بسم الله الرحمن الرحيم
انا انهرده بمناسبة عيد الام صحيت الصبح شغلت اغنية الرائعه العظيمه فايزه احمد ست الحبايب اجمل ما كتب وما لحن وما تغنى به عن الام فقررت اكتب عنها كتبت عن عظمتها اكتب عن ست الحبايب بس عشان اسرعت فى الكتابه ومكتبتش فى ورقه وارتجلت وانا بكتب ع الجهاز فاعذرونى لو كلماتى كانت متواضعه وبسيطه اتمنى ان تنال اعجابكم
مين ده يا امى؟؟؟
مين غيرك صدر حنين
مين لعيوبى يجمل ويزين
مين فى غيابى عمره مايطّمن
مين فى عيايا بيتعب زيى وتلاقيه هيتجنن
مين فى سعادتى يسعد ويايا تلاقيه ماشى يغنى ويدندن
مين دعواته بتحرسنى بتخلينى اتحصن واتامن
.....................
مين ده يا امى؟؟؟
مين غيرك هيحس بهمى
مين لو وقعت عليا يسمى
مين بيدمع لو ايده اتمدت مره عليا
وقلبه يدّمى
مين بيدادى مين بياءكل مين بيحمى
مين ده يا امى؟؟؟
.................
مين على كتفى دايما بيطبطب
مين يحدفنى لو غلطان بالشبشب
مين من خوفه عليا بيقسى ويضرب
مين بيلّبس مين بيسرح مين بيسبسب
مين ده يا امى؟؟؟
.....................
مين يراعينى
مين يداوينى
وف اخر الليل وف عز البرد ييجى يغطينى
مين يدعيلى
مين يواسينى
مين فى تعبى والمى يسهر يداوينى
مين يحرسنى
مين يحمينى
مين فى حزنى وهمى يحضنى ويرقينى
مين ده يا امى؟؟؟
....................
وفى ليلة عمرى مين يفرحلى
مين يرقصلى
ومين يتغنى
مين يشقى عشان اتهنى
مين يستنى
لما اتاخر
مين يقلق ومين لرجوعى يتمنى
مين قرانى كرّمه والسنه
مين ربنا وهب له الجنه
مين ده يا امى؟؟؟
.......................
مين بيقولى يكتبلك فى كل خطوه سلامه
يحبب فيك خلقه ويخلى طريقك مليان ابتسامه
مين مياكلش لو ماكلتش ولا يشرب لو مشربتش
وان متنفستش يكتم نفسه ويلبس كمامه
مين ده يا امى؟؟؟
...................
مين يدعيلى يشفيك ياضنايا
مين بيقول سعادتك هى هنايا
مين بيكبر مين بيربى
مين بيقولى انتى منايا
مين بيصبر مين بيلبى
ولا يزهق ابدا وبيستحمل كل عنايا
مين اللى جواه جوايا
مين قلبه معايا
مين يا امايا
مين ده يا امى؟؟؟
عذرا لو كانت الكلمات غير متناسقه بعض الشىء فانا كتبت ما باحساسى وحاولت بقدر الامكان ان اصيغه كقصيده ولكن على وجه السرعه
كل سنه وكل ام طيبه
كل سنه وكل ام بخير
كل سنه وكل اسره سعيده
وكل سنه ومصر امنه وبسلام
وكل سنه وانتى طيبه يا امى
(بقلمى)
