خيانـــــــــــــــــــــ ـــــه
صارحينى يلا قوليلى واحكى وبأمانه
خنتينى قاصدة ولا جت صدفه الخيانه؟
من بين شباب الدنيا وقفت دايرتك
على حب عمر صديقتك الأنتيم جومانا
كنا زمان اتنين مفيش أمثالنا ياما
تمشى وتيجى وشايلة ليكى الابتسامه
لو مرة تشكى تهدد الأحزان كيانى
وان يوم بكيتى كأننا ف يوم القيامه
ولما جانى وقال بحبك كنتى ضِلّى
أسرارى تجرى عليكى وتبوحلك تملّى
وقولت هيا صديقتى وصدايا الجميل
وان ضاع أمانى تكونى أجمل شئ فاضلّى
ونصحتى ياما وقولتى سامحيه دا الحبيب
إديه أمان خليه يكون منك قريب
واوعى تسيبيه لحد يرسمهم عليه
وكنتى فعلا إنتى لجراحى الطبيب
دلوقتى ليه مع حب عمرى تخونى فيا
ترضى لحبيبتك بالهوان أو بالأذيه
وانتى اللى عارفه بإن حبه ف قلبى ساكن
وبرغم ده مثلتى أحسن تمثيليه
ورسمتى انه بيشتكيلك منى وانك
بتحاولى ليا تجددى الأشواق لكنك
خايفة الشيطان يدخل مابينكم ..يعشقك
وتدوبى برضو انتى ف هواه ودا غصب عنك
ووعدتى إنك تبعدى وبشويش تخِفّى
وحلفتى دايما راح تكونى يانور فى صفّى
أخرتها أعرف زى أى غريب عليكى
إنك وإنه مضيتوا عقد جوازكو عرفى
وتقولى صاحبة وأخت وياها استكانه
للجرح والحزن الأليم لو يوم لَقانا
نفسى تقوليلى بجد يلى وثقت فيكى
خنتينى قاصده ولا جت صدفه الخيانه؟!
