السلام عليكم ورحمة الله وبركاته
موضوعي ببساطة في سطور :
لماذا نطلب من الصغير أن لا يكذب و أول موقف يواجهه في حياته نقله معلش اكدب في دي بس ؟
لماذا إن سرحت يدانا على أوراقنا ترسم خطوطاً ليست مفهومه ؟ لماذا لا ترسم ما نسرح فيه ؟
بنظرك من هو الأعمى ؟
( هو من يرفض الحقيقة والواقع الذي يعيشة ، يرفض كل شيء ، ويغمض عينية عن العالم ، فيقع في هاوية لا نهاية لها )
ومن هو الأصم ؟
( هو من أصم أذنه عن كلمة حق ، وتمسك برأي جاهل لا أساس له ، هو من يرفض الإستماع للرأي الآخر ويرفض النقاش )
ومن هو الأبكم ؟
( هو الكاذب ، فلا اعترف بكلام في هذا العالم إلا كلمة الحق ، فإن لم تكن فهو ابكم ! )
لماذا نبكي في الفرح ؟ كما نبكي في الحزن ؟
هل هناك حقا ( الضمير العربي ) ؟ أم انها اغاني وهتافات لا معنى لها ؟
( بصراحة آه ، وتعبت من كترها ومليتها كلها .. اسكتوا بئى !! )
ما قلناها زمان .. الضمير مات وحضر جنازته قلب وإحساس .. ومن حسرتهم ، حصلوه !!
__________________________________________________ ________________
ليه بناخد من الوهله الأولى فكرتنا ، ليه دا بئى طبعنا ؟
( مع ان لو الواحد استنى شوية ، شويتين هيلاقي حاجات عمره ما شافها " مجرب " )
ليه بنتخانق اسهل ما بنسامح ؟
ليه بنرفض الصلح وقت الخناق ؟
ليه مش بنعرض وجهاتنا ونعرف شوية شوية فين الغلط ..؟
دا اكبر غلط ان أحد الطرفين يرفض الطرف الآخر ..
لأن كلنا بيغلط ، لكننا بنفرضها وقت ما نحب ، ونرفضها وقت ما نحب .. ( ومتلقش مش صح ، ايوا هي صح )
__________________________________________________ ________________
ليه الكدب ملوش رجلين ؟ هو مش صاحبة إنسان ؟
ولا هو الإنسان أضحى عفريت اليوم ( بيطير ) ؟؟؟
ولا لما يقلك حبل الكدب قصير ( وهو احنا بنلعب شد الحبل مع بعض ولا إيه ( إيه العلاقة بين دا ودا يعني ) ؟
دا الكدب ياما بنى .. وياما هد
ومتقليش الكدب عمره ما يبني ، لأ بيبني بس بيبني من رمل وسط بحر !!
وطبعا الرمل ضعيف وسط البحر
( برضة ، إيه دخل دا بدا !! )
__________________________________________________ _____________
طب ليه من أول الموضع ما حطتش خطوط زي دلوقتي .. ( مزاجي بئى )
أهو احنا واخدينها كدا ..
مزاجي كدا ... عاجبني كدا .. ويحلالي كدا ( يعني يعجبني ) !!
من الآخر متعملش فيها مفاوض وتقلي لأ ، مش كلنا كدا ( مش كلنا دي اعتبر انها لا تشملك ! )
وأعرف ان اول واحد يقول على نفسه انا مش كدا ( يعني هو كدا ) عشان محدش يقول على نفسه صفاته ( وإلا يجملها على راحته )
هتيجي تقولي ممكن الإنسان لو كان صادق مع نفسه ، هيعرف كتير .
لأ ، دي دقة قديمة .. هقلك ليه
عشان لو دروت في نفسك هتلاقي إنسان صغير خالص ضيييييييييييييعف وخايف يطلع بره
لحسن البني آدميين ( وحوش العصر ) ياكلوه ، فبنفضل نلبس زيهم عشان نعيش وسطهم ( ودا ما يطلق عليه " أنت لو عرفته كويس هتلاقي قلبه أبيض " )
آل يعني في قلب أبيض في الدنيا !!
هو يا أحمر يا أسود من السواد اللي بياخده صاحبنا ( كل واحد يدور على صاحبه بئى )
__________________________________________________ _____________________
من غير كلمة شكر .. وعشان نبئى واضحين
أي رد شكر على موضوعي هيحذف يا شباب ..
الموضوع مفتوح للنقاش الجاد فقط
حبيت تمسك أي نقطة وتفصفصها ( تحللها يعني ) ok
تمسك الموضوع كله .. ok
طبعا مع التقيد بالآداب العامه وإحترام الرأي من قبل الجميع للجميع .
ملاحظة : أي حد حابب يطرح نقط ( الحياة كلها نقط ، نقطها ) وحابب يضيفها ، مفيش أي مانع إنما دا يشرفني ويزيد من مقام موضوعي .
سؤالي مستفز :
ليه كتبت " ok " ومش كتبت مثلا " ماشي " .. او حتى حاضر او اي حاجة عربي ؟
عشان بطلنا الدقة دي برضة .. وهيطلع واحد بينا يقول ( قديييييييييييمة ، عتيقة )
فلو سمحت وقرأت الكام نقطة الكاتبه فيهم ok بدلها بكلمة " موافقه "
واللي عايز يقول يقول ..
قديمة قديمة ،
مهو اغلى العطور أعتقها ، وأغلى الأصول أقدمها ..
إذا فليذكر التاريخ أني قدمت لحياتي بأمور منذ القدم ..
فلن تأتي قدمٌ تدوس على قدم العصور .. فليشلها الله قبل خطوتها ..
