1\بتحبي مصر قد ايه
بحبها كتير جدا زي اي مصري اصيل بيحب بلده مهما كان فيها من مشاكل وصراعات وفساد.
وايه اقصي حاجه ممكن تقدميها لمصر لو احتاجتك؟
هاقدم ليها كل اللي هاقدر عليه حتي لو طلبوني في الجيش ان شاء الله لن اتأخر واتمني اني اكون في يوم من الايام حد كويس يقدر ينفع بلده بجد زي دكتور مجدي يعقوب العبقري وامثاله العظماء .
2\يعني ايه ديمقراطيه؟؟؟
الديمقراطيه هي تعبير الفرد عن رأيه بحريه دون ضغط من اي اتجاه
ويجب علي الطرف الاخر(الحكومه )ان تحترم كل الافراد وتلبي احتياجاتهم ومطالبهم حتي مع اختلاف وجهات نظرهم وتعارضها مع الحكومه
واذا حدث ذلك امكن ان نقول ان هذه بلد ديمقراطيه .
وهل يوجد في مصر ديمقراطيه فعلا؟؟؟
لا...ليس في مصر ديمقراطيه انها فقط كلمه تنطق وطالما رددناها علي امل تطبيقها ولكن للاسف من يسمع لنا ...؟؟
4\هل تري شيئا منيرا في الحكومه ؟؟؟
لا....لا اري شيئا منيرا علي الاطلاق ودائما اردد مقوله ( اللي الحكومه عايزاه هو اللي بيحصل) يبقي ازاي ممكن اشوف فيها شئ منير ولو حتي بسيط واقل مثال لو حبينا نتعامل مع موظف حكومي يبقي عمر الموضوع ما هيخلص .
ومفيش مشروع حكومي بيتم انشاؤه الا ويستغرق وقتا طويلا وبعدها قد نكتشف خطأ في المشروع وللاسف هذا اصبح منتشرا جدا
فمثال
جراج السيارات في رمسيس استغرق بناؤه وقتا طويلا واستهلك مبلغ 14 مليون جنيه وبعد ذلك تمت ازالته بمبلغ 10 مليون وذلك بغرض فشل المشروع ...من الاحق بهذه المبالغ الطائله ..
فكيف بعد هذا المثال البسيط اري في الحكومه شيئا منيرا .
5\هل يوجد امل في نهضه مصر؟؟؟
نعم ...الامل موجود ولكن الموضوع يحتاج تغييرا شاملا وجذريا حتي يحدث في مصر نهضه بمعني الكلمه .
وما هي مقترحاتك ؟؟؟
مقترحاتي ..
* ان يحدث تغيير في مجال التعليم
* ان يحدث انقلاب في مجال الاستثمار
*ان يتم انعاش الصناعه وزياده المشروعات
* ان يتم الاقلال من الاستيراد وزياده التصدير
* تنشيط مشروعات الاستصلاح والبعد عن الاراضي الزراعيه ومنع استغلالها
*ان تحدث مراقبه علي كل ما تنشره الصحف والتليفزيون لان هذا يؤثر علي النهضه الداخليه لدي الشعوب .
* التقليل والحد من الوساطه والمحسوبيه وغيرها مما يدمر البلاد داخليا .
*زياده فرص العمل وتوفير سبل التنميه للشباب
* الحد من الزياده السريعه الجنونيه في الاسعار لان هذا يؤثر علي الاقتصاد وهذا امر طبيعي ومعروف .
6\احساسك ايه لما بتشوفي شباب ولا بيتكلم ولابيعمل حاجه في حياته كلها؟؟؟
الاحباط
بشعر باحباط واشعر بان المستقبل مظلم
والاسباب كثيره جدا ومتنوعه فالشباب ليسوا دائما هم المخطئون فالبيئه ( الفاسده الفاسده الفاسده) هي السبب الاول وماقبل الاخيروالاخير .فعزيمه الشباب مازالت موجوده فقط انهم يحتاجون الي ما يدهم احلامهم وامالهم في الحياه .
7\احساسك ايه لما بتشوفي ناس تحت خط الفقر بمراحل وبالتاكيد بنشوفهم كتير؟؟؟
اشعر بالحسره
والسبب يكمن في الحكومه فالحكومه هي من لم تعطي وتوفر لهم عملا فعاشوا بذلك تحت خط الفقر .وانا اشعر بان الحكومه تعيش في حاله غيبوبه مستمره فالكثير من الكوارث تحدث ويشرد الناس ولايجدون مأوي فحادث الدويقه وغيره من الحوادث ما زال ماثلا في الاذهان . وهناك الكثير من العشوائيات تحت خط الفقر عندما طالب رئيس الوزراء السابق كمال الجنزوري بازالتها وتوفير لهم مسكن مناسب وعيشه راقيه قامت الدوله بفصله من منصبه .ولا تعليق .......
8\ ايه رأيك في الشباب المصري ((العاطل \ المدمن ))
هل هم ضحيه ظروف اجتماعيه نابعه من الاسره والاعلام والمجتمع ولا ظروف اقتصاديه علي البلد كلها ؟؟؟
اجابه السؤال في السؤال ذاته
فكل هذه الظروف اجتماعيه من الاسره _والاعلام _والظروف الاقتصاديه كفيله بتحويل شاب طموح حالم الي شخص عاطل يملأ الفراغ وقته فلن يجد وسيله سوي الادمان فتجده يهرب من مصيبه البطاله ومشاكلها الي كارثه الادمان .
والسبب طبعا معروف
لان الحكومه اذا وفرت لهؤلاء الشباب مجالا للعمل ووفرت لهم كذلك ما يؤهلهم لان يعيدوا النهضه للبلاد لفعلت الحكومه ولكنها لم تقم بذلك فكيف لي ان اعمل وانتج فانا الان عاطـــــــل وغدا مدمـــــــن وبعد غد ربما مجرم ولا حول ولا قوه الا بالله .
فالاسره المفككه لن توفر جوا للحلم والامل المزروع داخل الشباب.
والاعلام الفاسد يدمر اخلاق الشباب .
والمجتمع لم يعد بيئه لتنموا فيه الافكار .لكثره الاهمال في كل شئ في التعليم والصناعه والبحث العلمي .
والظروف الاقتصاديه القاسيه لا تدعوا ابدا الي حلم من شباب تخرجوا من كليات قمه وكانوا مبدعين في وقت من الاوقات .فكثير من رجال العمال وكثير من رجال الحكومه نهبوا وما زالوا ويستمرون في تدمير الاقتصاد المصري وكان الاولي من ان تحول الاموال علي بنوك سويسرا ان تكون حقا للشباب المصري ( الله يكون في عونه) .
9\ هل يحكم الرئيس البلد ؟؟
كان بيحكمها اول ما تولي الرئاسه ....انما دلوقتي لا اعتقد انه عنده معرفه باحوال الغلاء والمعيشه الصعبه اللي المصريين فيها
(حق الرد مكفول للجميع ........)
واذا لا من الذي يحكم ؟؟؟
مصر دلوقتي كانها بلا حاكم كل وزير مسؤل عن وزاره وكل محافظ مسئول عن محافظه وكل عمده مسئول عن بلده يعني انا شايفه ان محافظ المحافظه بتاعتي هو المسئول عنها ويحكمها ولما بيوصله اوامر عليا بيقول سمعا وطاعا واللي هو شايف انه في مصلحه المحافظه بيعمله انما لو عكس المصلحه ابدا مش هينفذه .
(انا شايفه كدا لان دا اللي بحسه في البلد اللي انا ساكنه فيها والمحافظه بتاعتي)
اما بالنسبه للسلطات العليا فالرئيس بيعطي الاومر للوزراء واللي برده هما شايفينه بيعملوه ودايما مش بيكون في مصلحه الشعب .
10\ما هو قولك في كل من
حسني مبارك
كفايه عليه اوي اوي كدا محتاجيين تغيير فعلا ياريس....
جمال مبارك
من شابه اباه فما ظلم ودا يااخواني الافاضل رئيس مصر القادم وافقنا ام ارفضنا
(اللي الحكومه عايزاه هي اللي بتعمله )
البرادعي
عالم مصري عظيم وله احترامه ولكنه لا يصلح ان يكون رئيسا لمصر من وجهه نظري فهو عاش خارج مصر منذ 1992 وعاد منذ فتره قصيره وولائه الدائم للمنظمه التي يعمل بها وهو رجل عالم فاضل كيف له ان يكون الرجل السياسي الاول في الدوله .
(من يتفق معي او يختلف في الرد فهذه وجهه نظركم وحق عليَ احترامها)
الاخوان
جماعه ليس لها هدف سوي الوصول للسلطه وابعاد احزب الوطني عنها وياخذون الدين سلما لهذا ...وهذا اكبر خطأ
مصراوي كافيه
بعتبره المصيف بتاعي رغم اني ساكنه علي البحر الا اني بقضي الصيف كله في الكافيه ورغم اني كل صيف بعمل عضويه جديده بس مش مشلكه المهم اكون موجوده في اجمل بيت علي الانترنت :):):x:x:):)
الخيمه الرمضانيه
فكره جميله جدا ومتميزه للغايه واتمني اني اشوفها تاني في رمضان القادم وفكره فعلا نستحق ان نرفع لاصحابها القبعه احتراما وتقديرا:)الجميله الفاضله اختي الكبري ايسل وكذلك الاخ الكريم ذو الاخلاق الرفيعه هشام اللول :):)
11\هل ترين تقصير في هذه الوزارات
*التعليم
تقصير ملاحظ جدا فالطالب المصري لم يعد مبدعا مثل الماضي بل اصبح الطالب الحفيظ بمعني الطالب اللي بيقدر يحفظ اكتر هو المتميز وطبعا لايوجد حفظ بدون فهم فاحنا بنضطر اننا نفهم نفسنا علشان نقدر نحفظ علشان نجيب مجموع عالي ونروح الجامعه ونتخرج ونقعد علي القهوه .فالتعليم المصري فاسد جدا جدا فالجانب العملي لم يعد مطبقا والعمل بعد التعليم فقط لاصحاب الوسطات حتي لو التقدير كان ايه ....
الداخليه
اسالوا خالد سعيد وهتلاقوا الجواب
الزراعه
اكيد ازمه الخبز لسه فاكرنها وازمه الارز اللي قريب ان شاء الله هنشوفها والدقيق والاراضي اللي بتتحول من زراعه لارض مشاريع ومباني كل دا بيقول ان الزراعه في مصر في خطر .
العدل
ايه اللي يخلي القاضي يؤجل الحكم في قضيه هشام طلعت مع العلم انه لو كان مرتكب الجريمه شخص مصري عادي مش كانت اتعملت كل الضجه دي وكل التأجيلات دي ..
وكمان ازمه القضاه والمحامين
وقضيه ابنه المطربه ليلي غفران
كل دا ولسه عندنا امل في وزاره العدل اه فعلا لسه الامل موجود ان شاء الله علشان ترجع نزاهه القضاء المصري ولما اترفعت الحصانه عن 14 عضو مجلس شعب بتهمه اختلاس اموال (مليار علي حد معلوماتي)في قضيه العلاج علي نفقه الدوله وقتها قولنا ان فيه امل ان شاء الله ان شاء الله ان شاء الله
الصناعه
انا كل لما اشتري منتج لازم تلاقي البيدج مكتوب عليه made in china او made in malysia ونادرا لما تلاقي حاجه تقولك (صنع في مصر ) بجد نفسي الاقي حاجه كويسه واعتز انها من صنع شباب بلدي .
اقول لحضراتكم حاجه ...احنا بنصنع في مصانعنا ابره الخياطه وبعدين نرسلها الصين علشان يثقبوهااااااااااااااااا (ابتسم انت في مصر)
السياحه
الوزاره دي بتحسسني ان السياح دول هما الاولي والاحق بكل حاجه جميله في البلد يعني علشان سيناء وشرم وغيرهم اماكن سياحيه يبقي لازم ياخدوا حقهم ولو حتي علي حساب اكل الشعب وشربه يعني هما يتفسحوا ويعيشوا والمصريين يموتوا ومش مشكله
لعل صورتنا في نظرهم تكون مشرفه .
الطاقه والكهرباء
ازمه الكهرباء كل يوم وكل ساعه بيقولك اننا داخلين علي ايام ظلام اذا لم نكن نحن فيها الان من الفساد المنتشر في كل الانحاء
واذا كانت هذه الوزارات المذكوه فيها تقصير فما بالكم بغيرهم
ابشركم باحلي ايام في البلد دي ;);););)
12 \ اننا نري تشتت عربي
هل هذا التشتت سببها مصر؟؟؟؟؟
لا اعتقد لان العرب لو عايزين يجمعوا الشمل فعلا هيجمعوه بمصر او بغيرها .
وهل من الممكن اعاده اعمار هذا التشتت من جديد؟؟؟
ممكن .....ممكن جدا ...
بس احنا في احتياج الي رؤساء عرب ليهم الكلمه ولا تحكمهم امريكا ولا تسيطر عليهم اي ضغوط ....
نحن في احتياج الي توحيد الكلمه من الزعماء العرب فالشعوب العربيه متحابه ولكن الحكماء هم من يجعلون بلادهم كانها نعامه تخفي رأسها في الرمال خوفا من اسد مزيف
نحن في حاجه الي زعماء رجال
نحن في حاجه الي زعماء رجال
نحن في حاجه الي زعماء رجال
لنوحد الصف ....ونعيد الشمل ........ولتعلو رايه العرب ثانيا وعلي الدوام
في هذا الوقت فقط سيعود لنا الاقصي و يعود الامن علي العراق وتعيش لبنان وسوريا وغيرهم في امان .
ارجوا الا اكون قد اطلت عليكم واتمني ان تنال المشاركه علي اعجابكم اخواني الافاضل ولكل فرد احقيه الاعتراض علي مايراه ليس مناسبا .
بارك الله لكم
:):):):):):)
