوف رسمى
كان بيحكى حدوته
.....................
بيقول انا كنت بنوته ، بنوته شقيانه فى طفولتى
ومجروحه اه يانا فى كرامتى ، لكن معروفه بصرامتى
وجوايا رغبه مكبوته
.....................
رغبه بسيطه جدا ، عارفين يا ترى ايه هى؟؟؟
اعيش فى بلادى فى امان وحريه
منامش انا وخايفه ، او اخاف وانا نايمه ومطويه
ومشوفش بلادى مكحوته
.....................
انا كنت بنوته ، بنوته من غزه ، وغزى يا ضماير
انا كنت بنوته ، بنوته بضفاير ، والشعر كده طاير
والعقل كان حاير ، فى وطن عليه غاير
عدو ملعووووووووون
.....................
عيونه محمره وسهامه مسمومه ، طعناته محتومه
على ام مكلومه ، على زوجه مهمومه
وقلب مطعوووووووون
.....................
مش هى دى حكايتى الى كانت فى كراستى
انا هحكيلكم حكايتى اللى على جدران مدرستى
.....................
انا كنت بنوته ، حلوه وقطقوطه روحت انا لبابى
لقيته مش قاعد ، راح لعمو جلال حفنى وعمو اترابى
جريت على ماما ، قولتلها : يا مامتى انا رايحه لاصحابى
ولبست انا شرابى
وفستانى ابو شريطه
وخاتم عليه باربى
......................
وخرجت من بيتنا ، والجو كان هادى
وروحت عشان العب مع ادم، مع فادى
وانا بجرى فى الشارع وبتفرج على بلادى
وبيوت محوطانى
والريح ده قام فجاه
وضفايرى سبقانى
اليوم ده مش عادى
......................
عماله بتنطط فى طريقه مقابلنى
واحد وصادفنى ، بصلى كلمنى
وكانه يعرفنى ، وقعد يلاعبنى
وادم جلال حفنى فى بلكونته مستنى
بيشاور وبينادى يا رحمه هو وفادى
اجرى بسرعه اجرى
عفريت ده يا رحمه
بيخطف بنات غزه
وانت ماااااااا تدرى
.......................
وانا اقوله لا يا ادم ده مش هيخطفنى
هياخدنى يلاعبنى وشويه ويجيبنى
والعفريت يبصلى ويضحكلى وبيقولى
متسمعيش منه
ده متغاظ منك عشان مروحتلوش وبتلعبى معايا
وسبتيه فى بلكونته محبوس للاااااااااااااااا نهايه
انا هخليكى تلعبى لعبه جميله وياياااااااااااااااااا
ودى لعبه مصريه
انا كنت بلعبها لما كنت هناك
عارفاها ايه هى؟؟؟
هغمى انا عنيا
وانت تدارى بسرعه هنا جنبى
اول ما اقول خلاويص تجرى وتتخبى
وادور انا عليكى اول ما الاقيكى
الدور يكون ليكى وبردو تغمى عنيكى
.......................
غميت انا عنيا بسذاجه طبيعيه
اول ما غمتها
حسيت انا بحاجه بصيت على ايديا
لقتها مربوطه
فضلت انا اصرخ ومحدش بيسمعنى
لا ماما ولا بابا ولا ادم جلال حفنى
ولا تيته اللى لابسه اسود عدت وشافتنى
........................
وفضلت انا اصرخ واصرخ واتالم
وصوتى فضل يوطى وخلاص بيستسلم
صحيت على صوت ناس بتستغرب وبتهمهم
صوت بابا وصوت ماما وادم صحبى متلجم
وصوت تيته اللى لابسه اسود بتتكلم
....................
تقول انا كنت سمعاها بس مقدرتش اساعدها
حفيدتى كانت كده زيك
ولابسه بردو كده زيك
ومعرفتش عنه ابعدها
امال انا لابسه ليه اسود
....................
بصيت انا على فستانى ابو شريطه بقى شرايط
وشرابى اللى كان مدفينى كان جديد بقى ماااايط
وضفايرى اللى كانت مربوطه
بصيت لقتها مفكوكه
وبتعيط
حاجات كتير كانت فيا وانا خارجه
ورايحه العب
انا كنت بيها مبسوطه
......................
زمااااااااااااااان انا كنت بنوته
بكراسه هاااااااااا وبسكوته
دلوقتى حدوتى حدوته
دلوقتى انا بنت مغتصبه
فى وطن وارض مغتصبه
زماااااااااااااان كانت راسى منتصبه
دلوقتى راسى مخبوطه
...................
عايشه مع ناس مغمايه
والحجه نقول دى لعبايه
خلاويص او تكون استغمايه
تماااااااااااااام دى حجه مظبوطه
....................
زمااااااااااااااااااااااا ان
انا
كنت
بنوته
زى ما بيقولو فى المسلسلات والافلام بقى:D;)
(اى اسماء ذكرت فى القصيده ليس لها علاقه بالواقع فهى من وحى خيالى ولكنها تحدث كل يوم)
(بقلمى)
