لما الايد تتمد
تداوى تطبطب
تمسح دمعه نازله تهطل
تحرق خد وتألم خد
ساعتها بس هنبقى بخير
........
لما الايد تتمد تعمر
تزرع صحرا تنبت خضره
يطرح منها جمال مع بركه
تصبح شجره ساكنها الطير
ساعتها بس هنبقى بخير
............
لما العدل يعم الساحه
يمحو الظلم وينشر راحه
يبنى معانى ترجع تانى
قيم وموده وحب الغير
ساعتها بس هنبقى بخير
..........
لما تعود البسمه تنور
وش فقير
كان يوم حلمه يعيش مستور
وسط قبور
كان بيدمع لما أرادته
يبيعها لحاجته
لما يشوف منا التقدير
لما نساعده بكل ضمير
ساعتها بس هنبقى بخير
..............
لما نشم هواها بجد
ولا مكبوته أراده لحد
حلمنا حرّ وعلمنا مدّ
علما تفكر خلق تصنع
تبقى اللقمه بعزم وكد
نحفر بأيدنا الصخر بجد
ساعتها بس هنبقى بخير
............
لما نعود نضحك من تانى
تملا قلوبنا معانى امانى
لما نسامح بعضنا تانى
نعيش الفرحه نغنى اغانى
لما نشارك ف التغيير
لما عملنا يكون بضمير
لما يكون حلمنا دا مصير
ساعتها بس هنبقى بخير
...............
لما نبطل نكره بعض
لما نعاود نسمع بعض
لما نناقش بعضنا بعض
ورأينا شورى مهوش للبعض
ساعتها بس هنبقى بخير
.........
لما الكل يحاول يفهم
ان دى ثوره
وان الحكم مهوش بالقوه
او للوزراء او للورثه
وان مصيرنا بأيد أرادتنا
وحكم المولى
وان كفانا زعيق ومناوره
وقتل وفوضى
ونرمى حمولنا ع اللى خالقنا
وان الموت حق وتقادير
ساعتها بس هنبقى بخير
........
لما نعود لاصولنا الحلوه
نحكى تاريخنا ونرسم بكره
لما عاداتنا تكون قعداتنا
تصلح منا كل حياتنا
لما نحس بكل فقير
نداوى جراحنا
وندّى الامل لكل عليل
ولا يوم نسمع بطفل ضليل
ساعتها بس هنبقى بخير
..................................
كل عام وانتم بخير
