قصيدة مهداه للبنى مصر بقلم والدي (إكرام مجاور)
وصية أب لأبنته في ليلة الحنة
من دون ولادي كلهم عزيتك
وأخدت من حبي لهم واديتك
وفضلتي طول عمرك عزيزة عليا
لا يوم نسيتك والولاد شغلوني
عنك وديما إنتي جوا عيوني
ما تفكريش إنك عليا تهوني
دا الأب ديما منبع الحنيه
شلتك وبوستك وانتي جوا اللفه
وكبرتي علمتك جمال العفه
دي الأسره مركب لو تميل الدفه
تغرق ولو كانت في حبة ميه
صنتي كرامتي انتي عايشه في بيتي
ماشية على مبدأ ما يوم خليتي
عهدك معايا زي ما اتربيتي
صنتي كرامة الأب ميه لميه
إبن الحلال جالك وكان مستعجل
مانسيتش رايك قولت أشورها الأول
لما لقيته بعد فرزك يقبل
وافقت وأنا نفسي كمان مرضيه
دلوقتي أوصيكي في ليلة الحنه
عايزك تخليلوا حياته جنه
يبقى صحيح نال المراد واتهنى
وانتي كمان تبقي سعيده هنية
عايزك تكوني ست بيت منصانه
عاقله حكيمه لخدمته سهرانه
حلوه بشوشه ما تكونيش شيطانه
أو تقلبيها غم كل شويه
ماتسمعيش كلام لجار ولا جاره
ولا تفرضيلك سيطرة وإداره
ماتفكريش إن الكلام دا شطاره
دي الست منها ملاك ومنها رزيه
وإن أهلوا جولك كل يوم زايرينك
ما تكشريش وتعقدي في جبينك
يبقوا تمللي كلهم حابينك
ويقولوا عنك ست متربيه
عايزك في بيتك تبقي زي الورده
صورة جميله أو غزاله شارده
مش يبقى شكلك غم زي القرده
وإن جيتي خارجة تعمليلي حوريه
كلمة أبويا وجدي مش مقبوله
كلمه سخيفه حتى مش معقوله
هو أبوكي كان أمير الدوله
الأصل فعلك مش تكوني غبيه
ما تسمعيش كلمة ... تقصي طيرك
لجل إن طول ريشه يلوف على غيرك
عيشي بحكمه يرتضيها ضميرك
دا كلام خرافه قالته خالتي سنيه
بيتي على طول الزمان مفتوحلك
تجيني زايره كل يوم أفرحلك
وإن جيتي غضبانه مانيش ح اسمح لك
علشان نعيش أحباب وتصفى النيه
محمد محمد مجاور
