الحلقة الرابعة من برنامج مصراوي اليوم ( حلقة خاصة عن الثانوية العامة )

السلام عليكم و رحمة الله و بركاته

أهلا بيكم معانا في رجوعنــا بالحلقة الرابعة بعد توقف طويـــــل أوي

حلقة النهاردة مليانة و مختلفة خالص عن الحلقات اللي فاتت

حأقدمها لوحدي و أوعدكم من المرة اللي جاتية ورقة حتبقي معايا

أهلا بيكم في رابع حلقة لينــا و موضوع الحلقة النهاردة عن

( الثـــانوية العـــامة )

قبل ما أبدأ الحلقة .. اتفرجوا علي الكليب دا الأول و بعدين نبدأ

انا مش عارف أقول حاجة .. بس موضوع الجامعات دا، دي جامعات خاصة يمكن
عموما كلمة واحدة يا خســـــارة !!!!
و سؤال واحد ليـــــــــــــه ؟!!!!

ـــــــــــــــــــــــــ ـــــــــــــــــــــــــ

بعد المقدمة و الكليب دا نبدأ برنامجنا
معانا النهاردة أسماء أوائل الثانوية العامة و بجد حاجة تفرح لما الواحد يشوف انسان متفوق

و طبعا من جد و جد، و ربنا مبيضيعش تعب حد حتي لو اتظلم

المهم آدي أسماء الطلاب المتوفقين في علمي علوم و علمي رياضة و أدبي

بس أحب أضيف إن الأوائل برضه بياخدوا دروس ياللي بتحربوا الدروس الخصوصية

تلاقيكم انتوا اللي بتشجعوا الدروس دي

عموما ألف مبروك للأوائل و يلا الاسكندرانية طلعوا الأوائل في علمي رياضة

بس مش غريبة شوية و لا واحد من المنيا يطلع من الأوائل و لا ايه !!!!!

أوائــــل الثـــانوية العــــــامة .. أدخــــل هنـــــا

ألف مبروك يا شباب و يا بنات و بالتوفيق في الكليات ان شاء الله

ـــــــــــــــــــــــــ ـــــــــــــــــــــــــ

.:: النتيجــــــة ::.

امبارح كان يوم غريب جدا جدا .. يوم أقدر أسميه الأبيض و الأسود
أبيض علي كل واحد جاب نتيجة بسم الله ما شاء اله عليها أو عالية شوية
و أسود علي كل واحد شال كام مادة و اللي جابوا درجات منخفضة جدا

خلونا نبدأ مع اللون الأبيض
الأهالي فرحانة جدا .. زغاريط و أحضان
الطلاب الفرحة مش سيعاهم بيكلموا أصحابهم
يتطمنوا عليهم يعرفوا حد جاب أكتر منهم كدا يعني
و بيبقي من أسعد الأيام في حياتهم

نروح بقي للون الأسود
حسرة الأهالي تقدر تشوفها في عيونهم
انكسار الطلاب .. الشعور بالخيبة و الضياع و الضيق
مبيبقاش عايز يكلم حد و لا حد يسأله عملت ايه و الكلام دا كله
حيرد يقول ايه !!!

طيب حأحكلكم عن حاجة شوفتها بعنيا
امبارح نزلت أشوف حيبقي ايه ردود الأفعال في الشارع و الاهالي و الطلاب و كدا
نزلت لقيت واحد قاعد علي الرصيف و ماسك راسه و عمال يعيط
مشيت حبتين قدام لقيت واحدة عمالة تعيط و تجري
.. بيني و بينكم المنظر كدا ميطمنش خالص ..

شوية كدا لقيت كام طالب ثانوي عمالين يضحكوا و مبسوطين علي الاخر
اخيرا لسه ببدأ ابتسم و أقول خير .. سمعت حته قلم علي وش بنت
بأدور لقيت الأم ماسكة البنت و نازلة فيها ضرب
و اللي ساكت و متنح .. و اللي قاعدة و عمالة تعيط
و امتزجت الدموع بالأفراح و كان أغرب يوم تلاقي في مشاعر متناقضة كدا
رجعت البيت مش مجمع ايه اللي حصل .. و بأقول الحمد لله ان الواحد طلع منها علي خير

ـــــــــــــــــــــــــ ـــــــــــــــــــــــــ

.:: خبر آخر زمن ::.

حد يعرف عن الطالب المدعو " صفــوت " طالب في الثانوية الصناعية
الموضوع كله انه كتب في ورقة امتحانه ( حاكم ظالم و شعب مظلوم )
و طبعا علي الفور تم إلغاء امتحان الطالب و حرم من باقي الامتحانات
اتفرجوا علي الكليب دا ملخص للموضوع كله



طبعا مفيش تعليق و لا اي كلمة بعد الكلام دا كله
ـــــــــــــــــــــــــ ـــــــــــــــــــــــــ

.:: عنــاوين الاخبـــار ::.



شهد الكافيه ليلة أمس اقبال غير عادي خصوصا علي قسم نتائج الشهادات العامة
و حطم أرقام قياسية أتحدي اي منتدي تاني يكون حققه
بدأ الموضوع في حوالي الساعة 10 امبارح بالليل .. بدأت حركة تسجيل كتير جدا
و زوار و أعضاء لغاية لما أصبح أكبر تواجد بالكافيه 2217
و دي صورة لكمية الاعضاء اللي كانوا موجودين علي الكافيه امبارح الساعة 3 الصبح

http://www.masrawycafe.net/upload/up...f484e4caf2.jpg

:D
:: خبر بره موضوع الثانوية خالص .. تم ترشيح العضوة مريومة للعصر ::
:: دي اعتبروها دعوة عشان الكل يدخل يعصر .. دي فرصة و جت لغاية عندنا ::
:: شارك و لو بسؤال .. خلوا مريومة تتعصر ::
:D

ـــــــــــــــــــــــــ ـــــــــــــــــــــــــ

شكرا ليكم لمتابعة الحلقة المتعلقة بالثانوية العامة و بس
و أحب أختم بـالكليب دا .. الحلقة النهاردة مختلفة جدا
حبيت أعرض الثانوية العامة في الموضوع بس الثانوية دي بحر واسع

مستني الـ SMS بتاعتكم كلها عشان تتعرض في الحلقة اللي جاية
و الـSmS القديمة برضه حتتعرض الحلقة اللي جاية
أتمني تكون الحلقة عجبتكم .. معلش بقي كانت عكننة حبتين
بس واقع و لازم نعيشة، ربنا يكرم كل الطلاب
الكليب عن التعليم في مصر .. أنصحكم تتفرجوا عليه
و مستني تعليقاتكم طبعا

sms
thnx ya hamada 3la el 7alka el nakad de7 bas wa7shtna el akhbar el gamela
7wa tab3an 7asby allah w n3m el wakel fe wazer el ta3lem
bas el 7ya 7elwa w sebk enta
plz el 7laka elly gaya tkon farfsh baka w trfa7 3nna ya3ny
w 1000 1000 mabrok l 7abibty soso 95% 3LMY
W MABROOOOK LBAKY EL BASHAR ELY NAG7O
LOOOOOOOOOOOOOOOOOOLOLOLOLYYYYYYYY
BYE BYE

السلام عليكم ،،

المشكلة كلها في الكليب الأخير ده (( التعليم في مصر ))
بعد ما اتفرجت عليه حسيت اننا كده خلاص عدينا وخلاص هنعبر تاني :)

كمان بالنسبة للمنيا ليه محدش فيها من الأوائل لأن الطالب اللي بيعش ممكن ينجح بس صعب يبقي طالب متفوق وربنا بردوا عادل

وكمان ممكن يكون علشان الموضوع انتشر والناس كلها عرفت الحكاية ;)

في الآخر ألف مبروك لكل الناجحين وإن شاء الله تدخلوا الكليات اللى انتم عايزينها

وربنا يكون في عون اولياء الأمور ,,

اهلا احمد

بعتقد انا كان ومازال لي وجه نظر ف الثانويه العامه ما تخرجش بعيد عن انها دمار للى يفترض انهم قاده و رأساء و مديرين و اطباء و مهندسين و و و المستقبل
دامار لعقلهم حيث الحفظ بعيد عن الفهم و دمار للاعصاب و دمار للاسره عموما و بخصوصا لمتوسطى و محدودى الدخل ..
اقولك حكايه
اعرف حد كان قاعد جانبه واحد ف كليته الفرق بين الحد دا و التانى ما يقارب 50 د و الاتنين ف نفس الكليه و اتنساب تعرف ليه؟
لان الاولانى كان للاسف علمى :-B والتانى لحظه ادبى I-)
ليك انك تعرف الحكايه دى بس علشان تعرف لاد ايه وصل الحال
نسيت اقولك ان بتاع الادبى لسه ف الكليه لحد دلوقتى >:D<
ان شاء الله الحلقه الجايه تكون ورقه موجوده لانها اضافه حقيقه للمنتدى و للموضوع

شكرا ليك احمد و عودا احمدا :)

اولا هلا بعودتك يا زعيم

ثانيا بقى بنسبه الثانويه العاميه

انا كنت فى السيبر بطلع النتيجه للولاد و البنات

بصراحه الدرجات :-S:-S مفيش حد جايب اكتر من 86 %

و فى اللى راسب فى مواد

انا من وجهة نظرى

((ان المدرسين اللى جابوا الامتحانات متعمده انها تجبها صعبة عشان محدش يخش كليه حكومه

يخشوا كليات خاصة و معاهد خاصه عشان يكسبوا #:-S#:-S))

الحلقة المرادى جامده اوى يا زعيم ((البطيخ ))


الف الف الف الف الف بمروك للناجحين

الله ينور عليك يا احمد

حلقة تمام بجد

بس الواحد خلاص راحت عليه بقى بالنسبة للتعليم

بس طبعا اللي بيحصل دلوقتي ده

حاجة بعيدة عن التعليم خالص واكيد في حكمه من كده

بس هنعمل ايه تعالوا شوفوا الحزن اللي احنا فيه من امتحانات ومن سياسة الدولة ولا من اللي بيحصل عندنا في الفيوم

واكيد الدنيا كلها عرفت عن اللي حصل عندنا

في عارف والله الواحد يعمل ايه

يعني احنا عندنا في العائلة ممكن يكون خمسة او سته في الثانوية العامة

كل بيت تحس انه في حالة وفاة

بس في النهاية

قدر الله ما شاء فعل


آسف للاطالة

فعلا يوم النتايج دة كان مهرجان حتى عندنا متعرفش مين فرحان ومين زعلان

بس الله يكون في عون الكل

واللي بيذاكر بيلاقي تعبه حتى لو الامتحان صعب جداااا

و الحلقة جامدة المرة دي دوم على طول

ومبروووووك للناجحين :)

حبيت اشكرك على الحلقه المميزة
تسلم الايادى يا رب

ويا ريتنى اقدر اعلق واعطى الموضوع حقه من التعليق
ولكن تسلم ومميز كالعادة
اتمنى ان نرى ورقه في الحلقه القادمة ان شاء الله

و الله أنا شايف أن علمى علوم دراجتهم راءعة

اضافة غالية - كنت مراقب ثانوى هذا العام
تسرب الاسئلة بصراحة
1 - توصية مدرس المادة نفسة بهذا - عن طريق سماعة بلوتوث تبقى مع الطالب او الطالبة تحت الخمار والتليفون فى شنطة اليد بره اللجنة
وبعد 10 دقائق يرن على الخط والتليفون صامت - تفتح البلوتوث اتوماتيك - والتلميذ او التلميذة تبدأ فى قرأة الاسئلة بصوت مناسب يسمع الطرف الاخر
ويبدأ الاجابة وحدة وحدة قوة الملاحظة من المراقب نعرف بعد فترة تكون نصف او كل الاسئلة تسربت
2- توصية مدرس المواد للطلبة انه يعمل شغب بالجنة ولا يحترم الملاحظ ويبدأ باستفزاز الملاحظ
واذا حضرت الشؤن القانوية تترك التلميذ وتتهم الملاحظ - بتوتر التلميذ - وترهيبة من الامتحان - والوزارة لاتعطى حق الملاحظ فى هذا الامر نهائيا ولو تم عقاب التلميذ فى اليوم التالى لم يجرؤ تلميذ على شيىء سىء لان عدم حضور الشئؤن القانونية فى اليوم التالى وترك الموضوع لاخر يوم او لا تحضر نهائيا احيانا يعطى فرصة للتلاميذ الاستمرار فى الشغب وبلاش نطلع سر - الوزارة خرصتنا نهائيا - ممنوع احد يكشف سر اى حاجة والا مصيرة هيكون زى التلميذة ( طارود) اللى فى 90 دقيقة
تسرب الاسئلة كمان بالطريق الاتية
بتوصية المدرس واولياء الامور - يجلس التلميذ عند استلامه ورقة الاسئلة من اول دقيقة يقوم بلفها صغيرة ويرميها من الشباك لحظة استلامها بقليل
ويكون فى انتظاره اخوته او اقاربه والمدرس الذى يحل المادة يلتقطوها بسرعة ويذهبوا - وعند اكتشاف الامر بسرعة0 الورقة اصبحت بالخارج فى لحظة
لو رئيس اللجنة تكلم اصبحت مسؤلية الملاحظين ومراقب الدور ورئيس اللجنة - والكل يسارع للحل - يستدعى الضابط لحضور الورقة - لكن تم تصويرها
فنطلب من الوزارة اعطاء الملاحظ ورئيس اللجنة حق اكثر من هذا - واعطائة الحق فى التبيلغ عن اى مخالفة - موش يعاقب - لو عوقب الكل هيسكت - هيدارى ويخاف من الجزاء - او العقاب من اللى عاوز يققم افواهه
نوعية الامتحان
الامتحان فى الثانوية لابد تكون به سؤال واحد فنى يفرق بين التلميذ الذى يدخل كلية القمة والذى يدخل باقى الكليات موش يكون ابنى مستواه تعبان بدرجة 60% , 70% واقف واقول منهم لله عاوزين يدبحو التلاميذ
مع الغاء الجامعات الخاصة التى هى سبب
تدهور الفرص فى التعليم فى مصر - نقول الغش بيضع على اولادنا الفرصة - الجامعات الخاصة ايضا تضيع الفرصة اكتر واكتر واكتر
لان واحد طالب جاب 80% ابوه غنى هيدخله طب او صيدلة او هندسة طالب اخرعادى جاب 93% موش عارف يدخل طب ولا هندسة ولا صيدلة ضاعت الفرصة امامه علشان والدة على قد حاله
بس لو قلنا يادولة حرام عليكم اصحاب المصالح هيقولو دة تخلف دة -------- ودا الخ وهم من يحكموا ويتحكموا بهذا المنصب
اصبحنا زى العهد القديم اللى له واسطة او ابن غنى اقطاعى يعمل كل شىء فى البلد عايزين واقفة حلوه من الرئيس حسنى مبارك
لان مصر اخدت على ان جميع الحلول يتدخل فيها حسنى مبارك - هيعمل ايه ولا ايه ويكون الحل ان الذى يدخل التعليم الخاص يكون حاصل على مجموع عالى بنفس النسبة التى تنزل فى التنسيق لكليات القمة من الدوله بس يكون لهم امتيازات خاصة لانهم تعليم خاص-- موش اللى جايب 80% يدخل صيدله وطب لا لابد يكون نفس تنسيق الدولة 97 % او 96 - وهنلاقى من يدافع عن التعليم الخاص بشدة اللى هو صاحب المصلحة وخايف لحسن تتلغى
تحياتى اخيرا للمنتدى

:)

حلقة روعة بصراحة يا ابو حميد
وأحنا متعودين على كدة علـــطول
ومنظريـنكم الحلقة القادمة بأذن الله
بس ياريت تـــــــــكون فرفشة شويــــة
وبالتوفيق للجميع ومبوووووووروك للناجحين
وعقبال الجميع لما نشوفك كدة ان شاء الله دكاتره
بأذن الله ومن جد وجد زى ما بيقولووووووووووووووووا
وياريت الاخت الغالية ورقة تشرفنا فى المرة الجاية ان شاء الله
الحلقة القادمة يا ريت يعنى عشان وحشتنى اوووووووووووووى وربنا ....

:)

والله الحكايه ظاتت عشان كله بيتساوى فى الأخر وماحدش بيدخل اللى نفسه فيه:-/:->

تسلم ايديك يا احمد على الحلقه الرائعه والمتميزه
انا مش عارفه امتى نظام التعليم فى مصر هيتغير وياترى يوم لما يتغير هيكون للاحسن ولا للاسوء:-S
يلا بقى ربنا يكون فى عون ضحايا الثانويه العاميه ويصبر اهلهم يارب=((
وبرده
نقول للناس الناجحين كلها مبرووووووووووك:x
ومشكووووووووووووووووووور يا احمد على الحلقه الجميله وان شاء الله تكون انت وورقه موجودين فى الحلقات الجايه

لكل مجتهد نصيب فى اناس بتكلع اوائل هم عبقره؟

بصراحة موضوع الأمتحانات والثانوية العامة بالتحديد والخوض فيها موضوع متشعب والكلام فيه مش حيخلص لأنها أصبحت سياسة تعليمية مبنية على حاجات كثير :
- عدد الخريجين اللى محتجاهم البلد حاليآ -------- مش محتاجة خريجين جدد ----- يبقى تسهل الأمتحانات ليه على الطلبة ----- تعقد أمهم واللى ينجح ينجح واللى مينجحش مينجحش هما خصرانين حاجة .
- جت الثورة ورفعت راية مجانية التعليم ودلوقتى جم وبيخصصوها ... طب ميقولولنا من البداية صراحة كده ويريحونا من وجع الدماغ .
- بجد الواحد مش عارف يقول أيه زمان كلنا أتعلمنا فى مدارس حكومية ببلاش وبدون الحاجة الى دروس خصوصية وكان التعليم ذى الفل وجبنا مجاميع كبيرة ودخلنا كليات واتخرجنا منها بدون منأخد دروس خصوصية ونحمل أهلنا أعباء فوق طاقتهم لآن التعليم وقتها كان ذى الفل ... دلوقتى مفيش الكلام ده واللى عايز يدخل أبنه أو بنته مدارس حكومية يبقى بيقضى عليه ... مش هو ده اللى ماشى دلوقتى ؟
وحاجات تانية كتير مش حيخلص الكلام فيها او عنها والباقى انتوا عارفينه .
:((

شكرا ليكم كلكم علي المرور الكريم و المشاركات
و خلاص حنقفل الملف دا .. لأنه للأسف كل سنة بنفتح الملف
و بيكبر يوم بعد يوم .. الواحد دلوقتي بيدعي ربنا انه يطلع من التعليم دا علي خير
و يطلع و هو بيعرف يقرا و بيكتب بس
:D

شكرا ليكم كلكم و استنوا بقي الحلقات الجديدة ان شاء الله
:)

والله والله اعرف واحد داخل الثانوية والله مفتح كتاب والكتبات كانها جديدة لم تفتح سوى كتاب الفقة الخايب الى مكرر عليهم ليلة الامتحان بليل علشان محدش يقول انة لم يفتح كتابا وانا لله وانا الية راجعون
بالمناسبة اناطالع الثانى على المعهد
فلاكلام الى بينقال والبلبلة دى ملهاش لزمة الكل عارف الى بيحصل :)):))

تسلم ايدك
يا زعيم الموضوع جميل بجد