اسئلة لجميع الاعضاء_اتمنى ان الكل يجاوب ويشارك
وانا طبعا الكل فى الكل:D
.......................
•°• لمـــاذا •°•
لماذا تعشق الهدوء ... ؟
انا لا اعشق الهدوء انتى هتقولينى كلام مقولتوش يا دريم انا بحب الهدوء بس بشرط اكون بكتب ومنسجمه كده ومنشكحه ومستكنصه:D
- لماذا إخترت إسمك المستعار ... ؟
عشان هو اسمى الحقيقى لبنى بس مصر دى كتبتها عشان بحب اقرنها باسمى بلدى بقى هى دى اللى بعشقها مش الهدوء قال هدوء قال:)........................
•°• أيـــن •°•
- أين تقضي كـل وقتك ... ؟
قدام الكمبيوتر وفى البيت مع اهلى
- أين تجد راحة البال ... ؟
مفيش راحة بال طول ما احنا فى الدنيا دى راحة البال بعديــــــن فى الاخره بس لما بكون سعيده ومبسوطه بالى بيكون مرتاح :-> مش دايما طبعا
- أين تجد نفسك في البيت ... ؟
اجد نفسى مع نفسى يعنى هتروح فين
- أين تذهب لو أعطيت إجازة اليوم ... ؟
اروح اتفسح اروح اسوان مثلا نفسى اروحها بيقولو انها جميله بس اكون مع اصحابى واهلى مش لوحدى انا بكره نفسى وانا لوحدى
........................
•°• مــن •°•
-من تقول له احبك من الأعضاء...؟
كتيــــــــر ولاد ونات بصراحه بس مش هقول اسامى عشان مظلمش حد
- من علمته الرماية فرماك ... ؟
احلامى علمتها تقسى فقسيت عليا وايامى علمتها تنسى فنسيتنى
- من يعجبك من أعضاء المنتدى(( عضو واحد فقط )) ... ؟
فارس الكلمه
- من هو صديقك الصدوق ... ؟
ريم حبيبتى وصحبتى وبنتى نفس الاجابه كل مره
- من أى شئ تغضب ... ؟
من القسوه والخيانه والظلم اكتر تلاته بكرههم
.......................
•°• مـتـى •°•
-متى تبكي بحرقه ... ؟
عندما ارتكب ذنبا فاغضب الله
ولما حد يجرحنى او يزعلنى
ولما افتكر جدتى ربنا يرحمها(امى)
ولما اشوف حد كبير فى السن بيتهان
- متى تجلس لوحدك ... ؟
لما احاسب نفسى
لما اكتب والف شعر
لما اكون مخنوقه
- متى تقول لا ... ؟
بقول للبنى لا لما تعمل حاجه مش من عادتها او طبيعتها فبزعقلها واقولها لا وبكلم نفسى والله:D
- متى تكون أناني ... ؟
لما اكون جعانه :D
.......................
•°• كيف •°•
- كيف تعيش يومك ... ؟
اصحى اغسل وشى واتوضا واغسل سنانى حتى شوفوا بيضه ازاى:D
اصلى وارتب السرير واجى ع الكمبيوتر جرى قبل ماحد يحتله;)
واكل بقى وصلاه فى النص ولو عليا الاكل اقوم اطبخ طباخه ماهره انا ع فكره;;)
اكتب اللى نفسى اكتبه واشوف المتشات ايه نظامها واخبار الرياضه
ولوفى مشوار ده لو فى اصل انا مبحبش اخرج كتير بيتوتيه جدا اخد الحراس بتوعى(اخواتى) ونغادر المنزل بلا عوده لحد ماحد يسال علينا وف الغالب محدش بيسال بيصدقو ما يقلبونا فبنيجى بكرامتنا:D:->
وبعدين عشا ونعيد الكره من اول اغسل وشى واتوضا واغسل سنانى واذهب للخلود الى النوم:)
- كيف ترى حال الأمة اليوم ... ؟
معرفش بصراحه بس انا خايفه جدا حتى امبارح حلمت القيامه قربت وان دى اول سنه بتقرب القيامه بجد وانا احلامى بعيده عنكم دايما دايما بتتحقق بس مطمنه شويه عشان ربنا كرم مصر وحفظها وصانها فعشان كده شويه مطمنه وربنا يستر بس هو حال ميسرش وكمان حال المسلمين لا يسر ابدا ربنا يجيرنا
- كيف تنظر لمستقبلك ... ؟
غامض كل الغموض بس اتمنى انه يكون الجزء المظلم فيه قليل وتبقى حياتى منوره يارب اصل انا حاطه حاجه فى ترتيباتى واحلام ربنا يحققهالى وكل احلامى مركزاها فى ولادى اللى هجيبهم ان شاء الله نفسى اربيهم بطريقه مختلفه غير الناس تشوفوهم تقول ربنا يخلى البطن اللى جبتكم متربيين ع العباده وعلى حب مصر وع الاحترام وعلى كل المعانى الجميله واعوضهم عن اى حاجه انا اتحرمت منها
- كيف تنظرين للرجل (( إذا كنتِ عضوة )) ... ؟
الرجل هو الامان هو العطاء هو الرجوله هو الغيره هو الجدعنه والشهامه والاصل هو الحب هو ابى واخى وزوجى وابنى هو ادم الحياه ولو فى حاجه تانيه فكراها كنت قولتها
.......................
°• ما •°•
- في عصر العولمة الحالي (( ما رأيك في حب الإنترنت )) ... ؟
لو تقصدى حبنا للانترنت فهو حب لاله جديده كانت غريبه عنا تواصل الناس ببعضها له مميزات وعيوب فالذكى والعاقل ومن رضى عنه ربه من يستغل المميزات
اما لو تصدى حب البنات والشباب ع الانترنت فهو حب زى اى حب مينقصهوش حاجه غير انه جديد علينا وف كل الحالات الحب بالطريقه دى حرام وده اللى قاله الدين بس يبقى صدق لو انتهى بجواز ع الاقل عشان البنات متعنسش:D
- يقال أن الحب يمحو جميع العيوب والأخطاء في المحبوب (( ما تعليقك )) ... ؟
الحب لا يمحو العيوب او الاخطاء هو بيداريها بيخبيها بيخفيها بس بتظهر لما بيبقل او بينتهى ربنا بيقول (لايغير الله ما بقوم حتى يغيروا ما بانفسهم) يعنى مش الحب اللى بيغير او بيمحو الانسان نفسه هو اللى بيعمل كده ومفيش اصدق من كلام ربنا
- ما هو سر نجاحك في الحياة ... ؟
السؤال ده يتسال للى نجح واللى نجح هو اللى استثمرها صح قبل ما يروح لحياته التانيه(الاخره) وربنا جزاه بالجنه لكن احنا لحد دلوقتى خسرانين لاننا لسه عايشين او بمعنى اصح مستنيين الامتحان ينتهى اللى هو الحياه الاولى وتظهر النتيجه اللى هى حساب ربنا وننجح ونفوز بالجنه فى الاخره ده رايى
- ما أجمل مافي الحياة في نظرك... ؟
رضا ربنا
رضا الوالدين
السعاده
الاصدقاء
الزوج الصالح
الذريه الصالحه
وبعض المعانى الجميله التى يستطيع ان يمتلكها الانسان
كالنقاء والضمير والحب والتسامح والرضا وحاجات كتير
.......................
•°• هل •°•
- هل أنت عاطفي ... ؟
الى ابعد الحدود وهى دى اللى موديانى فى داهيه وبتخلى الناس تتريق عليا ومنهم اصحابى الجزم
- هل صدمت بالخيانة من أعز أحبابك ... ؟
الحمد لله لا ابدا وربنا ما يصدمنى ابدا بيها ده انا بكرهها من غير ما احس بيها امال لو حسيت بيها هيحصل ايه سيدنا على ابن ابى طالب قال لو كان الفقر رجلا لقتلته وانا هقول لو كانت الخيانه رجلا او حتى امراه لقتلتها ان جاز لى التعبير
- هل أنت فوضوي ... ؟
منا مش فاهمه معنى فوضوى دى بس لو تقصدى بعمل فوضى يعنى بصراحه هو لا فى المعظم لكن احيانا بتفوضو حلوه بتفوضو دى:D لما مبيكونش ليا نفس لاى حاجه
- هل كنت صادقاً في كل ما قلتة ... ؟
جدا الى ابعد الحدود ولو عقلى كدب عليكم فى اى حاجه هاتوله جهاز الكدب ولو قلبى ضحك عليكم يارب ينهشه كلب:D:D
بجد يا دريم كانت اساله فى منتهى الجمال احلى اساله جاوبت عليها لحد دلوقتى اتبسطت جدا وطلعت كل اللى جوايا مرسى يا حبى واتمنى مكونش تقيله عليكم
وربنا يوفقك يارب فى حياتك كلها دايما متميزه
بحبيكى يا بت:x:x:-*
