انا نفسى بلدنا تبقى حلوه ونكون ماشيين فى شوارع اوروبا رافعين ر اسنا اننا مصريين نفسى المعانى الجميله اللى كانت فى بلدنا زمان ترجع من تانى وصفات المصريين المتاصلة فينا ترجع الضمير، الحب، العدل، الخير، الجدعنه، الاخلاق، الاحسان، العطف على الصغير، احترام الكبير، المساواه، وحاجات تانيه كتييييييييييير كانت ابتدت تقل وتختفى من عندنا اتمنى انها تفضل موجوده لان الحاجات دى هى اللى هتصلح وتغير كل حاجه فى مصر كانت وحشه
عشان لو عندنا ضمير واخلاق مش هنقبل الرشاوى ومش هنسمح للفساد يظهر حوالينا ده احنا كان الناس بيتكلمو عن ضميرنا زمان كان فى كاتب يهودى عارفين يعنى ايه يهودى كتب كتاب عن مصر سماه فجر الضمير احنا اقدم امه فى العالم احنا اللى اخترعنا الضمير والاخلاق
ولو فى حب وخير واحسان مكناش هنلاقى واحد فقير ف البلد او شحات بيشحت عشان يعشى ولاده او حرامى بيسرق عشان يلبس عياله كنا هنلاقى اللى معاه بيدى اللى مش معاه واللى مش معاه بيحسن ويشيل الجميل ويدعيله ربنا يزيده مش ربنا يبيده اكيد فاهمين
اما بقى لو فى عدل ومساواه مكناش هنشوف مظلومين بالبلاوى فى البلد وناس بتتعب وتشقى ويروح شقاها هدر وناس قاعده مانتخه وبتجيب ملايين فى دقيقه كان اللى بيعمل جريمه هيتحاسب عليها مش يحاسبو حد ملوش علاقه بيها واسالو كريم عبد العزيز وغيره من الممثلين كنا كمان هنشوف الناس متساويه بناتكل من رغيف واحد او من نفس طبق الباتون ساليه كنا هنلبس لبس واحد مش واحد يلبس شواله وواحد يلبس سنييه
لو فى احترام ورجوله مكناش هنلاقى راجل كبير بيتهزا وبيضرب من واحد ميسواش حاجه بس الاسم امين شرطة فى مصر مكناش هنلاقى شاب طول وعرض بيتلسع ع قفاه من حتة واحد معفن لو اتقارنو ببعض كنتو هتلاقو اللى بينضرب مثقف وحترم على اللى الكلب اللى بيضرب مكناش هنلاقى خالد سعيد مرمى جنب بيتهم وهو ميت وملامحه اتغيرت من كتر الضرب
لو فى جدعنه وشهامه واصل مكناش هنلاقى بنت واحده فى مصر واحد بيتحرش بيها او شله مش هتفرق والباقيين واقفين بيتفرجو بس موقفهم سلبى مكناش هنلاقى واحد قاعد مجعوص ع الكرسى فى الميكروباص او الاتوبيس وسايب ست شايله ابنها واقفه وعامل نفسه مش واخد باله مكناش هنلاقى واحد طول بعرض ولابس بدله قاعد على كرسي فى اى مكان وسايب راجل عجوز ساند نفسه بعكاز وهو ميقدرش يقوم طبعا عشان منظره اصله لابس بدله
لو فى كل المعانى دى مكناش هنقول عايز تغير ايه فى مصر لاننا اكيد مكناش هنلاقى حاجه وحشه فى بلدنا وفى النهايه تحيا مصر معلش طولت عليكم
