من/مشكله
الى/الى كل الاعضاء
الرساله/
وحياة مامت فخامتك ... طيب وحياة سوزان
تسامحنى عشان شتمتك ... وانا واقف فى الميدان
كان المفروض اجيبك ... وتشوف شعبك حبيبك
علشان تاخد نصيبك ... من الحب والحنان
انا اسف وبصراحه ... اصل مكنتش اصيل
.........يا معلمنى الاباحة ... نفسى ارد الجميل
يا مظبط اهل بلدك ... اكتر من اسرائيل
هتقولى ايه الى فيها ... هقولك فيها فيل
انا اسف انى سبتك ... تخلع من غير حساب
كان المفروض حاسبتك ... زى ما قال الكتاب
مبننساش الجمايل ... والشعب فى قلبه شايل
وهنعمل فيك عمايل ... والبركه فى الشباب
فى اكتر من حريقه ... وفى كل بيت شهيد
فاكر اهل الدويقه ... فاكر قطر الصعيد
طب سرطان الخضار ... والعيشه الغاليه نار
والمعبر والجدار ... ولا الفكر الجديد
اسف علشان سكتنا ... طول الوقت الى فات
وانت مسود حياتنا ... وبتسرق مليارات
دلوقتى الفرصه جتنى ... وهحاسبك على الى فاتنى
وهرد حقوق بلادى ... واخد حق الى مات
اسف لجمال وعزمى ... ولصفوت ولسرور
كل الى مصو دمى ... ولسه فى القصور
اسف علشان سايبكو ... وحياة بلدى لاجيبكو
وفى التحرير بانيلكو … احلى واجمل مكان
