ياللى علمتينى كلمة اه عذابى
ياللى دوبتى ف عذابك كاس مرارك
مدتيلى
خمر ريقك
وبكسات الحزن دورتى
فى وريدى
كنتى ناويه تبلى ريقى
من ألأمك
من عذابك واشتياقك
من رحيلك دوبت فيكى فنستينى
وطوفتى تانى بحلمى وبكل الامانى
تستسمحينى
وكان سماحى
بس لحظه وكان عنادك
لثأر ماضى
رحتى تانى لشخص تانى
بشهد ريقك تخمريه
وعايزه ايه
تقتليه
طاب وليه
هو حبك مفيش مثيله
وايه بديله
تكرهى كل الوجود
تحزنى وحبك يعود
مش وعود
حبك انتى من سنين
ضاع وولى
هو سابك فى عذابك
ليه تضيعى من ألامك
وتاخدى تارك من شخص تانى
زنبوا انوا حب روحك
ليه تدوسى اليوم جروحى
كات جروحى نايحه روحى
وف ألامى كان طبيبك
ياللى علمتى الفراق كيف يكون
ياللى علمتى الحياه معنى الجنون
كيف يكون ارتحالك
بين ورودى
وبين شطوطى
بحرى منك يا ما فاض
فاض عذاب
وموج حزين
هادر وثاير م ألانين
ليه تكونى
فى جروح الناس سعيده
تفرحى بمر الكلام
وتقتلى البسمه العنيده
لما تيجى فى هيام
دورى دورى
ولفى دورى
بين شطوط الدنيا دورى
اوعى بس يجى تانى
عليا دورى
وتألمينى
وتوجعينى
وتقولى حبك انت كان
كان زمان
بين ضلوعى
حبك انت لما لان
شفت فيه ضعف وسلام
عايزه احب حب غادر
عايزه اطوف بين ألوف
عايزه أهيم
وأنشر الدمع اللئيم
بين ألوف
عايزه أصرخ من أنينى
عايزه أقتل كل طيبى
عايزه كل يوم شهيد
عايزه حبى يكون عنيد
يقتل الفرحه فى عيد
عايزه اسخر م الشباب
عايزه أثائر م اللى فات
عايزه أقتل كل قصه فيها حب
أقطف الزهره النديه
وارتوى من كل حب
عايزه احلم حلم أبدى فيه اعيد
كبريائى جوا قلبى من جديد
ومش بأيدى يا حبيبى حزنك انت
لو بأيدى كنت هفهم ان حزنك جرح ليا
ياللى علمتينى معنى الانسانيه
لما تجرح
ياللى علمتينى أفرح من دموعى
لما تيجى وتسكنى ما بين ضلوعى
ياللى كنتى ف يوم حبيبتى يلا روحى
واحلمى بتارك ونوحى
وأبعدى عن شط ليا
كنتى دايماً مفتريه
فى عذابى
يالا روحى
أرضى بارت خلاص وجارت
أرضى جفت من جروحى
وقلبى مات من عذابك
ياللى خليتى ورودى طارحه شوك
عمر عودى ما كانلوا شوك
كنت دايماً بحلم الحلم الجميل
عاد كابوس ومستحيل
ياللى علمتينى اكتب من جروحى
واستبحتى الحياه جوا روحى
تاخدى روحى وتبعدى
جسمى عليل
وكيف يصير
بعد روحى منك انتى راح تطير
تملى نظرك منى تانى
وتضغطى على جرحى تانى
انزف ابكى تفرحى من ألاّمى
وتقولى لازم اخد بتارى من اّلامى
انت اول عشق جانى كان نصيبى
هاخد بتارى من حبيبى
ف صورتك انت
وده نصيبك
والغريب انى بحبك
والغريب ان فبعادك كنت جنبك
كل ده ولسه بحبك
ياللى علمتينى معنى الحب نازف من وريدى
ياللى علمتى العذاب كيف يكون
فوق جبينك
كان عذابى فيكى راحه
بجد راحه
وبصراحه
مش هسيبك
يوم تضيعى
بثأر ماضى من حبيبك
ليه تضيعى
بثأر فاضى
بصى للدنيا الزكيه
انتى بسمة نور شجيه
حرام تضيعى بحب ماضى
من جروحى معادش ليا
غيرك انت تكون طبيبى
هجمع النسمه النديه وأهدهالك
وأدعوا ربى كل يوم يهديكى ليا
ومش هسيبك يا صبيه
تضيعى منى مره تانى
جسمى اهوا من امامك
أقتليه واشفى جرحك
لو نصيبى أموت بأيدك
يكون ميلادى
حبك انتى صار ميعادى
ولو عذابى يطفى نارك
عذبينى
واوعى يجى عليكى يوم
وتكرهينى
حبك انتى طاف عليا
وارتمى ف حضنى وحوانى
ومنك انتى مش هتوب يا حنانى
احلى حاجه فى عذابى انك تتوهى
وترجعى
عارفه سكت حضنى فيه تتوجعى
حضنى ضمك من زمان
حتى جرحى صار حنان
بين ضلوعى
ومش هسيبك يا صبيه
ترحلى ما بين دموعك
المس الدمعه الغريقه
نازفه من عينك بريئه
واشفيهالك
وامسح الدمعه الشقيه
من جفونك
واحتويكى بين رموشى
يا صبيه كونى ليا
