عبد الرحمن الأبنودي ..حياته واعماله....

عبد الرحمن الأبنودي::


شاعر ألاصــــــول وعاشــق مصـــر صاحب الاشعار الموسيقية الخالدة أشعارة هي نغمات وتقاسيم للناى على ضفاف نهر النيل تأتي نابضة بروح الحياة وفي لون الطمي والخضرة أنة مجدد دماء الأغنية الرومانسية حين عرفت كلماته الطريق الى حنجرة عبد الحليم ونجاة وفايزة أنة مجدد روح الاغنية الشعبيةعندما تعاون مع بليغ حمدي ومحمد رشدي أنة دماء جديدة أعادت للشعر نضارته وحيويته خلال ما يقرب من نصف قرن وأعادت توظيف أدواته واكتشاف أهدافه القومية والفنية رغم وجود المعوقات أنة الشاعر الذي كتب القصيدة - الرواية لاول مرة في تاريخ الشعر العربي منذ ديوان" احمد سماعين .. سيرة انسان". ذلك الديوان الفريد في علاقته بين عامل في السد العالي وزوجته وبلغ من جماهيريته وكأنة لم يكتب غيره من اعمال مثل "جوابات حراجي القط الى زوجته فاطمة" و "وجوه على الاسفلت" عن مدينة السويس أثناء حرب الاستنزاف و "الموت على الاسفلت" الذي بدأ بمرثية صغيرة للرسام المناضل الفلسطيني ناجي العلي أنة الشاعر القادر على الالتحام بوجدان البسطاء و الذي جعل الشعب يعترف بوظيفة شاعر العامية ويعرف قيمته ويحمله في ضميره ذلك انة اقتربت كثيراِ من البشر بحكم النشأة والتجربة والمواقف فهو شاعر يعرف الحفاة العراة في أبعد قرية مصرية ويعبر عن نبض الشارع العربي

أنة شـاعـر الوطــن عبــد الرحمــن ألابنــودي

أنة من مؤسسي الحركة الادبية المتميزة التي برزت فيها اللهجة العامية والتاريخ الشفاهي بشكل رئيسي
وهو عضو لجنة الشعر في المجلس الأعلى للثقافة في مصر
كتب في عدد من الصحف والمجللات الدورية المصرية ومازال مستمراً

من مؤلفاته الشعرية:
- الأرض والعيال، صدر عام 1964، 1975
- الزحمة صدر عام 1967، 1976
- عماليات صدر عام 1968
- جوالبات حراجي القط 1969، 1977
- أنا والناس شعر 1973
- بعد التحية والسلام 1975
- السيرة الهلالية وتتضمن أربعة أجزاء هي على التوالي:
- خضرة الشرنقة
- أبو زيد في أرض العلامات
- فرس جابر العقيلي
- حروف الكلام ديوان شعر

ترجمت أعماله الي عدة لغات أجنبية منها علي سبيل المثال (شيء من وعي سيرة بني هلال) والتي ترجمت الي الفرنسية عام 1978
وصدر له أيضاً عددا من الرويات الشعرية منها علي سبيل المثال (أحمد سماعين) عام 1972،
ولشاعرنا الأبنودي أيضاً عدد من الدراسات الأدبية التي تبحث في التراث الشفاهي و الموسيقي لمصر ومن أهمها كتابه (غنا الغلابة) دراسة عن الأغنية و القرية. وقد
أدى عدد من المطربين أغنيات من كلمات شاعرنا الأبنودي وبخاصة خلال حربي 1967، 1973
كما كتب قصائد وطنية وقومية لفلسطين والقدس وما زال متمسكاً بمواقفه القومية الثابتة ويتابع إبداعاته ويسام في إحياء الأمسيات الشعرية في عدد من المنابر الثقافية في الوطن العربي

http://www.lakii.com/vb/smile/12-4.gif

مجموعة رسايل الاسطي حراجي لزوجته فاطنه عبد الغفار

الجوهرة المصونه
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلايه الفار



أسوان ... الرسالة 1


أما بعد .. لو كنت هاودت كسوفي ع التأخير
سامحيني يا فطنه في طول الغيبه عليكم
وأنا خجلان .. خجلان .. وأقولك يا زوجتنا أنا خجلان منكم ..
من هنا للصبح ..
شهرين دلوقت ..
من يوم ما عxxxxxxxxxي يا فاطنه .. بلت شباك القطر ..
لسوعتي بدمعك ضهر يديَ
لحضتها قلت لك :
(( قبل ما عوصل عتلاقي جوابي جي ... ))
نهنهتي .. وقلتي لي بعتاب:
(( النبي عارفاك كداب .. نساي
وعتنسى أول ما عتنزل في أسوان .. ))
حسيت واليد بتخطفها يد الجدعان
بالقلب ف جوفي ما عارف ان كان بردان .. دفيان
والبت عزيزه والواد عيد
قناديل في الجوف .. زي ما بتضوي .. بيقيد ..
.......... والقطر إتحرك ..
وقليبي بينتقل من يد لإيد .
والقطر بيصرخ ويدَودِو
اتدلدلت بوسطي من الشباك ..
( خذي بالك م الولد .. راعي عزيزه وعيد )
والقطر صرخ ورمح لكإنه داس على بصة نار ..
ولقطت الحس قريب .. قد ما كنتي بعيد :
(قلبي معاك يا حراجي هناك في أسوان ..)
...........................
ورميت نفسي وسط الجدعان .. وبكيت ..
وبلدنا اللي كنا بنمشيها ف نص نهار
كان القطر في لحضه .. فاتها بمشوار .
سامحيني يا فطنه على التأخير ..
ولو الورقه يا بت الخال تكفي
لأعبي لك بحر النيل والله بكفيِ
وختاماً ليس ختام ..
بابعت لك ِ
ليكي ولناس الجبلايه ولبتي عزيزه والواد عيد
ألف سلام
زوجك ... لوسطى حراجي

***

أسوان
زوجي الغالي
لاوسطى حراجي القط
العامل في السد العالي

جبلاية الفار

الرسالة 2




زوجي حراجي ..
فوصلنا خطابك ..
شمينا فيه ريحة الأحباب .. ربنا ما يوري حد غياب ..
مش أول مره البسطاوي يخطي عتبة الدار ؟؟
عمرنا يا حراجي .. ما جلنا جواب .
النبي ساعة مرزوق البسطاوي .. ما نده ..
كده زي ما كون .. دقت في حشايا النار .
وكإن العمر بيصدق .. بعد ما كان كداب ..
اتأخرت مسافه كبيرة كبيرة علي
عارف فاطنه يا حراجي لاليها عايل .. ولا خي .
ليه تتأخر كده يا حراجي .. ؟
طب والنبي كأن ورقتك دي
أول قنديل بتهز ف جوف الدار .
أول ندعة ضو.
الدار من غيرك يا أيو عزيزه .. هو .
وعزيزه وعيد ..
من غيرك يا حراجي زي اليُتما في العيد .
الواد على صغره حاسس بالغربه والبعد .
ولا عاد حتى بيطلع يلعب في القمَارى مع الولِد .
اطلع وأخش .. أطلع وأخش القاه .. غيمان
وكأنه محروق له دكان .
ويقوللي : (( فين يامه أسوان .. ؟
وأبا سابنا ليه يا مه ؟ ما يمكن زعلان .. ؟ ))
شهرين يا بخيل ؟
ستين شمس وستين ليل ؟
النبي يا حراجيما أطول قلبك
لاقطع بسناني الحته القاسيه فيه
..........................
كل الجبلايه تسلم فرداً فرد ..
م الحاج ((( طِلب حامد )) لعيلة بيت (( علي سعيد ))
وانشالله يا حراجي ما يوريني فيك يوم
وانشالله تكون تعلمت ترد قوام .
ومادام احنا راسيين ع العنوان
والله ما حنبطل بعتان..
مفهوم..أسوان
زوجي الغالي
لاوسطى حراجي القط ..
العامل في السد العالي




زوجتك
فاطنه أحمد عبد الغقار
جبلايه الفار

***
أسوان
الرساله 3

الجوهره المصونه
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلاية الفار

أما بعد ..

فهذا تاني خطاب ..
باعتين طيه ما قدرنا المولى عليه ..
وعنبعتلك في ظرف الجمعه .. طرد
الطرحه والجزمه بتوعك ..
وكساوي عزيزه وعيد .
دورت الحسبه ف راسي وقلت يا واد يا حراجي ..
هو يعني قانون العيل ما يدوقشي الكسوه ..
غير في العيد ؟
أمال كيف العيل حيحس أبوه جنبه
إذا كان الأب .. بعيد .. ؟
بقى أول ما دلقنا يا فاطنه بابور السد على محطة إسوان
أنا والجدعان
حسيت بالدوخه
مش أول مره باسيب جبلاية الفار .. ؟
رحنا المكتب
طبعنا البطاقات ..
ومضينا على الورقات
أه يا (( فطاني )) لو شوفتي الرجاله هْنِهْ
قولي .. ميات .. أولوفات ..
بحر من ولاد الناس ..
إللي من (( درجا )) واللي م (( البتانون ))
واللي من (( أصفون)) و (( التل))
جدعان .. زي عيدان الزان .. سايبن الأهل .
وتطلي في عين الواحد يا ولداه ع الغربه ..
عارفه يا مرتي الراجل في الغربه يشبه إيه .. ؟
عود دره وحداني .. في غيط كمون ..
حسيت بالخوف ناشع في عروقي زي البرد .
قضينا الليله الأولانيه في أي مكان .
العين مشقوقه..
والبال ..
زي الغله اللي بتسرسب من يد الكيال
وندهت عليكي قلت : انا بنده
امعاني ؟
سامعيني يا عيال ؟
النبي لولا الخوف واللومه من الرجاله ..
لاركبت القطر وعدت
قبل ما أروح لموظف
قبل ما أرد سؤال.
وقعدت أعقل نفسي وأقول : يا حراجي يا بوي
أمال جيت ليه ؟
الخايف من الغربهة ما يجيش
اتحمل علشان كسوة عيد .. ورغيف العيش
لكإنك ياخي رحت (( الديش ))
من خوفي يا مرتي
قعدت أهدي الرجاله .
فاطنه ..
أول ما تفكي الخمسه جنيه
اطلعي ع الفور ..
وإدي حساب (( عمران )) وجنيه (( بمبة الصباغ ))
والباقي زيحوا بيه القارب
لما يعدلها الرحمن
سلمى ع الوِلد .. وع (( الحاج التايب ))
بلا كتر كلام ..
سلمي على كل اللي لينا فيهم نايب ..
وإوعي يا فطنه لما ارجع وأبص ف وش اللولاد ..
أعرف إن أبوهم كان غايب .
وإحنا هنا بنستنى الجوابات بفروغ صبر
طول ما الجوابات رايحه وجايه .
اعتبري كإني باجي أشوفك..
واجى .

زوجك لاوسطى حراجي


***

أسوان
زوجي الغالي
لاوسطى حرجاي القط
العامل في السد العالي

جبلاية الفار
الرسالة 4

وصلنا الطرد وجانا المبلغ يا حراجي ..
أحياك الرب وأبقاك ألفين عام ..
ولا عاد يقطعلك عاده ولا حس..
ولا يقفل لك كف ..
ولا يطوي من قدامك سجادة الخير والسعاده ..
اما بعد ..
فإحنا وزعنا المبلغ زي ما قلت..
ولعلك ما تشغلش بالك فينا وتبقى في راحة بال ..
إحنا يا حراجي – بعيد الشر- إن ضاقت بينا الحال يكفينا ريال
كفايه علينا البسطاوي الظهر يخطي عتبة الدار
غمبارح .. جانا (( الشيخ قرشي )) .. وخبط ع الباب ..
جه ساعة المغرب
قاللي لا بدن ما نبص لعيد ..
قاللي : (( يا بت المرحوم ..
الواد لازمه الكتاب ..
يو السوق ..
إتدلي هاتي له قلمين بوص .. ودواية .. ولوح )) ..
وضحك .. بعدين قاللي : (( لاحسن يطلع لوح ))
وأنا بيني وبينك يا حراجي عاوزاه يكبر
ويعوضنا عن الأهل ويعمل لنا قيمه ..
عاوزاه تكون قيمته ف جبلاية الفار قيمة القيمه ..
اللي بتقوله عن أسوان يا بوعيد ..
حكايه ولا حكايات أبو زيد ..
هيا يعني .. مش زي بلدنا .. ؟
أمال ناسها بيسووا إيه .. ؟
ما بيشتغلوش ليه ؟
وإنت .. طول عمرك راجل صاحب فاس
فهمهاني دي
لاحسن عامله في راسي زي الخبطه ..
كيف صاحب الفاس يصبح أوسطى .. ؟
صاحبك (( تكروني )) لما أتى بالطرد ..
شيعنا معاه الموجود ..
...............................................
في الليل يا حراجي تهف عليا ما عرف كيف ..
هففان القهوه .. على صاحب الكيف ..
وبامد إيديا في الظلمه ألقاك جنبي ..
طب والنبي صُح ومش باكدب يا حراجي .
وباحس معاك إن الدنيا لذيذه .
كيف حال (( عبد العال التابه )) و (( على اب عباس ))؟ ..
وقوللي يا حراجي ..
بتاكل كيف . ؟ وبتلبس إيه ؟ وبتقلع إيه ؟
بتنام فين ؟
قاعد في المطرح مع مين ؟
مين اللي بيغسلك توبك
وبتتسبح فين .. ؟
...............................................
في نهاية القول ..
أنا رح أشيع عيد ع الكتاب ..
فا إبعت له ووصيه على شد الحيل ..
وجميع الناس في الجبلايه
عايزين لك كل سعاده وخير ..
وبيتمنولك تاني ترجع في السلامه ..
تعمر مصطبتك ..
وتقيد اللنضه في الدار ..




زوجتك
فاطنه أحمد عبد الغفار
جبلاية الفار

***
الجوهره المصونه
والدرر المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلاية الفار

أسوان
الرساله 5

مشتاق ليكي شوق الأرض لبل الريق ..
شوق الزعلان .. للنسمه .. لما الصدر يضيق
مشتاق .. وإمبارح ..
قاعد .. قدامي عِرق حديد.. وف يدي الفحار ..
غابت عن عيني الحته اللي أنا فيها..
وغابوا الأنفار
تحت النفق .
الضلمه يا فاطنه
بتساعد على سحب الفكر
..
تلاقيكي ولا عارفه الأنفاق.
ولقيت نفسي يا فاطنه طيره مهاجره
والطيره جناحها محتار
ولقيت نفسي على بوابة جبلاية الفار ..
باخد الأحباب بالحضن
كانس كل دروب الجبلايه بديل توبي
طاوي كفوفي وباخبط بيهم على صدر الدار
قلتلي لي مين ؟
مسيت الدمعه ف حزنك بإيدي..
مسيت الدمعه اللي ف حزنك ..
ماعرف خدتك في حضاني ولا إنتي خدتيني ف حضنك
وعزيزه وعيد حواليا بيشدوا الجلابيه
ويشموا ف غيبتي وفي إيديا..
وقعدت بيناتكم .. وبكيت .. وضحكت
لما لمحت عصايتي وتوبي .. وفاسي .. ومداسي
يمكن ساعه .. وقف اللمهندس على راسي ..
ولمس كتفاتي بصابعه .. قمت لفوق ..
طبطب على كتفي ..
وخدني من يدي بره النفقات في النور ..
ضيعنا نص نهار ..
وسألني .. قلت الشوق
قاللي إسمع يا حراجي أقولك ..
ويا فاطنه قعد يحكي ويتكلم ..
ألقط كلمه وميه تروح ..
وكلام .. م اللي يرد الروح ..
وحكى لي عن أسوان والسد ..
وحكى لي عن اللفرنج وعن حرب المينا..
في الجوابات الجايه يا فاطنه عاقولك وإحكي لك ..
اما عن نفسي .. فأنا لا بخيل ولا شي ..
كيف اللي ف قلبي بس يا ناس .. أرويه في جواب .. ؟
أما عن عيد ..
فأنا من بدري يا فاطنه قلت يروح الكتاب ..
وأقل ما فيها ..
عيفُك الخط ويحفظ له كام سوره
والأمر ده بس يا فاطنه يعوز شوره .. ؟
على خيرة الله ..
ووصلنا فطيرك ..
قعمزت ما بين الرجاله وكلناه ..
يعني أنا دقته .. ؟
والنبي بعنيا قعدت أتفرج ع الرجال بياكلوه
كنا طالعين م الشغل نشر عرق ..
بت يا فاطنه ..
النبي في الدنيا .. ما فيه واحده بتسوى فطيره زيك ..
شفت ده في عنين الرجاله ..
سلاماتي لكل اللي يقولك شحوال حراجي
وسلامي لعزيزه وعيد ..
أما نه عليكي لحين ماجي ..
زوجك
لوسطى حراجي

***

أسوان
زوجي الغالي
لاوسطى حراجي القط
العامل في
السد العالي

جبلاية الفا ر
الرساله 6

أما بعد ..
فنعرفكم .. إحنا بخير ..
ولا يلزمنا إلا رؤية وجه الغايبين ..
(( مرزوق البسطاوي )) .. مرته وضعت .. حدفت ولدين
وجوابك وصل الجبلايةإمبارح ..
لكن مرزوق .. ما سرحشي غير اليوم ..
وما دنتو في صحه وعال ..
إحنا ما يلزمناش .. أكتر من ورقه في ظرف ..
ناس الجبلايه كبيراً وصغيراً عاوزين رؤياك .
قوللي يا حراجي بحق ..
عامل كيف بس ف ليل الفرقه .. ؟
واللهي ما خش دماغي حاجه من اللي كاتبه في الورقه ..
ويا خوفي عليك ..
بيقولوا فيه ناس .. ماتوا في اللي إسمه السد ..
طمنا عليك يا حراجي .
.........................................
قسمنا مع بيت العطار .. بلح النخله الشرك ..
إذا كان لازمك منه يا حراجي .. إبعت قول ..
مش راح تاجي .. ؟
طالقالك في البيت فروج ..
علشان لما تعود م الأسوان دي .. تلاقي لك حتة لحم ..
وإم (( علي أب عباس )) مشغوله عليه ..
بدري ما راسلهاش ليه ؟
أهي طول اليوم .. قاعده على العتبيه إيد على خد ..
وماسمكه عود قش بتبكي وتخطط في تراب الدرب ..
طمنا عليه يا حراجي يرضيك المولى ..
وإذا كان عال وف خير ..
الضحك مع الجدعان .. ولا رساله لامه المشغوله أولى .. ؟
قلب الأم أصابه الشوق يا بوعيد ..
يبقى أسخن من رمال القياله لما يقيد
يبقى عش خراب بيسرخ على طيره ..
وعلى أب عباس عارف أمه ..
مالهاش في الدنيا غيره ..
وإمبارح كانت وسط الحريمات ..
قاعده تمسح دمعتها .. ف طرحتها وتقول :
اللي مانعني من الموت ..
اليوم اللي أشوف (( علي )) فيه متهني وفاتح بيت ..
يومها أقول للدنيا ضحكت عليكي
خلاص غوري ..
........................................
قولله يشيع يا حراجي .. الناس زعلانه ..
كل الجبلاي واخده في خاطرها منه ..
وإمه عنيها كستها الدخانه ..
أختك (( نظله ))
رجعت بيت الحاج ركابي إمبارح من (( درجا ))
قالت جايه تريح عند خالاتها وحتولد في اللي يهل ..
يا حراجي .. جوابك بيرد الميه للزور الناشف ويبل .
ده إحنا عايشين هنا ع السيره ..
وزادنا الأخبار ..



زوجتك
فاطنه أحمد عبد الغفار
جبلاية الفار

http://www.lakii.com/vb/smile/12-4.gif
احزانى العاديه

القصيده ديه القاها في حفله التضامن مع الصحفي ابراهيم عيسي
اللى كانت في نقابه الصحفيين

وفجأة
هبطت على الميدان
من كل جهات المدن الخرسا
الوف شبان
زاحفين يسألوا عن موت الفجر
استنوا الفجر ورا الفجر
ان القتل يكف
ان القبضه تخف
ولذلك خرجوا يطالبوا
بالقبض على القبضه
وتقديم الكف
الدم
قلب الميدان وعدل
وكأنه دن نحاس مصهور
انا عندى فكرة عن المدن
اللى يكرهها النور
والقبر اللى يبات مش مسرور
وعندى فكرة عن العار
وميلاد النار
والسجن فى قلبى مش على رسمه سور
قلت له لأ يا بيه
انا اسف
بلدى بربيع وصباح
ولسه فى صوتى هديل الينابيع
لسه فى قلبى صهيل المصباح
لسه العالم حيى رايح جى
بيفرق بين الدكنه وبين الضى
بلدى مهما تتضيع مش حتضيع
ما ضايع الا ميدان وسيع
يساع خيول الجميع
يقدم المقدام
ويفرسن الفارس
ويترك الشجاعه للشجيع

ولا باعرف ابكى صحابى غير فى الليل
انا اللى واخد على القمر
ومكلمه اطنان من الشهور
وعلى النظر من خلف كوة فى سور
واللى قتلنى ما ظهر له دليل

وفى ليله التشييع
كان القمر غافل ..مجاش
والنجم كان حافل
لا بطل الرقصه ولا الارتعاش

لما بلغنى الخبر
اتزحم الباب
وجونى الاحباب
ده يغسل ..ده يكفن ..ده يعجن كف تراب
وانا كنت موصى لا تحملنى الا كتوف اخوان
اكلوا على خوان
وما بينهمش خيانه ولا خوان
والا نعشى ما حينفدش من الباب
ما اجمل نومه على كتوف اصحابك
تنظر صادقك من كدابك
تبحث عن صاحب انبل وش
فى الزمن الغش

والرؤيه قصادى اتسعت
بصيت واحسب نفسى بين خلان
تعالوا شوفوا الدنيا من مكانى
حاشتنا اغراض الحياه عن النظر
بالرغم من نبل الالم والانتظار
اتعلمنا حاجات اقلها الحذر
ونمنا سنوات مدهشه
نحلب ليالى حلمنا المنتظر
وامتلات الاسواق بالمواكب
تبيع صديد الوهم والمراكب
وفارشه بالوطن على الرصيف
بالفكر والجياع والكواكب ومذله الرغيف

شويه فات سقراط
مسلسلينه من القدم للباط
ومتهم باليأس والاحباط
وبالعدم وبالزنا وباللواط
وبكل كافه التهم
وهو عابر للجحيم على الصراط
ينظر على الشعب التعيس ويبتسم
الى الجحيم للفلسفه
دنيا لا كانت يوم
ولا حتكون فى يوم كويسه
دنيا فى هيأة خنفسة
دنيا فسه
ما اتعس الانسان
ما اسعد الحيوان
وعبر
وصف من الزوانى وراه
متلطخين بالبودرة والمعاجين
حاصرين غطاوى الروس
بطونهم عريانين
بيغنوا طوبى لضحكه المساجين

وعيال عرايا
تفيض بها الطرقات
من القرى ومن المقاطعات
اطفال فى لون الجوع
صوت النفس مسموع
اطفال شبه وضلوع

اما انا
فاتسعت الرؤيا
وبصيت للمسا وللحياه المتعسه
وللنسايم المنعسه
وقلت ورا سقراط
دنيا فى هيئه خنفسه
ما اتعس الانسان
ما اسعد الحيوان

قبل مرورى على بعض مكان
كنت موصى يمه افوت
هجمت من الحارة مجموعه نسوان
رجعوا بالصوت
قالوا يا عبد الرحمن
وقدرت تموت !!
وتفوت اللحم العارى المتهان
فى المدن اللى معداش منها ريحه انسان !!
انا مت
ومش منظور لى جواب
متحصن بكتوف الاصحاب
ولذلك فت

عند التربه
قعد الشيخ اوصانى
وادانى كتابى بيمانى
قال لى لو جولك ملكان
قول انا عبد الله مش عبد الرحمن

ودعا لى فى لحظه ما يقوم للعدل ميزان
ينوبنى شىء من العفو وبعض الغفران
وفى لحظه ما انا متزحلق
فى قماشى الابيض
من جوف القبر
التقدم ضابط واتعرض
قبض على الجثه
وطلب الاوراق
مزع الاكفان
عدل الوش
ووقف وركلنى
وقالى بلؤم شديد
حتى فى الموت بتغش
شيلوه

ولقيت نفسى والعربيه داخله القلعه
كانت الدنيا ضجيج والشمس نيران والعه
قوم يا انسان
انا قلت
انا عبد الله مش عبد الرحمن
زى ما الشيخ اوصانى
قالى عندى اوراق تثبت انك مش مرتاح
امرك فاح
ولقيت نفسى محاصر تانى وتحت الرجلين
قلت لنفسى وبعدين
راح تفضل كده لامتى يا غلبان ؟
بتدارى ايه ؟
ايه باقى تانى علشان تبقى عليه ؟
وطنك ؟
متباع
سرك ؟
متذاع
الدنيا حويطه وانت بتاع
ويهين المعنى الضابط
ويدوس بالجزمه على الحلم
ربنا رازجه بجهل غانيه عن كل العلم
ماذا تعنى بالكون يا يساعك يا يسعنى ؟؟
رد يا جربان يا ابن الوسخة ياكلب
اظنك حتقولى تانى الشعب
وصفعنى وتنى على بطنى بالكعب
يا سعادة البيه وانا ايه؟ او ليا فى العمال ايه ؟
ما تضيع الدنيا والعمال دى تغور
يا صاحب هذا المبنى الموروث
ضل جدودك فى الجدران مغروس
انت السلطان وانا المملوك
انت السجان وانا المهلوك
انت المنصور وانا المسفوك
انا الصعلوك وامتى الصعلوك
يقدر يتجاسر على السلطان
اللى فى ايده بدل البرهان مليون برهان
رفع الهد
ماهو برضه دول يفهموا فى الكدب
اول ما اتلفت جه غارس الجزمه فى قورتى
وجيت اقعد بركنى على الاسفلت
ولقيت نفسى محاصر تانى وتحت الرجلين
قلت لنفسى وبعدين
راح تفضل كده لامتى يا غلبان ؟
ما لقتش الراحه فى الموت
يمكن تلاقيها ورا القضبان

اطلعت على الشبابيك وعلى القضبان
على الموقف
على السجن وعلى السجان
ولقيتنى طول عمرى كنت كده
كلب ..محاصر ..متهان ..منبوذ ..جربان
وانا يا ابنى الحلم اللى ما لهش اوان
معروف عشى فى قلب البستان
معروف صوتى فى زمن الاحزان
وفى اى زمان

واتذكرت سنه ما اتبنت القلعه
وكنت انا اول مسجون
وكان الضابط ده اول سجان
يوم ما ركلنى نفس الركله
يوم ما صفعنى نفس الصفعه
نفس طريقه الركل
وآخر الليل جانى بدم صحابى فى الاكل

استأذنت ارتب اقوالى
قفل الباب
واتفتح الباب
وخلاص

يا عم الضابط انت كداب
واللى باعتك كداب
مش بالذل حاشوفكم غير
ولا استرجى منكم خير
انتم كلاب الحاكم
واحنا الطير
انتم التوجيه واحنا السيل
انتم لصوص القوت
واحنا بنبنى بيوت
احنا الصوت ساعه ما تحبوا الدنيا سكوت

احنا شعبين ..شعبين ..شعبين
شوف الاول فين ؟؟
والتانى فين ؟؟
وآدى الخط ما بين الاتنين بيفوت
انتم بعتم الارض بفاسها ..بناسها
فى ميدان الدنيا فكيتوا لباسها
بانت وش وضهر
بطن وصدر
والريحه سبقت طلعه انفاسها
واحنا ولاد الكلب الشعب
احنا بتوع الاجمل وطريقه الصعب
والضرب ببوز الجزمه وبسن الكعب
والموت فى الحرب

لكن انتم خلقكم سيد الملك
جاهزين للملك
ايديكم نعمت من طول ما بتفتل ليالينا الحلك
احنا الهلك وانت الترك
سواها بحكمته صاحب الملك
انا المطحون المسجون
اللى تاريخى مركون
وانت قلاوون وابن طولون ونابليون
الزنزانه دى مبنيه قبل الكون
قبل الظلم ما يكسب جولات اللون

يا عم الضابط
احبسنى
سففنى الحنضل واتعسنى
رأينا خلف خلاف
احبسنى او اطلقنى وادهسنى
رأينا خلف خلاف
واذا كنت لوحدى دلوقت
بكره مع الوقت
حتزور الزنزانه دى اجيال
واكيد فيه جيل
اوصافه غير نفس الاوصاف
ان شاف يوعى
وان وعى ما يخاف
انتم الخونه لو يصدق ظنى
خد مفاتيح سجنك واترك لى وطنى
وطنى غير وطنك
ومشى
قلت لنفسى
ما خدمك الا من سجنك
http://www.lakii.com/vb/smile/12-4.gif

ناجى العلى

أمايه.. وانتى بترحى بالرحى..
على مفارق ضحى..
ـ وحدك ـ وبتعددى
على كل حاجه حلوه مفقوده
ماتنسيش ياامه في عدوده
عدوده من أقدم خيوط سودا في توب الحزن
لاتولولى فيها ولا تهللى..
وحطى فيها اسم واحد مات
كان صاحبى يا امه..
واسمه
ناجى العلى
ـــــــــــــــ
ياقبر ناجى العلى وينك ياقبر
ياقبر معجون بشوك مطلى بصبر
الموت يقرب عليك .. يرتد خوف
واذا ماخافش الموت.. يرتد جبر
****
ياقبر ناجى العلى .. يادى الضريح
كان ميتك ..للأسف .. وطنى صريح
تحتك فتى ناضر القلب ..غض
كان قلبه .. أرض مخيمات الصفيح.
****
الأرض متغربه .. والحلم ِمْلك
خريطه شبه الوطن محاصرها سِلك
واقف وراها شريد عاقد إيديه
حن الوطن ذلك .. للأرض .. تلك
****
غشيم فى حب الوطن .. طبعا غشيم
ياللى تحب الوطن .. من الصميم
على طريقة العرب في الحب .. عيش
ولىِ .. نقى .. متقى .. لكن لئيم
ـــــــــــــــــــــــ

أمايه.. وانتى بترحى بالرحى..
على مفارق ضحى..
ـ وحدك ـ وبتعددى
على كل حاجه حلوه مفقوده
ماتنسيش ياامه في عدوده
عدوده من أقدم خيوط سودا في توب الحزن
لاتولولى فيها ولا تهللى..
وحطى فيها اسم واحد مات
كان صاحبى يا امه..
واسمه
ناجى العلى
****

بغداد

مهما أقول أو تقول..
إيه راح يفيد الكلام؟..
حكامنا صاحبوا العدو ..
وإحنا رحنا ننام
قالو لنا: حنحلها إحنا في خمس تيام
آدي بداية انهيار الأمة قدامنا
بعنا حقيقتنا وسكنّا في أوهامنا
عشنا وزادنا الخطب..
كرهتنا أحلامنا
أنا ما بنيت الدار إلاَّ لأحارب
ودار بلا حربٍ... عليا حرام..!!
مهما أقول أو تقول..
إيه راح يفيد الكلام؟
مش قالوا حنحلها إحنا في خمس تيام؟..
آدي العراق منطرح ع المقصلة.. بناسُه..
مستني حكم الغريب الجاي... بمداسه
يدوس علي الأمة.. وتسممنا أنفاسه
واحنا بنسأل: صحيح فيه حرب يا اخواننا؟..
وقال صحيح.. طامعة أمريكا في بترولنا؟؟..
مش هيه كانت صديقتنا.. كما فهمنا؟..
يا أمة.. جزم العدو.. دايسة علي رقابنا
وازاي بنسعد قوي.. في كل ما داسوا؟..
وآدي العراق منطرح ع المقصلة بناسُه
وكأننا إحنا.. ولا أهله.. ولا ناسه..!!
بيننَّا ما بين الدمار.. الدُّوس علي الأزرار
وتبتدي الكاِرثَة وتصعْد جبال النار
أمريكا.. في كل ساعة.. تبدّل الأعذار

والأمة قاعدة بتتفرج وتتشكك..
تشوف صورها علي الشاشات تقوم تضحك
وتسألك.. تفقعك.. وتقول: صحيح فيه ضرب؟..
من كتر ما نعسنا في الضلة.. نسينا الحرب
نقفلها م الشرق يفتحها علينا الغرب
عدو.. ما بينامش لا في الليل.. ولا في نهار..!!
بينّا ما بينه.. يا دوب دوسه علي الأزرار
وتبتدي الكارثة وتشعلل جبال النار..!!
أمريكا يمّ العراق زاحفة بلا قوانين
زي إسرائيل اللي قاتلة ولادنا في فلسطين
لاتنين علي نية.. ريحة الدم.. هيه الدين
جايين.. معاهم سلاح يقتل بلا تنشين
واحنا اللي إيدنا بلا حِتة عصايةْ توت
واللي أخدنا خلاص علي ابتسامة الموت
متلطشين م اللي مش فايت وم اللي يفوت
وسلاحنا طوب.. إنما.. إحنا اللي متَّهمين!!
وامريكا يم العراق زاحفة بلا قوانين
زي إسرائيل اللي قاتلة الشعب في فلسطين!!

قال إحنا لؤما قوي وقال ايه نتحايل
وقال بنخفي السلاح.. في الضل لو مايل
في لقمة الطفل أو في مشية الحامل
سلاح رهيب.. مستخبي فيه دمار شامل
يا ريت يا سيدي ما كانش الحال بقي مايل
ولا كنا نتسول التأييد من الغربا
والجرح يوسع يوماتي لاطب ولا طببا
وأقلها كلب.. يشتمنا.. ويتطاول..
قال إحنا لؤما قوي ع الحيلة نتحايل
وقال بنخفي السلاح في الضل لو مايل
وإحنا ضعفا... بنصرخ.. زي طفل غريق
قوِّتنا ضاعت ما بين الكرْه والتفريق
وكل دولة تلاتة متر.. عاملة فريق
قال ده أخويا اللي لعدوي.. أعز صديق
يحب وش العدو.. وش العرب لأه
ياكل طعام العدو.. لقمة اخوه.. لأه
يلبس قماش العدو.. وقطن أخوه لأه
تقوله:أهلاً.. يروح يشكيك لأعداءك
قول رأيك ايه لما تصبح أمتك.. داءك؟
تفطر بكاس العداوة كل يوم ع الريق!؟
وإحنا ضعنا.. بنصرخ زي طفل غريق
وكل دولة تلاتة متر.. عاملة فريق!!
السَّكرة راحت أهه.. وطلّت الفكرة
وكنا خايفين مجيئ بكرة.. وجه بكرة..

بدأوا بأرض الديانة: القدس« و» الناصرة
بيت لحم و جنين و نابلس. واسألوا "غزة"
أعز أولاد.. لأمة متاجرة في العزة
الركلة آخر مزاج.. والصفع له لذة
كل العذاب ده ولا عرفناش يا ناس نكره؟..
وكنا خايفين مجيئ بكرة وجه بكره
والسكرة راحت أهه وفضلت الفكرة
إشمعني يعني العراق ولافيش غير هوه
علشان تغير نظامه إنت بالقوة..؟
الأنظمة كلها.. ما بتختلفش يا أخ
مَد المواطن قفاه ومنعتوا آه أو أخْ
مش أنظمة.. في الحقيقة دي مجرد فخ
لو المواطن جمل بحملكم كان نخ
وكل حاكم لئيم.. براه.. غير جوه
واشمعني يعني العراق؟.. ولافيش غير هوه
علشان تغير نظامه إنت بالقوة؟..
قلنا زمان.. اعتدَي علي الكويت ظلما
ً وكنا ضده... وقررنا يعود حتماً..
دلوقت لا راح علي أيسر ولا أيمن
حكايتكو يا الأمريكان ألغز من الألغاز
وف تبريراتكو المريبة باشم ريحة الجاز
الكدب علي وشكم.. ما ينقصوش برواز
شعب العراق لن يموت.. الموت لكم إنتم
إنتو اللي جرتوا عليه.. وانتو اللي أجرمتم
ولا راح نفوت تارنا مهما رجعتوا وبعدتم

يا دي الرئيس اللي علي قول الضلال.. أدمن
مطلوق علينا.. كأنك ديب جعان شارد
وجاي علينا.. بتتمطع قوي... وفارد
في كوريا نعجة وعلينا جاي عامل مارد
لا إنت عمي .. ولا أمي.. ولا الوالد
علشان تيجي لبلادي بكل أسلحتك
تنقذني م اللي حاكمني... كنت عينتك؟..
عارفك ما تعرف يا قاتل.. إلا مصلحتك؟
مش أنظمة!!. إنما.. قابلينها يا بارد!!
مطلوق علينا كأنك ديب رهيب شارد
في كوريا نعجة.. وعلينا.. جاي عامل مارد!!
أطفالنا ماتوا.. ولا سائلش عنهم حد
تحت البيوت قبل حتي ما البيوت تنهد
ونسألك إنت.. وكإنك نسيت الرد
الدنيا تطلع مظاهرات والهتاف بيقول
واللي في مخك في مخك.. لا يهمك قول
قلبك علي إسرائيل وعيxxxxxxxxx علي البترول
واخدينها إحنا هزار.. وانت واخدها جد!!
أطفالنا ماتوا ولا سائلش عنهم حد
والدنيا تسأل.. وكأنك نسيت الرد

آدي العراق القريب م القلب راح منا
بعيد بعيد.. ابتعاد النار عن الجنة
واحنا زي النُّظُم.. خطبة.. وقفِّلنا
ونرجعوا للبيوت تاني بنتمنظر...
الطيارات بالدانات والشاشة بالمنظر..
وإحنا لا حوله ولا يعذرنا من أنذر
ولا في عرق اتنفض فينا ولا أَنَّه
آدي العراق القريب م القلب راح منا
بعيد بعيد.. ابتعاد النار عن الجنة
خلاص نسينا النضال.. اليوم نقول بغداد
وبكره حنقول كذا.. وبعده ياما بلاد
واحنا كما المربوطين.. في أوتد الأوتاد
الشهدا بيموتوا يومياً قصاد العين..
من تحت عيxxxxxxxxx عيون شايفانا يا فلسطين
أميرة إنتي ما بتلوميناش.. تلومي مين؟
ما ظنش اللي شبهنا تجوز لهم رحمة
إذا بدم البلاد... بيلونوا الأعياد!!
خلاص نسينا النضال.. اليوم نقول بغداد
وبكره حنقول كذا.. وبعده ياما بلاد

قصيدة خيط

اليل جدران اذا يدن الديك من عليـه يطلـع

نهار وتنفلت من قبضـه الشـرق الحمـام ام

ام الجناح الابيض فى لـون قلـب الصغـار

اه يا حبيبتى يا ام خصله مهفهفه قلبى اللـى

مرعوش الامان لسه بيحلـم بالدفاوالشمـس

كلمه طيبه وفيها الشفا قلبى اللى كان قـرب

يموت لسه بيحلم بالبيوت زى الخرز والدرب


خيط حرير ولاضم كل حيط وفـى كـل دار

يترش حب الحب غيط يتنفس البلاب علـى

البـاب الكبيـر وبرضـه ملضـوم بحريـر

يا ام العيون الدفاينين لو تعرفـى مـن فيـن


سمار النيل ؟ منين ؟اوعك ان تقولى ان جوفه

عب طين اسمر لاالشمس فوقه مـن سنيـن

لو تعرفى طول السنين على شـاب عريـان

البدن ودراعاته مكشوفيـن وانتـى عينكـى

اسمروا من شيل الحنيـن ولانهـم متكحليـن

بشئ حزين بشئ فى كـل عيـون صحابـى

الطيبين اللى فى عينيهم انتظار واليل جـدار

اذا يدن الديـك مـن عليـه يطلـع النهـار

الحارة الفلسطينية
*************
الحارة الفلسطينية
شوف كم سنة عدت وانا صاحي
اسم بلادي هو سلاحي
والثورة بتظهر صباحي
في الحارة الفلسطينية
الف سلامه
يا علمي اللي ظلموك ياما
حتى الدنيا ليها قيامة
في الحارة الفلسطينية
أعلامي سودا من الهم
أعلامي حمرا ودا دم
في الاكفان البيض نتلم
من الحارة الفلسطينية
يا سلالم طالعة
يا ثوارها
اجسادنا سلم لقمرها
الاطفال خلعت اعمارها
في الحارة الفلسطينية
يا أرض الرسالات باركينا
بنوفي الندر اللي علينا
الثورة ضد الصهيوني
هي عقلي وهي جنوني
واتقهقر لما يردوني
للحارة الفلسطينية
لساها بتنجب انبيا
موجة البحر الرايحة وجيا
للحارة الفلسطينية
يا حجارتي
لسلاح الواطي
يا قنابل
يا رصاص مطاطي
انا ماشي معدول
وسراطي
الحارة الفلسطينية
انا بادي وبيدي حجارة
وجهنم اولها شرارة
الوعي اللي كانه بشارة
من الحارة الفلسطينية
انا ثورة وسبنالكو الدولة
بتقولي لا قوة ولا حول؟
اهو لينا شرف المحاولة
في الحارة الفلسطينية
وبواجه كل ما بتقدم
الدولة ام الجيش متنظم
امريكا هزمها المخيم
في الحارة الفلسطينية
مولود محتل ومتكتف
مولود متنمر متصنف
اشنقني..
اعدم..
اتعسف..
الحارة فلسطينية
انا اعلى ما في صوتي
سكوتي
واحلى حياة بعشقها
موتي
انا ارضي وجوي وملكوتي
الحارة الفلسطينية

**************
********

ياعنكبـــوتة
********
يا عنكبوتة كملي عشك
لا حد حيزيحك
ولا يهشك
لمي مهاجرينك
وثبتي دينك
اتمطعي
وخدينا في وشك
بلاد بلا عزة
ممكن تجيبي اجلها من هزة
بلا ضفة
بلا غزة
بالدم رشي اللي بماء رِِشك
وكملي عشك
لمي مهاجرينك
ولو ملايين
يا عنكبوتة
احنا مش فاضيين
مدي الخيوط خيط خيط
واكسي كل الحيط
نامي بأمان
واتمطعي بفرشك
من وشنا ما بنسمعوش وشك
لمي مهاجرينك
وتعاليلي
لا تهم تباريري وتعاليلي
انا في الخلا بنفخ شعاليلي
واوزن قوافي وتفاعيلي
اغش نفسي وعمري ما اغشك
واحش روس اهلي ولا احشك
حتعيشي ابد الدهر
حتوحديها انتي نهر ونهر
نشي اللي ما قدروش على نشك
انا زي ما بعت السنين الخرس
ورضيت بربع الربع خمس الخمس
مجاني حوهبلك عيون القدس
مين اللي سألك تتركي عرشك؟
طب دحنا خدامك
في النوم بنوحيلك باحلامك
واحنا اللي بنحققها قدامك
اسف..
سكوتي ربما دوشك!
فتربصي بينا ولا يهمك
دمنا فدى دمك
وبعترينا واحنا بنلمك
ولو تحاصرك الامم
ويكتفوكي بالتهم
احنا سبيلك للخلاص في الكون
لما تضيق ..
دايما بيطلع مننا مجنون
يهتف يعيش صهيون
ونغش بعضينا ولا نغشك
بالعكس
بندلع
وبنهشك
ناكل في بعض
فيتملي كرشك
وقرشنا بثانية يصير قرشك
يا عنكبوتة
انتي
وزعيقنا
واصواتنا
ودم احياءنا وامواتنا
هدي عشوشنا
وكملي عشك
لا حد حيزيحك
ولا يهشك
لا حد حيزيحك
ولا يهشك

قمر يافا
لسه ما شبعتش طوافة
ياللي بتطوف من سنين
لسه ما كرهت الليالي ؟
لسه ما شبعتش مشاهدة.. ؟
يا قمر .. حالك .. كحالي..
ضيعونا .. بالمعاهدة !!
***

يا قمر .. هدوا قبورنا
واستباحوا اللي ف صدورنا
دمروا قلوبنا ودورنا
حقنا أصبح خرافة
وضعت يا بلدي الأمين
يا قمر .. تصعد في "يافا"
تترمي في "ير ياسين" !!!
***

ع الزاتون والبرتقالة
ارمي ضياتك أمانة
احنا يكرهنا اللي خاين
واحنا .. تكرهنا الخيانة
يا قمر..
وغيوم بتحجب
دمنا .. لما يسرسب
دنيا .. تحترم اللي يغلب
حتى لو شيطان لعين.
يا قمر
بشَّر في "يافا" واتصلب في "دير ياسين".
***

يا صبور .. الصبر واعر
للدماغ.. وللمشاعر
قلبي ندل وحزنه داعر
ليتني ما كنت شاعر
كنت أفلت م الكمين
صرختي بتموت في همسي
ليتني ما غادرت أمسي
ليتني ما صاحبت نفسي
ليتني ضميت خوامسي
يوم ما أقسمت اليمين
يا قمر عاشني في "يافا"
واتقتلنا في "دير ياسين"
يا قمر..
خدته ليافا..
خدني هوه.. لدير ياسين

http://www.lakii.com/vb/smile/12-4.gif
خرج الشتا وهلِّت روايح الصيف*
والسجن دلوقتى يرد الكيف!!
مانتيش غريبة يا بلدي ومانيش ضيف
لو كان بتفهمي الأصول
لتوقفى سير الشموس..
وتعطلي الفصول.
وتنشفي النيل في الضفاف السود
وتدودى العنقود
وتطرشي الرغيف!!
ما عدتي متمتعة وانتى في ناب الغول
بتندغي الذلة وتجتري الخمول
وتئني تحت الحمول
وتزيفي في القول
وبأي صورة ماعادش شكلك ظريف
***
دوس يا دواس
ما عليك من باس
واكتم كل الأنفاس.
الضهر مليئ بالناس
إللى حبيتهم دون ما يبادلوني
الإحساس.
وأنا عارف إني ما باملكهمش
لأني ما مضيتهمشي في الكراس!!
الناس اللي دمغها الباطل دمغ
اللي بتنضح كدب وتطفح صمغ
اللى بتحشش
وما بتحسس
واللي بتضحك كل ما تنداس!!
***
الجامعة طالعة رايتها ضلتها
هدارة
جبارة
صادقة في نيتها..
بتتجه..
يم الوطن والموت.
و"شبرا" زاحفة تأكد التهديد
وتجمع التبديد
وصلت ميدان الفجر..
في المواعيد…!!
النهر.. والضفة.
نبت هلال العيد
ومالت الكفة
وصحيت الرجفة.
مصر اللي لا لحظة ولا صدفة.
ثورة ف ضمير النور.. بتتكون.
رايات.
بدم البسطا..تتلون..
سدوا الطريق..
كيف المؤامرة تموت!؟
"فلتسقط الخيانة
والقيادات الجبانة
ندّاغة الإهانة
كريهة الريحة
كريهة الصوت!!"
***
الغضب..
بيوالي إنشاد البيان
والوجوه الصامدة في وش الزمان.
والرحابة..
في الصدور..وفي الليمان..!!
غابت الأسر الصغيرة في الوطن
. استوى ع الأرض وعي.
صحيت الأمة ف هدير السعي.
الوطن.. مفهوم
وحلو
ويتحضن..!!
***
التفت صاحبى يقوللي:
"لسه نايم..؟
مش مظاهرات..
دي حاجات يفهمها شعبك.
إقفل العقل القديم..
وافهم بقلبك.
رقصة الزار القديمة..
الفرعونية
ع الخصيبة السندسية..
لما يجتاحها الألم!!.
لما تغمرها الإهانة..
والقدم..
تسحق الإنسان..
وتدهس القيم!!"
ابتسمت..!!
رقصة الزار القديمة
الحميمة
العظيمة.. لحد فكرناها ثورة
فرق بين رقصة.. وثورة!!.
لا هيَّ جاية فوق حصان
ولا في لحظة زمان
حتهب نابتة في الغيطان
ولا رقصة
برجل حافية
ف مهرجان!!.
دكهه هادية.
تيجي هادية.. وصوتها دامي
تعزل الكداب..
وتقبض ع الحرامى!!.
تعرف الناس..مش كتل
تعرف الناس..
بالوجوه..وبالأسامى.!!
تيجى..فاتحة القبر
نادغة الصبر
قابضة الجمر
تنصب محاكم الشعوب في كل قصر
تغير العصر..
إلى آخر الصفحات في سفر الثورة!!.
ابتسم صاحبي وقاللي:
"حاذر م الارتفاع
سيبك م الاندفاع
حفر حكومتك وساع!!"
ابتسمت
جفت الرقصة الحبيسة
عادت الأمة التعيسة
اختفى كل اللى كان!!
اختفى كل البشر
واختفى كل المكان
تحت سنوات الهوان.!!
***
تتعسني فكرة إني هموت
قبل ما اشوف- لو حتى دقيقة-
رجوع الدم لكل حقيقة..
وموت الموت..!!
قبل ما تصحى..
كل الكتب اللى قريت
والمدن اللي ف أحلامى رأيت
والأحلام اللي بنيت
والشهدا اللي هويت
والجيل اللي هدانى
والجيل اللي هديت..!!
قبل ما أملس ع الآتي
وادفن كل بشاعة الماضي
في بيت.!!
***
حاقولها بالمكشوف:
خايف أموت من غير ما اشوف
تغير الظروف.
تغير الوشوش..
وتغير الصنوف!!.
والمحدوفين ورا
متبسمين في أول الصفوف.
خايف أموت وتموت معايا الفكرة
لا ينتصر كل اللي حبيته..
ولا يتهزم كل اللى كنت أكره..
اتخيلوا الحسرة!!.
***
مأساتنا.. إن الخونة.. بيموتوا
بدون عقاب ولا قصاص..!!
مأساتنا
إن الخونة بيموتوا.. وخلاص.
بدون مشانق في الساحات..
ولا رصاص!!.
على كل حال..
صدقي مازال!!.
صدقي على قيد الحياة
بيفجر الدم النبيل
ويبطش بالاستقلال
ويمرغ الجباه
تحت الجزم والخيل
ويفتح الكوبري علينا
كل صبح وليل.!!
والإنجليز..
مازالوا بيقهقهوا
ويضربوا.. ويسجنوا الشباب
على كوبري عباس..
أو
في "معرض الكتاب!!".

http://www.lakii.com/vb/smile/12-4.gif
دواير

اغنية بنلف لعبد الرحمن الابنودي
بنلف دواير .. و الدنيا تلف بينا
دايما ننتهي .. لمطرح مإبتدينا
طيور الفجر تايهه .. في عتمة المدينة بتدور


************************

ما بنكتبش الرسائل .. ما بننتظرش رد
لاحد في يوم سمعنا .. ولا بنسمع حد
طيور العمر تايهة .. في عتمة المدينة بتدور

*************************

ساكنين في عالم يعشق الخطر .. فيه الطيور تهرب من الشجر
وتهرب النجوم من القمر .. وتهرب الوجوه من الصور
بنلف في دواير بندور على الأمان .. و نلاقينا رجعنا تاني لنفس المكان

ندور .. ندور .. ندور

**********************

نحلم و نحلم بالحياه المفرحه .. و أتاري أحلامنا بلا أجنحه
ندور ندور ندور .. بجناح حزين مكسور
ساعات نشوف في العتمه .. و ساعات نتوه في النور
ساعات عيونا بالأسى تفرح .. و ساعات في ساعة الفرح ننوح

http://www.lakii.com/vb/smile/12-4.gif

http://www.lakii.com/vb/smile/12-4.gif
الإمــام
*******
ـــــــــــــــــــــــــ
إلـى فـؤاد حـداد
ـــــــــــــــــ


إنت الإمام الكبير .. وأصلنا الجامع ..
وانت اللى نقبل نصلى وراك فى الجامع

بسيط يا مولاى ، والضحكة فى صدرك .. قوت
فقير يا مولاى .. ورازقنا حرير .. وياقوت
ونشيد عشان الأرض
ودعوة .. للى يموت
وخريطه لفلسطين
وكُُم .. للدامع

إنت الإمام الكبير .. وأصلنا الجامع ..
وانت اللى نقبل نصلى وراك فى الجامع

إن تمدحوا الشعر بامدح سيرة الشاعر
واشهد بإنه صبور .. العارف .. الطاهر
الصاحى سهران .. ونايم نومة الساهر

على حرف ورقه ، بنصل يمص دمه الحر
دقق فى " بيت " تلقى تحته ميت وريد بيشر
اتبع خطا الدم تلقى الجرح ولونه يسر
فؤاد ما قالشى ف يوم .. المر ماله مر
متبوع .. وليه تابعين .. عمره ما كان تابع


إنت الإمام الكبير .. وأصلنا الجامع ..
وانت اللى نقبل نصلى وراك فى الجامع

وحق من جاله يحبى النبع فى صحراه
والنهر غير عشانه لهجته .. ومجراه
وحق أحلا اللى قال : وطنى وشد الآه
وحق أحلا اللى حبوه رفقته وصُحَباه

من شد شرايينه ركبت ع العصب أوتار
من دمع عينه انسقت فى كفنا الوردة
وحق من أثبت إن السجن فيه أحرار
دول أربعين ضلع ولاَّ أربعين جلده
إللى طلع ع الجبل يقطف زهور النار
ويرشها ع العباد فى الحارة .. والشارع


إنت الإمام
الغنوة دى عن شعر فؤاد
وفؤاد ده اسمه فؤاد حداد
لازم مناوره ومداوره
مادام بتكتب عن ثوره
مش كل من يعرف يقرا ... قرا شعر فؤاد
تغرق تمد لها القشه
تولع .. تطفيها برشه
تسكر قلوبنا وتتعشى ... من شعر فؤاد
قاللى القوافى على كتافى
سواقى دايره على مافى
ما يبرد القدم الحافى ... غير شعر فؤاد
يصفها صفوف مرصوصة
لا زايده .. هه !! ولا منقوصه
واثقة لكين مش مجعوصة ... فى شعر فؤاد
كل المنازل .. مفتوحه
كل المسائل مشروحه
الدنيا – لمتها اللوحه ... فى شعر فؤاد
كان للخلايق إنسانهم
للفلاحين حد فيسانهم
غنوا الفقارى بلسانهم ... فى شعر فؤاد
شوف الكلام طالع نازل
كإنه مغزول فى مغازل
متربى فى أعلى منازل ... يا شعر فؤاد
تنزح .. وبيرك نضاحه
على قلب ما عرفش الراحه
ليه الحياه كده لماحه فى شعر فؤاد
والغنوه دى عن شعر فؤاد
وفؤاد ده اسمه فؤاد حداد
عمرى ما شفتش حبال الفجر لونها اسود
ولا دى قضبان وقاصده تقصقص الرؤيه
والحلم عود شق أسفلته وبيعيِّد
تسقيه بموال تقوم جامعة فى أغنية
ما تعدديش .. ياللى واقفه فى الخلا تعدِّد
الدنيا مش زى مانتى شايفه .. مش ديه
أحلا ما فى السجن قضبانه اللى بتحدّد
خطاوى فى الإنسانية .. وشكل .. وهويه
قُرْبت حيطان السجون .. من الهرم .. أفرد ..
قدمى .. ينام المقطَّم .. تحت رجليه
أنا باحمده واحمده .. وكل يوم حاحمِد
ربى اللى دل الضمير ع الاشتراكيه
فوق مادنه ريفى فقيره .. تقول بلا مسجد
أدِّنت صايم .. ولا لقمه .. ولا ميه
مع النبى قلت : كل الناس سواسيه
شعارات حماسيه لكن من عصبت موجوع
لو بطن واحده بتبكى من عطش أو جوع
ماكانش يطلع كلامى كلته مسجوع
عاش المربى .. وعاش السجع والساجع

وانت الإمام الكبير .. وأصلنا الجامع ..
وانت اللى نقبل نصلى وراك فى الجامع

الفرد ما يقدَّرُه غير حسن أفعاله
وكل فرد .. حيتجازى .. بأعماله
يوم ما ناديت فى العباد : خافوا زحام الحر
صحيتنا على طبلتك ولا صراخ أبو زر ؟
وكنت واقف تشهِّد ع اللئيم ماله
وانصف ما فيهم ما تستعناش بأقواله
وكانك انت الميزان وكانه يوم الحشر

كل اللى أسعد وأبهج .. واللى آذى وضر
وكل سارق بهيمه .. ف حبلها منجر
وكل شاعر كَدَبْ .. مربوط فى مواله
أحلا ما فى النيل .. يبان للضفه مستسلم

وأقوى ما فى النيل عيونه .. لحظة استسلام
م الدوله والثوره .. ولاَّ من صحيح مسلم
إنت الشهيد .. اللى مات بيأسلم الإسلام
الخصم انت .. وإنت مت بتدافع
إنت الإمام

والغنوة دى لفؤاد فؤاد
وفؤاد ده اسمه فؤاد حداد

فؤاد وتر .. مات العازف
أخضر .. يضلل ع الناشف
طبله وكمنجه .. وشفايف ... لفؤاد فؤاد
ندى .. نداوة الفجرية
قمر .. ومولود ع الميه
ينفع يكون للأنبيا ... ده فؤاد فؤاد
السبع ينفخ من ديقه
عصب السواقى ف تزييقه
والشعر يتهجَّى طريقه ... لفؤاد فؤاد

ولما يخطر فى الوادى
وطنه يقول له : يا بلادى
ويدفع الشعب العادى ... لفؤاد فؤاد
وهوه متكى ف زنازينه
يضحك على اللى حاجزينه
مفتشينه وفارزينه ... لكن ده فؤاد

والغنوة دى لفؤاد فؤاد
وفؤاد ده اسمه فؤاد حداد

شباب بلادنا الصغير
إللى إذا عتمه .. نوّر
ومسك دوايتك وصور
خريطه .. بس بأصولها
وكلمه يعرف يقولها
وموته .. يفهم ينولها
والموته إنت تغازلها
بغنوه قلبك غازلها
من تانى يصحى فى غزلها
شهيد على يد شاعر
ده كاس وداير على الدنيا مالوش علامات
ولا حد دايم على الدنيا غير الباقى
كتير باحس الزمن خلصان .. وانا .. على مات
والنخل له طَرْح وِخْرِى ، وطرح سبَّاقى
يغوى الغراب إلا يسكن .. شجرة ع اللمات
ما يوقع إلا اللى هيه .. تقدر انه مات
والسبع لو مات فى أحضان الوطن باقى
ياللى فى حب الوطن والرحله عزيتنى
ويوم ما مت انت جيتنى وانت عزيتنى
وقلت لى : عزتها وهيه ما عازتنى
وفتها لندل .. عاز يكسر .. وعاز يتنى
أنا فُته اسمى سراج .. والخلق بيه عالمات
الجسم راحل لكين شوف .. الأثر باقى
دمى بيصبح عساكر
منصوره .. راجعه لبيوتها
حصد السنه .. لم يفوتها
ولا زيارة البنادر
اللى بيزرع بيزرع
واللى بيصنع بيصنع
واللى رجع للمحطه
وعاد .. لقطع التذاكر
واللى يكمل يذاكر
الشمس تطرح سناكى
والدم بيصيح يكاكى
بلبل .. لبس بدله كاكى
والأمهات اللى طلعت
شافت ولادها وسمعت
زغاريدها عافرت وطلعت
ودبكه لاجل اللى جالها
وادى دية رجالها
بالكام قصيدة اللى قالها
قال له التاريخ المذاكر
فكرتنى .. ياللى فاكر
الدم هوه علمها
والدم هوه ألمها
والدم هوه حروبها
والدم هوه سلامها
وازاى تصدق كلامها
ان هيه نسيت بطلها
جاعت .. وأكلت عيالها
أو قدمتهم بطوعها
يا كلهم اللى أكلها
اللى ابتسم والمناجل
دايره تحش السنابل
بالفرض والسنه
والجبر .. والواجب
كل القصايد بتتبع فى الأدان صوتك
لا يغير الأمر .. لا غيابك ولا موتك
من ألف عام جايه
من ألف عام راحت
شجر بينفض ورق
وجاروف كبير فاحت
لكل حلم انطفا
ولكل قلب غياب
ولكل اسم اختفى
ولكل صدق عقاب
ولكل موت احتفى
ولكل موت أسباب
من ألف عام جايه
لألف عام راحت
شجر بينفض ورق
وجاروف كبير فاحت
وحلم ما نطفاش
وقلب عجيب ما غابش
واسم ما اختفاش
مكتوب فى عين الشمس
والموت ما يخصناش
فؤاد حداد ما ماتش
هل عندكم مانع ؟

وانت الإمام الكبير .. وأصلنا الجامع ..
وانت اللى نقبل نصلى وراك فى الجامع

بسيط يا مولاى ، والضحكة فى صدرك .. قوت
فقير يا مولاى .. ورازقنا حرير .. وياقوت
ونشيد عشان الارض
ودعوة .. للى يموت
وخريطه لفلسطين
وكُمّ .. للدامع
******
****
**
http://www.lakii.com/vb/smile/12-4.gif

http://www.lakii.com/vb/smile/12-4.gif
القدس

القدس قدسي..
يمامة صيف في غيتها.
تطير . تيجيني..
بأشواقها .. وغيتها.
فاكراني من يد صيادها
أنا اغيتها !!
فاكراني صوت الأدان الحي
في "حطين"
ومخبي في ضلوعي قلبك
يا "صلاح الدين"..
شايل صراخ اليتامى
ولوعة المساكين
فاكراني كفن الشهيد
وخيمة اللاجئين
وأول الأتقيا..
وآخر الهاربين..
***

تجيني وتبوسني
وتملس على خدودي
هاربة بـ حدودها القدام
تتحامى في حدودي
تبكي على صدري
دبكة حزن على عودي
تبكي وفاكرة حد هدها
وأسكتها !!
أنا..
ياللي من موت شراييني
اتنسج موتها
وصوتي..
يوم الغنا الباطل
بلع صوتها
مافيش في قلبي
ولا آهة أموتها
كل الآهات ميتة
أنا حبيس همسي
نزعت صورتها من بُكرايا
من أمسي
حطين ولا حطيني
ولا قدس الهموم.. قدسي
ولا عارفة تنساني
زي ما تهت.. ونسيتها !!
***

القدس..
تيجي يمامة نور
مطفية
طالعالي م البرد
للصيف الجديد تسعى
فاكرة في كفي طعام
وف قلبي أخوية
هية اللي مش واعية..
والا أنا اللي مش باوعى..؟
لا دمع يسقى عطش عيني
ولا مية.
يا حزن لا تترجمه أهة..
ولا دمعة..
...
ما كنا فاكرينا
أطفالك
يا ست الكل.
الكدب ما يجيبش همه
إحنا مش أطفال
وكنا فاكرينا أبطالك
أيادي السيف
سيوفنا من قش
ودي..
ماهيش إيدين أبطال
ضيعنا ع القهوة
نص العمر
نتاوب
نتمنوا من ربنا..
تتحسن الأحوال !!
***

يا قدس
لمي جناحك وارجعي تاني.
ولا تصدقي قولي..
ولا تتمني
أحضاني
نامي في حضن العدو
هوه العدو الأول
يا قدس..
خافي قوي..
من العدو الثاني.
الخنجر المختفي
وانتي فاكراه
ضلع
الأفعى ورا
ضحكتي..
والموت في أسناني.
وصفحتي في النضال
بيضا بياض التلج !!
***

لمي الجناح يا قدس
لمي الجناح..
"البناني" ف قلبي مسكونة
بيمام .. غريب الوطن.
يوم ما التهم خضرتك
فدان ورا فدان.
يوم ما طرد أسرتك
إنسان ورا إنسان.
يوم ما هدم مادنتك
وكسَّر الصلبان
***

يا قدس..
قولي لحيطانك
اثبتي بقوة
حيخلصك ابنك
اللي أنا .. مانيش هوه
لا تبحثي عن حلول
الحل من جوه
احل من جوه
الحل من جوه !! .
http://www.lakii.com/vb/smile/12-4.gif

http://upload.wikimedia.org/wikipedi...asmala.svg.png


السلام عليكم ورحمت الله وبركاته

__

قصيدة يامنة من اجمل القصائد لعبد الرحمن الابنودي أهداء لـ عمته رحمها الله


http://saeedaljariri.jeeran.com/files/136607.jpg

الـــفيديو + الـــكلمات

**

الـــفيديو
...




الـــكلمات
...

والله وشبت ياعبدالرحمن

عجزت ياواد؟

ما اسرع..؟

ميتى وكيف ؟

عاد اللي يعجز في بلاده

غير اللي يعجز ضيف!!

هلكوك النسوان؟

شفتك مره بالتلفزيون

ومره وروني صورتك في الجورنال

قلت : كبر عبدالرحمن!

أمّـال أنا على كده

مت بقى لي ميت حول!!

والله أنا خايفة ياولدي القعدة تطول

مات الشيخ محمود

وماتت فاطنة اب قنديل

واتباع كرم ( اب غبان )

وانا لسه حية

وباين صاحية كمان .. وكمان!!

عشت كثير ..

عشت إلـ حد ما شفتك عجزت يا عبد الرحمن

وقالولي .. قال : خلفت!!

وانت عجوز خلفت ياخويا ؟!!

وبنات كمان ..؟

امال كنت بتعمل ايه

طيلة العمر اللي فات؟

دلوقت مافقت؟

وجايبهم دلوك تعمل بيهم ايه ؟

على كلٍ ..

أهي ريحة من ريحتك ع الارض

يونسوا بعض…

ماشي ياعبدالرحمن ..!

اهو عشنا وطلنا منك بصة وشمة .

دلوك بس ..

ما فكرت فـ ( يامنه ) وقلت ( ياعمة )؟

حبيبي انت ياعبدالرحمن

والله حبيبي .. وتتحب

على قد ما سارقاك الغربة

لكن ليك قلب

مش زي ولاد الكلب اللي نسيونا زمان !!

حلوه مرتك .. وعويلاتك ؟

والا شبهنا ؟

سميتهم ايه؟

قالولي : ( أية .. ونور)

ماعرفتش تجيب لك حتة واد ؟

والا اقولك:

يعني اللي جبناهم..

نفعونا في الدنيا بإيه ؟

غيرش الانسان مغرور!!

ولسة يامنه حتعيش وحتلبس

لما جايب لي قطيفة وكستور؟

كنت اديتهمني فلوس

اشتري للركبة دهان

أ بـا ي ما مجلع قوي يا عبدالرحمن

طب ده انا ليا ست سنين

مزروعة في ضهر الباب

لم طلوا عليا احبة ولا اغراب

خليهم .. ينفعوا .. اعملهم اكفان

كرمش .. وشي !!

فاكر يامنه .. وفاكر الوش؟

اوعى تصدقها الدنيا

غش فـ غش!!

اذا جاك الموت ياولدي

موت على طول

اللي تخطفوا فضلوا احباب

صاحيين في القلب

كأن ماحدش غاب

واللي ماتوا حته .. حته ونشفوا

وهم لسه حيين

حتى ( سلام عليكم)

مش بتعدي من بره الاعتاب!!

اول مايجيك الموت … افتح

اول ما ينادي عليك .. اجلح

انت الكسبان…

اوعى تحسبها احساب

ولا واد .. ولا بت

ده زمن .. يوم مايصدق .. كداب!!

سيبها لهم بالحال والمال وانفد

اوعى تبص وراك

الورث تراب

وحيطان الايام طين

وعيالك .. بيك مش بيك عايشين!!

يوووووه يازمن

مشوار طولان..

واللي يطوله يوم عن يومه ياحبيبي

حمار !!

*******

الدواء عاوزاه لوجيعة الركبه

مش لطوالة العمر

اوعى تصدق الوانها صفر وحمر

مش كنت جميلة ياواد…

مش كنت .. وكنت وجدعه

تخاف مني الرجاله

لكن فين شفتوني

كنتو عيال!!

بناتي ( رضية ) ( ونجية ) ماتوا وراحوا

وانا اللي قعدت

طيب يازمان!!

اوعى تعيش يوم واحد بعد عيالك

اوعى ياعبدالرحمن

في الدنيا وجع وهموم اشكال الوان

الناس مابتعرفهاش

اوعدهم

لو حتعيش بعد عيالك ماتموت

ساعتها بس .

حتعرف ايه هو الموت

اول مايجي لك نط

******

لسه بتحكي لهم بحري

حكاية ( فاطنه وحراجي القط )؟

آ باي .. ما كنت شقي وعفريت

من دون كل الولدات

كنت مخالف…

براوي

وكنت مخبي في عنيك السحراوي

تمللي حاجات

زي الحدايه..

تخوي الحاجه وتطير.

من صغرك بصوافر واعره

ومناقير !!

بس ما كنت كداب

واديني استنيت بالدنيا

لما شعرك شاب!!

*******

قدم البيت

اتهدت قبله بيوت وبيوت

واصيل هوه

مستنيني لما اموت

حاتيجي العيد الجاي

واذا جيت ..

حاتجيني الجاي؟

وحاتشرب مع يامنه الشاي؟

حاجي ياعمه ..

وجيت…

لا لقيت يامنه ولا البيت!!


**

اشكرك جدا على القصيده الممتازه لشاعر جميل انا فعلا اعتز بيه وشكرا لانك فكرتنا بالزمن الجميل >:D<>:D<>:D<>:D<:x

ميرسي كتير لـ مرورك

**

مجهود جميل

جزاك الله خيرا

تسلم الايادى

رائعه الحرف دوما

وإبداع من قبل

وأستمر حتى الأن

تقديرى واحترامى

طيف عابر }

اللهـــم

اغفر لها و أرحمها وعافيهِا واعفوا عنها

وأكرم نزلها ووسع مدخلها

وأغسلها بالماء والثلج والبرد

ونقهِامن الذنوب و الخطايا

كما ينقى الثوب الأبيض

من الدنس

اللهم أوسع عليها قبرها

وفرش قبرها من فراش الجنة

اللهم اجعل قبرها روضة من رياض الجنة

ولا تجعلها حفرة من حفر النارِ

يا رب العالمين

اللهم

أبدلها دارا خيرا من دارها

وأهلا خيرا من أهلها

وزوجا خيرا من زوجها

وأدخلها الجنة

وأعذها من عذاب القبر

ومن عذاب النار

اللهم أجزها عن الإحسان

إحسانا

وعن الإساءة عفواوغفرانا

اللهم

إن كانت محسنه فزد في حسناتها

وإن كانت مسيئه فتجاوز عنها

يا رب العالمين

اللهم

أدخلها الجنة من غير حساب

ولا سابقة عذاب

اللهم أنسها في وحدتها

وأنسها فى وحشتها

وأنسها في غربتها

اللهم

أنزلها منزلا مباركا

وأنت خير المنزلين

اللهم أنزلها منازل الصديقين الشهداء

والصالحين وحسن أولئك رفيقا

اللهم

أعذها من عذاب القبر وجاف الأرض عن جنبيها

اللهم املأ قبرها بالرضا والنور

والفسحة والسرور

اللهم قها السيئات

ومن تق السيئات يومئذ فقد رحمته

اللهم

إنها في ذمتك

وحبل جوارك

فقهِا

فتنة القبر وعذاب النار

وأنت أهل الوفاءوالحق

فاغفرلها

وارحمها إنك أنت الغفور الرحيم

اللهم اغفر لها فى المهديين

واخلفها في عقبها في الغابرين

واغفر لنا ولها يا رب العالمين

وأفسح لها في قبرها

ونور لها فيه

اللهم

إنها عبدك وابن عبدك وابن أمتك

خرجت من روح الدنيا

وسعتها ومحبوبيها

وأحبائها

فيها إلى ظلمة القبر

وما هى لاقيه

كانت تشهدُ

ألا إله إلا أنت وأن محمداً عبدك ورسولك

وأنت أعلم بها

اللهم

إنها نزلت بك وأنت خير منزول بها

وأصبحت فقيره إلى رحمتك

وأنت غني عن عذابها

أتها برحمتك ورضاك
وقها فتنة القبر وعذابه

وأتها برحمتك الأمن من عذابك

حتى تبعثها

إلى جنتك يا أرحم الراحمين

اللهم

ارحمها تحت الأرض واسترها يوم العرض

ولا تخزها يوم يبعثون

اللهم يمن كتابها

ويسر حسابها

وثقل بالحسنات ميزانها

وثبت على الصراط أقدامها

وأسكنها فى أعلى الجنات

فى جوار نبيك ومصطفاك

اللهم

اجعل عن يمينها نورا

وعن شمالها نورا

ومن أمامها نورا

ومن فوقها نورا

حتى تبعثها أمنه مطمئنه

فى نورِ من نورك

اللهم

انظر إليها نظرة رضا

فإن من تنظرإليه نظرة رضا

لا تعذبه أبدا

اللهم

أسكنها فسيح الجنان واغفر لها يا رحمن

اللهم

اغفر وارحم وتجاوز عما تعلم

فإنك أنت الله الأعز الأكرم

اللهم

إنها جاء ببابك وأناخت بجنابك

فجد عليها بعفوك

وإكرامك وجودك وإحسانك

اللهم

إن رحمتك وسعت كل شيء

وهى شيء

فارحمها رحمة تطمئن بها نفسها

وتقر بها عينها

اللهم

احشرها مع المتقين إلى الرحمن وفدا

اللهم

احشرها في زمرة المقربين وبشرها بروح وريحان

وجنة نعيم

اللهم

احشرها مع أصحاب اليمين

واجعل تحيته سلام لك من أصحاب اليمين

اللهم

بشرها بقولك

كلوا واشربوا هنيئا بما أسلفتم في الأيام الخالية

اللهم اجعله من

الذين سعدوا ففي الجنة

خالدين فيها مادامت السموات والأرض

اللهم

لانزكيها عليك

ولكنا نحسب أنها أمنه وعملت صالحا

فاجعل لها جزاء الضعف

بما عمل واجعلها في الغرفات من الآمنين

اللهم

إنها خافت مقامك

فاجعل لها جنتين ذواتى أفنان

بحق قولك

ولمن خاف مقام ربهِ جنتان

اللهم

إنها صبرت على البلاء

فلم تجزع

فامنحها درجة الصابرين

الذين يوفون أجورهم بغير حساب

فأنت القائل

إنما يوفى الصابرون أجرهم بغير حساب

اللهم

إنها كانت مصليه فثبتها على الصراط

يوم تزل الأقدام

اللهم

إنها كانت لك صائمه

فأدخلها الجنة

من باب الريان

اللهم

إنها كانت لكتابك تاليه

فشفع فيها القرأن

وارحمه يا رحمن من النيرأن

واجعلها يا رحمن ترتقى في الجنة

إلى أخر أية قرأتها وأخر حرف تلاته

اللهم

ارزقها بكل حرف من القرأن حلاوة

وبكل كلمة كرامة وبكل أية سعادة

وبكل سورة سلامة وبكل جزء جزاء

اللهم

هذا الدعاء

ومنك الإجابة

وهذا الجهد

وعليك التكلان

سبحان ربك رب العزة

عن ما يصفون وسلام على المرسلين

والحمد لله رب العالمين

وصلى اللهم على نبيك محمد

وعلى أله وصحبه الطيبين الطاهرين

وسلم تسليما كثيرا

شكرا اااااااااااااااااا