يابحر الحب ياصابح تفكرنى بأحزانى
كفايه عليا كسرة قلبى وهوانى
يابحر الحب إيه أكتر يذل الروح
غير انى أعيش مابين الناس وحيد أنا ناسى عنوانى
لا دلّونى على الأفراح ولا اهتموا
كأنى يتيم لا أب معاه ولا أموا
ياريتك تبقى سمعانى فى عز الجرح ياأمى
تعالى خدينى من ايدى وعلى قلبى الحزين سمّى
ما قطع الحزن شريانى وسال دمى
وعبوا قزايز الغربه من الأحزان
بدم ملوش ولا معنى ولا عنوان
وظنوا خلاص أملهم صاب وفتحوا الباب
لقوا الأحزان بتكويهم على الجمرات بكل مكان
وسم الهم سايل من جوانبهم
بيلعن دمنا المسروق ويستعطف لنا الشريان
عاوز يرجع ولا يفارق
خلاص مابقاش حنين فارق
ولا أفراح ولا أحزان
خلاص أنا تهت فى الدنيا مليش عنوان
وهافرح ليه وانا تايه
وانا مغلوب على أمرى
ما انا عمرى
ما فكرت انى أحيا ف بلدى متعزز واكون إنسان
