سؤال طفل
-----------
أنا هحكيلكم موقف حصل معايا ضايقني لدرجه أني مكنتش عارفه أرد علي طفل عند
8 سنين (الطفل دا يبقي اخويا الصغير) في مره قبل ما أنام لقيته مش عارف ينام وقعد يتحايل عليا عشان احكي له حدوته أنا مكنتش عارفه حواديت وكل الي اعرفهم حكيتهمله قبل كدا المهم جتلي فكره آني احكي له قصه عن الإسلام
الكلام خدنا و حكيلته قصه الإسلام من أوله لحد فتح مصر وقلتله إننا خير جنود الأرض وان إحنا مفتاح خزائن الأرض وإننا كنا بندي الأكل للدول التانيه عشان مفيش عندهم أكل عشان كدا مصر أم الدنيا وقلتله إن بالإسلام مصر بقت اقوي
المهم الحمد لله احمد نام
تاني يوم قعدنا نتفرج علي التليفزيون وأنا بقلب لقيت اوبريت الضمير العربي شغال سبته شويه بعد كده خفت إن مناظر الدم تخوف احمد قلبت من علي للقناه وبرده احمد قعد يتحايل عليا لحد ما رجعت ألقناه تاني بعد ما أتفرج عليه مخلصتش من الاسئله من الوأد الغلباوي دا
المهم انه سألني في الأول هيا الناس دي وتضرب الناس التانيه ليه؟ وليه بيقتلو العيال؟ هما عملو غلط؟
طبعا عرفت ان الموضوع طلما اتفتح مش هخلص خصوصا انه بيسال في كل حاجه قلتله يا حبيبي دي دوله بتضرب دوله تانيه عشان عايزين ياخدو ارضهم
احمد
: طب وهيا ارضهم صغيره عشان كدا عايزبن ياخدو ارض التانين دول؟
انا
: لا يا حبيبي هما ملهمش ارض اصلا دول اليهود الي عايشين في العالم كله عايزين يعيشو جوا فلسطين عشان زمان كان في راجل اسمه بلفور وعدهم انهم يعيشو هناك
احمد
: طب وليه وعدهم بكده هو يهودي معاهم؟
انا
: يوه معرفش بقي اسكت ياحمد
احمد
: طب خلاص سؤال كمان وهسكت
انا
: طب اسال
احمد
: هيا فلسطين دول مصريين؟
انا
: هههههههه لا دي دوله غير مصر خالص بس هما عرب زينا
احمد
: طب هما مسلمين زينا؟
انا
: فيهم مسلمين ومسيحيين ويهود
احمد
: طب الناس الي بتضربهم دول ليه ضربوهم هما مضربوش حد غيرهم
انا
: عشان فلسطين فيها القدس وهما مش ضربو فلسطين بس دول ضربو دول تانيه معاهم زي لبنان
احمد
: وبرده مسلمين زينا؟
انا
: اه وكمان عرب زينا
احمد
: هما كتير اوي كده عشان كدا عايزين ارض كبيره
انا
: لا هما عايزين الخير والاكل والحاجات الي فيها مش الارض بس
احمد
: طب انتي قلتيلي امبارح ان مصر كانت قويه واننا كنا بنحمي العرب كلهم والمسلمين
انا
: اه قلت ويارتني ما قلت
احمد
: طب هيا مصر ليه مش ساعدتهم زي زمان ورجعتلهم ارضهم
انا
: عشان دي دوله قويه ومصر لوحدها مش هتقدر عليها
احمد
: طب في الاغنيه كانو بيقولو العرب اخوات و انتي قلتي ان مصر عرب والدول المحتله دي عرب برده صح
انا
: اه خلصت اسئله بقي
احمد
: معلش سؤال كمان عشان خاطري
انا
: اتفضل قول
احمد
: يعني الي بينضربو دول وبيموتو يبقو اخواتنا ؟
انا
: للاسف اه ياحمد
احمد
: طب ليه الدوله القويه دي مضربتناش زيهم
انا
: عشان مصر دوله قويه وممكن ميقدروش عليها
احمد
: بس انتي لسه قايلالي ان مصر لوحدها مش هتقدر عليهم وممكن كده يضربونا زيهم
انا
: انا قلت ان مصر قويه بس محتاجه كل العرب عشان يغلبو الدوله القويه دي
احمد
: يعني لو هما ضربو مصر لوحدها ممكن يضربونا ويموتونا زي ما بيضربو الناس دي؟
انا
: قلتلك مصر قويه ومش هيقدرو عليها
احمد
: لو مصر قويه وام الدنيا زي ما قلتيلي مكنتش سابت اخواتها ينضربو كده ولا هيا بتكرههم؟
انا
: لا في حد يكره اخواته
احمد
: طب لو هيا قويه زي ما بتقوليلي ليه سايبه اخواتها تنضرب واحنا ليه مش بنضرب الناس الي بيضربوهم دول؟
انا
: اسكت بقي مش انت قلت سؤال واحد ومش هتسال تاني
احمد
: طب جاوبي السؤال دا ومش هسال تاني خالص
انا
: لا مش هجاوب واسكت بقي
احمد
: انتي مش عارفه الاجابه ولا مش عايزه تقوليلي
انا
: علي فكرا انت مبتعملش بكلامك انت قلت مرتين انك هتسال سؤال واحد وبس عشان كدا انا مش هجاوبك علي السؤال دا عشان تسكت بقي
احمد
: طب هما في اول الاغنيه مش عارفين الشهداء كام واحد طب ليه مش يعدوهم ويعرفو مين فيهم الي بيتكلم صح؟
انا
: عشان هما كتير اوي ومش هنقدر نعدهم كلهم
احمد
: طب هيا القدس بتاعت المسلمين؟
انا
:القدس للمسلمين والمسيحين واليهود
احمد
: طب ليه هما عايزين ياخدوها ليهم هما بس
انا
: معرفش بقي يا احمد
احمد
: طب قوليلي مصر ليه مش بتحميهم زي زمان وانا هسكت والله
انا
: انا قايمه وسايباك ومتجيش ورايا
المهم طلعت البلكونه وبصراحه مكنتش عارفه ارد عليه او اقله ايه اننا ضعفاء وممكن يضربونا زيهم واخوفه من مستقبله كله ولا اننا اقوياء ومش عايزين نساعدهم
ودا كان سؤال طفل تعرفو انتو الاجابه؟؟؟:(
