كلنا مصرى مسلم مع مسيحى

دا ربنا واحد
ودمنا واحد
وقلبنا واحد
وروحنا شىء واحد
لكنها فى جسدين
وربنا الواحد
مصيرنا دا واحد
ابدا ما هوش مصيرين
اصل احنا مصريين
اخوات دنيا ودين
اخوات فى مصدرنا اخوات فى المرسلين
طول عمرنا واحد والفرق فى الابدان
وربنا واحد بصوت جرس واذان
ومصرنا واحد ولا عمرنا حنتهان
مسلم مع مسيحى
انسان مع انسان
واقف واخويا ريحى
فى الشده نتماسك
الشيخ مع الناسك
كيان ومتماسك
واللى يسيب ماسك
وكلنا يا امه بنبوس على راسك
بنراعى احساسك
مسلم مع مسيحى كلنا ناسك
بندقيتك -- فاسك
واقفين فى كل ميدان
يوم تطلبى ياامه
هنكون كرات دمك
ونجرى فى الشريان
هنكون كرات نار
نحرق بيها الطغيان
هنكون سواعد حديد
ونعلى ف البنيان
ف الفرح نتعاون
ولا يوم هنتهاون
ويوم ما نتعاتب
هتضمنا الاحضان
لو نختلف مره
فى مشكله مره
راح نتفق تانى
لفرحه ومسره
اصلنا واحد من جوه ومن بره
اصل الوطن لينا وديننا للديان
عايزين نفرح يا ناس
يكفى بقه احزان
كلنا مصرى مسلم مع مسيحى
اخوانى او سلفى
مصركم بتنادى
تلفانه يا اولادى
قوموا اصلحوا تلفى
قوموا ازرعو وابنو وكتروا علفى
قومو رودوا الانتاج وسددوا سلفى
اتجمعوا يالله
عبد الله مع مرقص
ومحمد مع حنفى