:::::::::: أميرة :::::::::::::: قصيدة للشاعر الرائع أحمد الشربينى
وهذه القصيدة كتبها لطفلة رقيقة شفاها الله
أميــــــرة
قلبى مابقاش عنده سيرة
إلا سيرتك.. يا أميرة
كالمحيط الهادى.. موجه
وانتى فيه..
أجمل جزيرة
لسه فاكر لما شفتك
جوه قلبى..
طبعت صورتك
نبضه ترجمها لمعانى
زى أنفاس المشاعر
لما تحضن.. نبض شاعر
وقت ماتحن الأغانى
زى وردة خدودها نادية
زى نسمة صبح هادية
لما بتسرسب فى روحى..
وف كيانى.
يااااه .. يالحظة لما شفتك
قلبى رفرف.. بين ضلوعى,
وقال عرفتك
حس طعم الدنيا.. جنه
طار وغنى
دى الحياه.. بقى ليها معنى
وابتديت اعشق زمانى
يا أميرة.. ياللى إسمك
تاج ومتفصل لرسمك
ياااه..
ياعنوان البراءة,والطيابة
ياسما من غير سحابة
قولى : عمو
قولى: بابا
مش هاتفرق ..
كل أشكال الكتابة
دانتى مية طهر تغسل,
م الحياة طعم الكآبه.
تفصيلات وجهك..
ملايكى,
والعيون بالحب تحكى
أحلى سيرة..ياأميرة
رغم فرحى..
اللى بان ف سطور ملامحى
غصب عنى,جوه منى..
قلبى حسيته بيبكى.
الساعات فاتت ثوانى
والفراق..
مكتوب عشانى
نفسى أضمك
ضمة تكفى الكون بحاله
ضمة ماتساعهاش معانى
كنت بين الناس, وقلبى
سيبته عندك
حدعارف,
طول مافيه باقيه الأمانى
يمكن ارجع ليكى تانى
دانتى سيرتك..
أحلى سيرة
ياحبيبتى يا أميرة
